ىشكى ىستەر مينيسترلىگى «زاڭ مەن ءتارتىپ» قاعيداتى اياسىندا ەل اۋماعىندا سينتەتيكالىق ەسىرتكىنىڭ زاڭسىز اينالىمىنا قارسى كۇرەستى كۇشەيتتى. مامىر ايىنىڭ ەكىنشى ونكۇندىگىندە ەسىرتكى قىلمىسىنا قارسى ءىس-قيمىل بولىنىستەرى بىرقاتار وڭىردە سينتەتيكالىق ەسىرتكىنىڭ اسا ءىرى پارتيالارىن تاراتۋدىڭ جولىن كەستى, دەپ جازادى Egemen.kz.
الماتى قالاسىندا جۇرگىزىلگەن جەدەل-ىزدەستىرۋ شارالارى بارىسىندا قالا تۇرعىنى ۇستالىپ, ودان ەكى كيلوگرامنان استام الفا-PVP سينتەتيكالىق ەسىرتكىسى تاركىلەندى. كۇدىكتى كىناسىن مويىنداعان.
سونداي-اق مەگاپوليستە تاعى ءبىر ازامات قولعا ءتۇستى. ونىڭ تۇرعىلىقتى جەرىن ءتىنتۋ كەزىندە شامامەن ءبىر كيلوگرامم سينتەتيكالىق ەسىرتكى مەن پسيحوتروپتىق اسەرى بار دارىلىك زاتتار تابىلدى.
ەسىرتكى ۇسىنىپ, بىرگە كەتۋگە كوندىرگەن: الماتىدا ءجاسوسپىرىم قىزعا تيىسكەن ەر ادام ىزدەستىرىلىپ جاتىر
شىعىس قازاقستان وبلىسىندا ينتەرنەت-دۇكەن كۋراتورىنىڭ تاپسىرماسىمەن وڭىرلەرگە ەسىرتكى تاسىمالداعان الماتى وبلىسىنىڭ تۇرعىنى ۇستالدى. كۇدىكتىدەن ەكى كيلوگرامنان استام ەسىرتكى تاركىلەندى.
ال قاراعاندى وبلىسىندا الماتى – ەكاتەرينبۋرگ تاسجولىمەن ءىرى كولەمدەگى سينتەتيكالىق ەسىرتكى تاسىمالداعان كۇدىكتى قولعا ءتۇستى. اۆتوكولىكتى ءتىنتۋ كەزىندە ءبىر كيلوگرامم الفا-PVP سينتەتيكالىق ەسىرتكىسى انىقتالعان.
ءىىم مالىمەتىنشە, تاركىلەنگەن سينتەتيكالىق ەسىرتكىنىڭ جالپى سالماعى 6 كيلوگرامنان استى. بۇل زاڭسىز اينالىمعا ءتۇسۋى مۇمكىن 18 مىڭنان استام ءبىر رەتتىك دوزانىڭ جولى كەسىلگەنىن كورسەتەدى.
«وسىلايشا مىڭداعان جاستىڭ ءومىرى مەن دەنساۋلىعىنا تونەتىن قاۋىپتىڭ الدىن الدىق. اتالعان دەرەكتەر بويىنشا قىلمىستىق كودەكستىڭ 297-بابى 3-بولىگىمەن سوتقا دەيىنگى تەرگەپ-تەكسەرۋ امالدارى جۇرگىزىلىپ جاتىر. قازىر باسقا دا قاتىسى بار ادامداردى انىقتاۋ باعىتىندا جەدەل-تەرگەۋ شارالارى جالعاسىپ وتىر. بارلىق كۇدىكتى ۋاقىتشا ۇستاۋ يزولياتورىنا قامالدى. جازعى دەمالىس قارساڭىندا جاستاردى ەسىرتكى تاراتىپ, «جەڭىل اقشا» تابۋعا ۇندەيتىن جالعان ۇسىنىستارعا الدانباۋعا شاقىرامىز. قىلمىستىق توپتار مۇنداي ادامداردى تەك «شىعىن ماتەريالى» رەتىندە پايدالانادى. ءوز بولاشاعىڭىز بەن جاقىندارىڭىز تۋرالى ويلانىڭىز», دەدى ءىىم ەسىرتكى قىلمىسىنا قارسى ءىس-قيمىل كوميتەتى باسقارماسىنىڭ باستىعى باقىتجان ءامىرحانوۆ.
بۇعان دەيىن ەسىرتكى بيزنەسىمەن اينالىسقان 76 شەتەلدىكتىڭ ۇستالعانى تۋرالى حابارلاعانبىز.