كەزدەسۋدىڭ 74-مينۋتىنا دەيىن 0:2 ەسەبىمەن ۇتىلىپ جاتقان الماتىلىقتار اياق استىنان ءدۇر سىلكىنىپ, كەرەمەت كامبەككە قول جەتكىزدى. ياعني, قۋىپ جەتىپ, باسىپ وزدى. جانكۇيەر جازعان «بۇل «قايرات» يسلامحانسىز ويناي المايدى ەكەن-اۋ», دەپ اۋىز جيىپ ۇلگەرگەنىنشە بولعان جوق, كاحابەر تسحادادزەنىڭ ارشاۆين باستاعان شاكىرتتەرى اينالدىرعان بەس مينۋتتىڭ ىشىندە توپىرلاتىپ ءۇش گول سالدى. ءسويتىپ, كاپيتانسىز ويناسا دا 3:2 ەسەبىمەن جەڭىسكە جەتكەن «قايرات» ازىرگە ءۇشىنشى ورىنىن ساقتاپ قالدى. ال كوش باسىنداعى «استانا» كەرەكۋدەن كەلگەن «ەرتىستىڭ» شاڭىن قاعىپ الدى. بۇعان دەيىن ەكى بىردەي ويىندا تەڭ تۇسكەن تەمىرجولشىلار وسى جەڭىستەن كەيىن جاعدايىن ءتاپ-ءتاۋىر تۇزەپ الدى. ولار ءبىر ويىنىنىڭ كەمدىگىنە قاراماستان, ءوزىن وكشەلەپ كەلە جاتقان «ورداباسىنان» ءتورت ۇپاي ۇزاپ كەتتى. ال وڭتۇستىكقازاقستاندىقتار بولسا, بۇل تۋردا «اتىراۋمەن» تەڭ ءتۇسىپ, ماڭىزدى دەگەن ەكى ۇپايدان ايىرىلىپ قالدى. كوش سوڭىنداعى «شاحتەر» ءۇشىن بۇل تۋر ءساتتى ءوتىپ, كوماندا بيىلعى ماۋسىمداعى ەكىنشى جەڭىسىنە قول جەتكىزدى. كەيىنگى كەزدەسۋلەردە مەرگەندىگىمەن كوزگە ءتۇسىپ جۇرگەن ايدوس تاتتىباەۆ بۇل جولى دا گول سوعىپ, كومانداسىنا جەڭىس سىيلادى. شابۋىلشى سالعان جالعىز دوپ ويىن تاعدىرىن شەشكەن بولاتىن. فۋتبولسۇيەر قاۋىمدى ازۋلى كلۋب «اقتوبەنىڭ» جاعدايى الاڭداتىپ وتىر. اتالعان ۇجىم وسى جولى دا وڭباي ۇتىلدى. «توبىل» سوققان ءۇش گولعا الاڭ يەلەرى ءبىر عانا دوپپەن جاۋاپ بەرە الدى. ون ەكىنشى تۋر «تاراز» ءۇشىن دە ولجالى بولدى. ولار ءوز الاڭىندا سوڭعى تۋرلاردا الا-قۇلا ويناپ جۇرگەن «قايساردى» 2:1 ەسەبىمەن ۇتتى. كۇنى كەشە عانا كوش باستاعان سىر بويىنىڭ كومانداسى سىرعي-سىرعي, بۇل كۇنى تۋرنير كەستەسىنىڭ تۋرا بەلورتاسىنا ءتۇستى. «وقجەتپەس» – «قايرات» – 2:3 (1:0), سترۋكوۆ, 29 (1:0). سترۋكوۆ, 68 (2:0). ارشاۆين, 74 (2:1). يساەل, 75 (2:2). تۇرىسبەك, 79 (2:3). «شاحتەر» – «اقجايىق» – 1:0 (0:0), تاتتىباەۆ, 83 (1:0). «استانا» – «ەرتىس» – 2:0 (1:0), مۇرتازاەۆ, 13 (1:0). جالمۇقان, 79 (2:0). «تاراز» – «قايسار» – 2:1 (0:1), بايجانوۆ, 45+1 (0:1). دياررا, 70 (1:1). تاۋباي, 75 (2:1). «اقتوبە» – «توبىل» – 1:3 (0:1), ششەتكين, 41 (0:1). مالىي, 48 (0:2). دجاليلوۆ, 52 (0:3). مامۋتە, 79 (1:3). «اتىراۋ» – «ورداباسى» – 2:2 (0:1), نوسەرباەۆ, 14 (0:1). ابدراحمانوۆ, 52 (1:1). سالوموۆ, 59 (2:1). نۇرعاليەۆ, 85 – پەنالتيدەن (2:2). سۇرمەرگەندەر اراسىنداعى باسەكەدە 9 گولمەن جەرار گوۋ («قايرات») بۇرىنعىشا توپ باستاپ كەلەدى. ودان كەيىنگى ورىنداعى الەكسەي ششەتكين («توبىل») مەن جۋنيور قابانانگانىڭ («استانا») ەنشىسىندە 6 گولدان بار. كەلەسى, 13-ءشى تۋردىڭ ويىندارى 20 مامىردا وتەدى. بۇل كۇنى كوماندالار مىناداي جۇپ قۇراپ, ءوزارا كىم مىقتىنى انىقتايدى: «اقجايىق» – «استانا», «ەرتىس» – «اتىراۋ», «ورداباسى» – «اقتوبە», «توبىل» – «وقجەتپەس», «قايسار» – «شاحتەر», «قايرات» – «تاراز». ەرتەڭ, ياعني 17 مامىر كۇنى 7-تۋردىڭ كەيىنگە قالدىرىلعان ءبىر ويىنى ءوتىپ, جاسىل الاڭ ۇستىندە «اقتوبە» مەن «اتىراۋ» كۇش سىناسادى.
قايرات ءابىلدينوۆ, «ەگەمەن قازاقستان»