ءدىن ىستەرى جانە ازاماتتىق قوعام ۆيتسە-ءمينيسترى بەرىك ارىن 6-7 جەلتوقسان ارالىعىندا تۇركياعا ىسساپارمەن بارىپ, تۇركيا پرەمەر-ءمينيسترىنىڭ كەڭسەسى جانىنداعى ءدىن ىستەرى باسقارماسىنىڭ باسشىسى مەحمەت گورمەزبەن جانە قورلار ىستەرى جونىندەگى باس ديرەكتوراتىنىڭ جەتەكشىسى ادنان ەرتەممەن كەزدەستى, دەپ حابارلادى مينيسترلىكتىڭ ءباسپاسوز قىزمەتى.
كەزدەسۋدە مەملەكەت پەن ءدىني بىرلەستىكتەردىڭ ءوزارا ارەكەتتەستىگى, ءدىني بىرلەستىكتەر مەن قورلاردىڭ قىزمەتىن رەتتەۋ جونىندەگى ماسەلەلەرى تالقىلانىپ, ءدىني ەكسترەميزم جانە تۇرعىندار اراسىنا ىرىتكى سالاتىن يدەيالاردىڭ تارالۋىنا جول بەرمەۋ تاقىرىبى بويىنشا پىكىر الماسىلدى.
سونىمەن قاتار, ءدىني سالاداعى ىنتىماقتاستىقتى جالعاستىرۋ جايلى, ونىڭ ىشىندە قازاقستاندىق يمامداردىڭ تۇركيانىڭ جەتەكشى تەولوگيالىق وقۋ ورىندارىندا بىلىكتىلىكتەرىن ارتتىرۋ جونىندە ۋاعدالاستىققا قول جەتكىزىلدى.
ءىسساپار بارىسىندا قر ءدىن ىستەرى جانە ازاماتتىق قوعام مينيسترلىگىنىڭ ءدىن ماسەلەلەرى جونىندەگى عىلىمي-زەرتتەۋ جانە تالداۋ ورتالىعى مەن تۇركيا پرەمەر-ءمينيسترىنىڭ كەڭسەسى جانىنداعى ءدىن ىستەرى باسقارماسىنا قاراستى «ISLAM» يسلام زەرتتەۋلەرىنىڭ ورتالىعى اراسىنداعى ىنتىماقتاستىق تۋرالى مەموراندۋمعا قول قويىلدى.