روزا باعلانوۆا اتىنداعى «قازاقكونتسەرت» مەملەكەتتىك اكادەميالىق كونتسەرتتىك ۇيىمى ساحناسىندا 1 ناۋرىز كۇنى تانىمال حورەوگراف, «GULDER» ءانسامبلىنىڭ باس بالەتمەيستەرى انۆارا سادىقوۆانىڭ شىعارماشىلىق قىزمەتىنە 25 جىل تولۋىنا ارنالعان «FLOW/اعىن» اتتى مەرەكەلىك كونتسەرت وتەدى, دەپ حابارلايدى Egemen.kz.
«FLOW/اعىن» – ۇلتتىق حورەوگرافيانىڭ دامۋ ەۆوليۋتسياسىن بەينەلەيتىن كوركەمدىك جوبا. باعدارلامادا انۆارا سادىقوۆانىڭ ءار جىلدارى قويعان جانە ەلىمىزدىڭ جەتەكشى حورەوگرافيالىق ءارى تەاتر ۇجىمدارىنىڭ رەپەرتۋارىنا ەنگەن تاڭداۋلى تۋىندىلارى ۇسىنىلادى. كەش اياسىندا حورەوگرافتىڭ قازاق نەوحورەوگرافياسى باعىتىنداعى ىزدەنىستەرى مەن شىعارماشىلىق قولتاڭباسى كەڭىنەن تانىستىرىلادى.
كونتسەرتتىڭ باستى وقيعاسى – فرانتسۋز كومپوزيتورى موريس راۆەلدىڭ مۋزىكاسىنا جازىلعان «زامانا جاڭعىرىعى» («ەحو ەپوح») ەتنو-بالەتىنىڭ تۇساۋكەسەرى. جاڭا قويىلىم ۇلتتىق بي ەلەمەنتتەرىن زاماناۋي پلاستيكامەن ۇشتاستىرىپ, داۋىرلەر ساباقتاستىعىن ساحنالىق ءتىل ارقىلى جەتكىزۋدى ماقسات ەتەدى.
ءىس-شاراعا قازاقستان مەن قىرعىزستاننىڭ ونەر شەبەرلەرى قاتىسادى. اتاپ ايتقاندا, قازاقستاننىڭ حالىق ءارتىسى سەكەن تۇرىسبەكوۆ, «TURAN» ەتنو-فولكلورلىق ءانسامبلى, قىرعىز رەسپۋبليكاسىنىڭ ەڭبەك سىڭىرگەن ءارتىسى گۇلزادا رىسقۇلوۆا, «دارىن» مەملەكەتتىك جاستار سىيلىعىنىڭ لاۋرەاتى ارداق ەلەۋسىز, قازاق مەملەكەتتىك سيمفونيالىق وركەسترى (ديريجەرى – قازاقستاننىڭ ەڭبەك سىڭىرگەن قايراتكەرى ەربولات احمەدياروۆ), «استانا وپەرا» مەملەكەتتىك وپەرا جانە بالەت تەاترى ءسوليسى سۇلتانبەك عۇمار, اباي اتىنداعى قازاق ۇلتتىق وپەرا جانە بالەت تەاترى ءسوليسى دينارا قۇداباەۆا, حالىقارالىق بايقاۋلاردىڭ لاۋرەاتى كوركەم شولوشوۆا, «GULDER» ءانسامبلىنىڭ ارتىستەرى مەن قازاق ۇلتتىق حورەوگرافيا اكادەمياسى ستۋدەنتتەرى ونەر كورسەتەدى.
وپەرا جانە بالەت تەاترى سينگاپۋر ساحناسىندا ونەر كورسەتەدى
انۆارا سادىقوۆا – 70-تەن استام حورەوگرافيالىق كومپوزيتسيا مەن ەكى بالەتتىڭ اۆتورى. ونىڭ قويىلىمدارى الماتى حورەوگرافيالىق ۋچيليششەسى, قازاقستان رەسپۋبليكاسىنىڭ مەملەكەتتىك اكادەميالىق بي تەاترى, «ASTANA OPERA» مەملەكەتتىك اكادەميالىق وپەرا جانە بالەت تەاترى, «ASTANA BALLET» تەاترى جانە باسقا دا شىعارماشىلىق ۇجىمداردىڭ ساحناسىندا قويىلعان.
يسپانيا ۇلتتىق بالەتىنىڭ ءارتىسى استانادا شەبەرلىك ساعاتىن وتكىزدى
ايتا كەتەيىك, حورەوگراف حالىقارالىق جانە رەسپۋبليكالىق بايقاۋلاردىڭ 30-دان استام لاۋرەاتى مەن گران-پري يەگەرىن تاربيەلەگەن. سونىمەن قاتار ۇلتتىق حورەوگرافيا تاريحىنا ارنالعان دەرەكتى فيلمدەردىڭ اۆتورى, عىلىمي-زەرتتەۋ ماقالالار مەن كىتاپتاردىڭ اۆتورى جانە حالىقارالىق بايقاۋلار قازىلار القاسىنىڭ مۇشەسى رەتىندە دە تانىمال. «زامانا جاڭعىرىعى» ەتنو-بالەتىنىڭ پرەمەراسى – ۇلتتىق بي ونەرىنىڭ جاڭا كەزەڭىن ايقىندايتىن ماڭىزدى مادەني وقيعا بولماق.