قۇتتىقتاۋ سوزىندە ول ارداگەرلەرگە قامقورلىق جاساۋ, ولاردىڭ تۇرمىس دەڭگەيىن ارتتىرۋ مەملەكەتتىڭ الەۋمەتتىك ساياساتىنىڭ باستى باسىمدىعىنىڭ ءبىرى بولىپ سانالاتىنىن اتاپ ءوتتى. سونىمەن بىرگە, مەملەكەتتىك حاتشى 2017 جىلعى 1 شىلدەدەن باستاپ پرەزيدەنتتىڭ تاپسىرماسى بويىنشا زەينەتاقى 2016 جىلمەن سالىستىرعاندا 20%-عا وسەتىنىن ايتتى. بۇدان بولەك, نەگىزگى زەينەتاقىنى تاعايىنداۋ جاڭا ادىستەمە بويىنشا جۇزەگە اسىرىلىپ, ونىڭ مولشەرى زەينەتاقى جۇيەسىنە قاتىسۋ وتىلىنە بايلانىستى بولماق. بۇل شارالار 2018 جىلى نەگىزگى زەينەتاقى كولەمىن 2017 جىلمەن سالىستىرعاندا 1,8 ەسە ۇلعايتۋعا مۇمكىندىك بەرەدى. مەملەكەتتىك حاتشى رەسپۋبليكالىق بىرلەستىكتىڭ قازاقستان رەسپۋبليكاسىنىڭ قالىپتاسۋى مەن دامۋىنا قوسقان ۇلەسىنە ەرەكشە توقتالدى. ءسوزىنىڭ سوڭىندا ەل پرەزيدەنتىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىندا قويىلعان مىندەتتەردى ىسكە اسىرۋعا ارداگەرلەر بەلسەندى تۇردە اتسالىساتىنىنا سەنىم ءبىلدىردى. قۇتتىقتاۋ سوزىنەن كەيىن مەملەكەتتىك حاتشى ءبىر توپ ارداگەرگە ەلباسىنىڭ العىس حاتىن تاپسىردى. قازاقستان ارداگەرلەر ۇيىمى 1987 جىلدىڭ 21 ناۋرىزىندا قۇرىلعان. بىرلەستىك قۇرامىندا 1 ميلليون 845 مىڭ سوعىس جانە ەڭبەك ارداگەرلەرى بار. حالىق قاھارمانى جانە قازاقستاننىڭ ەڭبەك ەرى اتاقتارىنىڭ 17 يەگەرى, ەكى كەڭەس وداعىنىڭ باتىرى, سونداي-اق, 115 سوتسياليستىك ەڭبەك ەرى ۇيىمنىڭ ماقتانىشتارى بولىپ سانالادى. سالتاناتتى جيىندا پارلامەنت ءماجىلىسىنىڭ دەپۋتاتى, قازاقستان ارداگەرلەر ۇيىمى ورتالىق كەڭەسىنىڭ توراعاسى باقتىقوجا ىزمۇحامبەتوۆ بايانداما جاسادى. باياندامادا ەلباسىنىڭ «ەگەمەن قازاقستان» گازەتىندە جاريالانعان «بولاشاققا باعدار: رۋحاني جاڭعىرۋ» باعدارلامالىق ماقالاسىندا كورسەتىلگەن ماسەلەلەرگە باسىمدىق بەرىلدى جانە ونى جۇزەگە اسىرۋدا اعا بۋىن ارداگەرلەردىڭ الاتىن ورنى اتاپ ءوتىلدى. «وركەنيەتتىڭ جەدەل دامۋى زامانىندا, رۋحاني جاڭعىرۋلاردا ءبىزدىڭ ارداگەرلەرىمىز دە باسەكەگە قابىلەتتى بولۋى كەرەك, − دەدى ب.ىزمۇحامبەتوۆ. – بولاشاق جاستاردىكى دەيمىز, ءبىزدىڭ جاستارىمىز وتە ءبىلىمدى, ۇشقىر ويلى جانە بىرنەشە ءتىلدى مەڭگەرگەن. وسىنداي وزىق ويلى جاستارعا اقىل-كەڭەس بەرۋ ءۇشىن وركەنيەتتىڭ جاڭالىقتارىنان حاباردار بولۋىمىز قاجەت. ول ءۇشىن العاشقى قادامدار قولعا الىندى. قازىر پاۆلودار, اتىراۋ وبلىستارىندا «جاس وتان» جاستار قاناتىنىڭ بەلسەندىلەرى ارداگەرلەردى كومپيۋتەرلىك كۋرستاردا ينتەرنەتتى يگەرۋگە ۇيرەتۋدە. بۇل يگى باستاما وزگە وبلىستاردا دا جالعاسىن تابادى دەپ سەنەمىز. ءبىز بابالارىمىزدان ميراس بولعان ۇلتتىق پراگماتيزم, ىزگى قاسيەتتەردى تۇلەتىپ, كەرتارتپا قاعيدالاردىڭ الدىن الۋدىڭ جولدارىن تابۋىمىز كەرەك». بۇدان سوڭ شەشەن جاستاردى تاربيەلەۋ ماسەلەسىنە توقتالدى. ونىڭ توقتالعانىنداي ىسىراپشىلدىق پەن استامشىلدىققا, داڭعويلىققا جول بەرمەي, جاس ۇرپاقتى بارىنشا قاراپايىمدىلىق پەن قايىرىمدىلىققا, ۇنەمشىلدىككە تاربيەلەۋگە جول كورسەتۋ كەرەك. ۇلتتىق بولمىسىمىزدىڭ وزەگىن