بۇگىنگى تانىمال انشىلەردىڭ «جاس قانات» بايقاۋىندا باعىن سىناماعاندارى كەمدە-كەم بولار؟ جىل سايىن جاڭا ەسىمدەر اشىلىپ جاتادى. ۇمىتتەرىن ۇكىلەگەن تالانتتاردىڭ شوعىرى بيىل دا از بولعان جوق. مامىردىڭ 12−14-ءى ارالىعىندا وتكەن ونەر بايگەسىندە ەلىمىزدىڭ ءتۇرلى وڭىرىنەن كەلگەن 14 ء انشى باق سىنادى.
بايقاۋعا قاتىسۋشىلاردى باعالاپ, ونەرلەرىن تارازىعا سالعان قازىلار القاسىنىڭ قۇرامىندا مەدەۋ ارىنباەۆ, ەرلان كوكەەۆ, نۇرلان ابدۋللين, مارجان اراپباەۆا سىندى ساحنا ساڭلاقتارىمەن بىرگە «استانا وپەرا» تەاترىنىڭ ديريجەرى ابزال مۇحيتدينوۆ, پروفەسسور رايسا مۇساقوجاەۆا, «استانا وپەرا» تەاترىنىڭ باس حورمەيستەرى ەرجان ءداۋىتوۆ بولدى.
«جاس قانات-2017» بايقاۋىنىڭ بيىلعى ءبىر ەرەكشەلىگى – قازىلار القاسى مەن قاتىسۋشىلار اراسىندا ەمىن-ەركىن اڭگىمە بولدى. قاتىسۋشىلارعا سۇراقتار قويىلىپ, كەلەلى كەڭەستەر بەرىلدى. بايگەگە قاتىسقان 14 ۇمىتكەردىڭ 10-ى جارتىلاي فينالعا جولداما العان بولاتىن. ال «جاس قاناتتىڭ» ەڭ جوعارى ماراپاتى «التىن قاناتتى» الۋ جولىندا 5 ۇمىتكەر ساحناعا شىقتى. ولار – تالدىقورعاندىق 18 جاستاعى انەل سمايىلوۆا, پەتروپاۆلدىق 20 جاسار بۇركىت جاناي, وسكەمەندىك «IN CORO» توبى, بايقاۋدىڭ ەڭ جاس قاتىسۋشىسى 15 جاستاعى توميريس جانعازينوۆا جانە 28 جاستاعى پاۆلودارلىق ماديار باحتياروۆ.
ەكى بىردەي ىرىكتەۋدەن وتكەن انشىلەر اراسىنان «التىن قانات» يەگەرىن انىقتاۋ جاۋاپكەرشىلىك جۇكتەيتىنى راس. بەيبىتشىلىك جانە كەلىسىم سارايىندا وتكەن گالا-كونتسەرتتە مەدەۋ ارىنباەۆ باستاعان قازىلار القاسىنىڭ جەڭىمپازدار ەسىمىن جاريالاۋعا اسىقپاعانى دا سوندىقتان. كەش بارىسىندا ولار, ياعني تانىمال انشىلەر جاس ۇمىتكەرلەرمەن بىرگە ونەر كورسەتىپ, باسەكەنىڭ ءدۇبىرىن ارتتىردى. سونىمەن, بيىلعى بايقاۋداعى جەڭىمپازدار قاتارىندا ءۇش ءفيناليستىڭ ەسىمى اتالدى. ءۇشىنشى سىيلىق – «قولا قاناتپەن»– «IN CORO» توبى, ەكىنشى سىيلىق – «كۇمىس قاناتپەن» بۇركىت جاناي ماراپاتتالدى. ال «التىن قاناتتى» پاۆلودارلىق ماديار باحتياروۆ يەلەندى. فينالدا «گۇلستان قازاقستان» ءانىن شىرقاعان ماديار بايقاۋ بارىسىندا اعىلشىن تىلىندە دە, ورىس تىلىندە دە اندەر ورىندادى.
ماديارمەن بايقاۋدان سوڭ از-كەم سويلەسكەن ەدىك. جوسپارلارى تۋرالى بىلگىمىز كەلگەن. پاۆلودار وبلىسى, لەبياجى اۋدانىنىڭ تۋماسى بۇگىندە پاۆلودار قالاسىندا تۇرادى. «Live band Nord Wind» توبىنىڭ ءسوليسى ەكەن. بولاشاقتا مۋزىكالىق ءبىلىم العىسى كەلەدى. بايقاۋدان سوڭ بەلگىلى ءانشى مارجان اراپباەۆا ماديارعا بىرگە ءان جازۋدى ۇسىنىپتى. ول ۇلكەن ساحنالاردى باعىندىرۋعا ارنالعان باسقا دا جوسپارلارى اياسىندا ءالى ەڭبەكتەنە بەرمەك.
ايگۇل سەيىلوۆا, «ەگەمەن قازاقستان»