ەل تاۋەلسىزدىگىنىڭ 20 جىلدىعى قارساڭىندا ەلباسى ن.نازارباەۆتىڭ ۇيعارىمىمەن كوك تۇرىكتەردىڭ التىن بەسىگى – كونە, كيەلى دە قاسيەتتى ءور التايدا وسىنداي تاقىرىپپەن حالىقارالىق عىلىمي-تاجىريبەلىك كونفەرەنتسيا تۇڭعىش رەت وتپەك.
كەشە وسكەمەندەگى ءباسپاسوز كلۋبىندا – تۇركسوي-دىڭ قازاقستانداعى وكىلى اسقار تۇرعانباەۆ, شىعىس قازاقستان وبلىستىق مادەنيەت باسقارماسىنىڭ باستىعى جاقسىلىق ومار, قىرعىزستان جانە رەسەيدەن كەلگەن فوتوجۋرناليستەردىڭ قاتىسۋىمەن ءباسپاسوز ءماسليحاتى بولىپ ءوتتى.
– تاۋەلسىزدىك العالى «التاي – تۇركى الەمىنىڭ التىن بەسىگى» اتتى حالىقارالىق كونفەرەنتسيا تۇڭعىش رەت ءوتىپ وتىر. مۇنىڭ الدىندا تاتارستان, باشقۇرتستان, باسقا دا بىرقاتار مەملەكەتتەردە وسىنداي ماڭىزدى شارالار بولعانى بەلگىلى. ءبىرىنشى كەزەڭدە شەتەلدەردەن كەلگەن ون فوتوجۋرناليست التايدى ارالاپ, ءتۋريزمدى دامىتۋ, كونە قورعاندار مەن وبالار, تاريحي جەرلەردى سۋرەتكە ءتۇسىرىپ, سوڭىنان وسكەمەندە فوتوكورمە ۇيىمداستىرادى. 26 تامىزدا ورتالىق مادەنيەت ءۇيىندە حالىقارالىق كونفەرەنتسيا ءوز جۇمىسىن باستايدى. وعان اقش, جاپونيا, وڭتۇستىك كورەيا, قىرعىزستان, رەسەيدەگى ءتۇركى تىلدەس مەملەكەتتەردىڭ عالىمدارى مەن تاريحشىلارى قاتىسىپ, پىكىر الماسادى. شىعىس قازاقستان وبلىسىنىڭ اكىمى بەردىبەك ساپارباەۆ پەن شەتەلدەردەن كەلگەن رەسمي وكىلدەر ءتۋريزمدى دامىتۋ, التايدىڭ عالامات تابيعاتىن زەرتتەۋ جونىندەگى مەموراندۋمعا قول قويماق. ال ءۇشىنشى كەزەڭدە ءور التايدىڭ تورىندەگى بەرەلدە 12 مەملەكەتتەن كەلگەن انشىلەر ءوز ونەرلەرىن ورتاعا سالادى. بۇل جەرگە 12 كيىز ءۇي تىگىلىپ, قازاقتىڭ ۇلتتىق سپورت ويىندارى قوناقتار نازارىنا ۇسىنىلادى. سونداي-اق, حالقىمىزدىڭ تۇساۋكەسەر, سۇندەتكە وتىرعىزۋ, توقىم قاعۋ, باسقا دا ۇلتتىق داستۇرىنەن كورىنىستەر كوپشىلىكتى قىزىقتىرماق. سول كۇنى بەرەلدە بال جانە قىمىز ءجارمەڭكەسى وتەدى, – دەدى جاقسىلىق ومار.
وڭداسىن ەلۋباي,
شىعىس قازاقستان وبلىسى.