ساقتاي وتىرىپ, ۇلتتىق سالت-ءداستۇرىمىزدى جاڭعىرتۋ, بولاشاق ۇرپاقتىڭ بويىنا ۇلتتىق رۋحتى ءسىڭىرۋ ارداگەرلەردىڭ الدىنداعى باستى مىندەت. اعا بۋىننىڭ الدىندا ءوز ۇلتتىق مادەنيەتىمىز بەن ۇلتتىق بولمىسىمىزدى ساقتاۋدىڭ ءتيىمدى ۇلگىلەرىن قاراستىرىپ, جاڭاشا ويلاپ, جاقسى مەن جاماندى سارالاپ, زامان تالابىنا ءبىلىمدى, جاس ۇرپاققا پايدالى جانە تۇسىنىكتى جەتكىزۋ مىندەتى تۇر. «ورتالىق كەڭەس پرەزيدەنتىمىزدىڭ ماقالادا ايتقان تاپسىرمالارىن ەسكەرىپ, جاڭا باستامالارعا ۇيىتقى بولۋى كەرەك, – دەدى ول ءارى قاراي. – ول ءۇشىن ەلگە بەلگىلى قوعام قايراتكەرلەرى باس بولىپ, اتادان بالاعا ميراس بولىپ كەلە جاتقان ۇلتتىق جادىگەرلەرىمىز – سالت-ءداستۇرىمىزدى دارىپتەۋ, وتباسى قۇندىلىقتارىنا باسا نازار اۋدارۋ, ءتىلىمىز بەن ءدىنىمىزدى, مادەنيەتىمىزدى قۇرمەتتەۋ باعىتىندا اۋقىمدى جۇمىستاردى قولعا الماقپىز. ءبىز بۇل جۇمىستاردى قالاي ۇيىمداستىراتىنىمىزدى شەشتىك. وعان تانىمال مەملەكەت جانە قوعام قايراتكەرلەرى تارتىلادى. ولار ورتالىق كەڭەس جانىنداعى تۇراقتى كوميسسيالارمەن بىرىگىپ, ءۇش باعىتتا جۇمىس ىستەيدى». بايانداماشى ونىڭ ارقايسىسىنا جەكە توقتالدى. ءبىرىنشى باعىت – ء«داستۇر مەكتەبى»: ۇلتتىق بىرەگەيلىكتى ساقتاۋ, سالت داستۇردەگى ومىرلىك, تاربيەلىك ءمانى زور قاعيدالاردى دارىپتەۋ. ەكىنشى باعىت – «التىن ۇيا» مەكتەبى: اكە تاربيەسى, انا تاربيەسى, جاستارعا وتباسى قۇندىلىقتارىن قۇرمەتتەۋ تۋرالى باعىت-باعدار كورسەتىپ وتىرۋ. ءۇشىنشى باعىت – «اعانىڭ اقىلى» مەكتەبى: وتانسۇيگىشتىككە, پاتريوتتىققا تاربيەلەۋ, جەرشىلدىك, تامىر-تانىستىقتىڭ زياندى جاقتارىنان جاستاردى ساقتاندىرۋ. «مۇنداعى ماقساتىمىز, دەپ جالعاستىردى ءسوزىن ب.ىزمۇحامبەتوۆ. – ەلباسىنىڭ «بولاشاققا باعدار: رۋحاني جاڭعىرۋ» ماقالاسىندا ايتىلعان ويلاردى ءىس جۇزىندە ناقتى جۇزەگە اسىرۋ. ونىڭ ومىرشەڭدىگىن, ءبىزدىڭ قوعام ءۇشىن پايدالىلىعىن كورسەتۋ. ءبىز ءححى عاسىردا الدىڭعى قاتارلى وزىق ەلدەردىڭ قاتارىنا قوسىلۋ ءۇشىن ۇلتتىق قۇندىلىقتارىمىزدىڭ اسىلدارىن تەرىپ, جاس ۇرپاقتىڭ بويىنا سىڭىرە بىلگەنىمىز ءجون. قازىرگى تاڭدا اعا ۇرپاقتىڭ الدىندا تۇرعان باستى مىندەت – وسى. سونىمەن قاتار «قازاقستانداعى 100 جاڭا ەسىم» جوباسىنان ەل ەكونوميكاسىنىڭ دامۋىنا زور ۇلەس قوسقان, ماقتان ەتۋگە تۇراتىن, تاۋەلسىزدىك جىلدارىندا تابىسقا جەتكەن ارداگەرلەرىمىز دە سىرت قالماۋى ءتيىس». سالتاناتتى جيىندا پارلامەنت ءماجىلىسىنىڭ توراعاسى نۇرلان نىعماتۋليننىڭ قۇتتىقتاۋىن ءماجىلىس دەپۋتاتى ماۋلەن اشىمباەۆ وقىپ بەردى. ال ۇكىمەت مۇشەلەرى اتىنان ءسوز العان ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا اعا بۋىن ارداگەرلەردى الەۋمەتتىك قورعاۋ سالاسىندا قولعا الىنىپ جاتقان اۋقىمدى جۇمىستارمەن تانىستىردى. ءوز كەزەگىندە ارداگەرلەر ەلباسىنا ۇدايى كورسەتىپ كەلە جاتقان قامقورلىعى ءۇشىن العىس ايتتى. ولار قازاقستاندا سالتانات قۇرعان بەيبىتشىلىك, بىرلىك پەن كەلىسىم ءۇشىن مەملەكەت باسشىسىنىڭ كورەگەن ءارى سىندارلى ساياساتىن ءبىراۋىزدان قولدايتىنىن جەتكىزدى.