مەملەكەتتىك قىزمەتشىلەردى وقىتۋدىڭ ورتاق جۇيەسى قۇرىلۋدا

مەملەكەتتىك اپپاراتتى كاسىبيلەندىرۋ فاكتورلارىنىڭ ءبىرى مەملەكەتتىك قىزمەتشىلەردى تۇراقتى ءارى ساپالى وقىتۋ بولۋى ءتيىس. ورتالىق كوممۋنيكاتسيالار قىزمەتىندە وتكەن ءباسپاسوز كونفەرەنتسياسىندا قر پرەزيدەنتى جانىنداعى مەملەكەتتىك باسقارۋ اكادەمياسىنىڭ رەكتورى فاتيما جاقىپوۆا وسىلاي دەدى. رەكتور پەرسونالدى دامىتۋ مەن مەملەكەتتىك قىزمەتشىلەردى وقىتۋ مەملەكەتتىك قىزمەت باسىمدىقتارىنىڭ ءبىرى رەتىندە قالىپتاسىپ, مەملەكەتتىك قىزمەتشىلەردى وقۋعا جانە كاسىبيلىگىن دامىتۋعا ىنتالاندىرۋ ايتارلىقتاي ءوسىپ كەلە جاتقانىن ەرەكشە اتاپ ءوتتى.

سونداي-اق, ول بۇگىنگى تاڭدا مەملەكەتتىك باسقارۋ اكادەمياسى مەن وڭىرلىك وقىتۋ ورتالىقتارىنا قازاقستاندىق مەملەكەتتىك قىزمەتشىلەردىڭ كاسىبيلىگىن ارتتىرۋ بويىنشا ۇلكەن مىندەتتەر جۇكتەلىپ وتىرعانىن جەتكىزدى.

«وسىعان وراي, ءبىز وقىتۋ باعدارلامالارىن بىرىزدەندىرەتىن بولامىز. مەملەكەتتىك قىزمەتشىلەردى وقىتۋدىڭ نەگىزگى قاعيداتتارى كاسىبيلىك, كوشباسشىلىق جانە يننوۆاتسيالىلىق بولعاندىقتان, مەملەكەتتىك باسقارۋ اكادەمياسى مەملەكەتتىك قىزمەتشىلەردىڭ كوشباسشىلىق قاسيەتتەرىن دامىتۋ باعدارلامالارىن جۇزەگە اسىرادى, مەملەكەتتىك قىزمەتشىلەردى ۇسىناتىن قىزمەتتەردىڭ ناتيجەلىلىگىن باسقارۋعا جانە تايم-مەنەدجمەنتتى, كوممۋنيكاتيۆتىك داعدىلاردى پايدالانا وتىرىپ, كليەنتكە باعدارلانۋ ارقىلى جاڭاشا جۇمىس ىستەۋگە ۇيرەتەدى. بۇل رەتتە مەملەكەتتىك قىزمەتشىلەردى وقىتۋ باعدارلامالارىنا جوبالىق مەنەدجمەنتتىڭ ەلەمەنتتەرى جانە SCRUM, Agile, Lean, «كايدزەن» سەكىلدى قازىرگى زامانعى باسقارۋ تەحنولوگيالارى ەنگىزىلگەن», – دەپ اتاپ ءوتتى ف. جاقىپوۆا. بۇدان بولەك, مەملەكەتتىك باسقارۋ اكادەمياسىنىڭ رەكتورى بۇگىنگى كۇنى ەلىمىز بويىنشا شامامەن ءارتۇرلى دەڭگەيدەگى 25 مىڭ مەملەكەتتىك قىزمەتشى قايتا دايارلاۋ مەن بىلىكتىلىكتى ارتتىرۋ كۋرستارىنان وتكەنىن, ونىڭ ىشىندە مەملەكەتتىك باسقارۋ اكادەمياسى مەن سينگاپۋردىڭ مەملەكەتتىك قىزمەت كوللەدجى اراسىنداعى ارىپتەستىك شەڭبەرىندە 200 قازاقستاندىق مەملەكەتتىك قىزمەتشى بىرلەسكەن وقىتۋ كۋرستارىندا ءبىلىم العانىن ءمالىم ەتتى. ايدار ورىسباەۆ, «ەگەمەن قازاقستان»