UAE SWAT Challenge-2026 حالىقارالىق جارىسى قازاقستان ءۇشىن تولايىم تابىس, جارقىن جەڭىستەرمەن قورىتىندىلاندى. ارنايى جاساقتار اراسىنداعى «وليمپياداعا» بالانعان دودا بيىل دۋبايدا ءوتتى. قاجىرلى قايرات, تەمىردەي ءتارتىپ, قۇرالايدى كوزگە اتقان مەرگەندىك, جاۋىنگەرلىك قابىلەت سىنالاتىن سىنعا ەلىمىز 5 قۇراما قوستى. تورتكۇل دۇنيە كوز تىككەن حالىقارالىق جارىستىڭ 5 كۇنىندە ەل اسكەريلەرى قازاق ساربازىنا ءتان سايىپقىراندىقپەن توسقاۋىلداردى ەركىن ەڭسەردى. الەمنىڭ 48 ەلىنەن 100-دەن استام كوماندا جينالعان ءدۇبىرلى دودادا KAZAKHSTAN س قۇراماسى ءابساليۋتتى چەمپيون اتانسا, ا توبى ەكىنشى ورىنعا تابان تىرەدى. «توميريس» قىزدار قۇراماسى ەرلەرمەن يىق تىرەستىرە سايىسقا ءتۇسىپ, الەمنىڭ ۇزدىك 20 قۇراماسى ساپىنان تابىلدى, دەپ جازادى Egemen.kz.
ەلدىڭ اتىن شىعارعان ەرلەردىڭ ەرلىگى – مەملەكەتىمىز ءۇشىن ماڭىزدى بەلەس. قازاقستان جاساعىنىڭ قاجىرلى قايراتى مەن ءور رۋحىن, تاپتىرماس تاكتيكالىق ازىرلىگىن پرەزيدەنت قاسىم-جومارت توقاەۆ تا جوعارى باعالادى. ەل مەرەيىن بيىكتەتكەن قۇراما قاتارىندا «بۇركىت» ارنايى ماقساتتاعى بولىمشەسىنىڭ قىزمەتكەرى يسلام دا بار. بۇركەنىش ەسىمىن «تەمىر» دەپ تاڭداعان سنايپەر KAZAKHSTAN ا ساپىندا سايىس بارىسىندا 2 رەت رەكورد ورناتىپ كوزگە ءتۇستى. اسكەريلەر اراسىندا ەكىنىڭ ءبىرىنىڭ ۋىسىنا تۇسپەيتىن «كۇرەڭ بەرەت» يەگەرى دايىندىق بارىسى مەن الپاۋىتتار اراسىندا العا جەتەلەگەن كۇش تۋرالى بىزگە اڭگىمەلەپ بەردى.
– يسلام, UAE SWAT Challenge-2026 حالىقارالىق جارىسىنداعى جەڭىس قۇتتى بولسىن! دۋبايداعى دودانىڭ قازاقستان قۇراماسى ءۇشىن ماڭىزى قانداي بولدى؟
– كەز كەلگەن ەل ءۇشىن ايبىندى اسكەر – قاۋىپسىزدىك پەن تاۋەلسىزدىك تىرەگى. ءبىزدىڭ ەلىمىز اسكەريلەردىڭ ءال-اۋقاتىن جاقسارتۋ, تەحنيكالىق-بازالىق قاجەتتىلىكتەرمەن قامتۋ, اسكەري جۇيەگە زاماناۋي تەحنولوگيالاردى ەنگىزۋ ماسەلەسىنە بايىپپەن قاراپ, ءاردايىم قولداۋ كورسەتىپ وتىرادى. جاھاندا گەوساياسي احۋال قۇبىلىپ تۇرعان بۇگىنگى كەزەڭدە كۇشتىك قۇرىلىمنىڭ جاۋىنگەرلىك ازىرلىگى مەن ماتەريالدىق بازانىڭ جوعارى دەڭگەيدە بولۋى ماڭىزدى. ءبىز, الدىمەن وسى ماقساتتا تىنىمسىز تەر توگەمىز. ال حالىقارالىق ارەنادا مەملەكەتىمىزدىڭ اسكەري قۇرىلىمىنىڭ دايارلىعىن لايىقتى دەڭگەيدە پاش ەتە الۋ – جاۋاپتى مىندەت. سوندىقتان دۇنيەنىڭ ءار بۇرىشىنان جينالعان ارنايى جاساق باس قوساتىن SWAT Challenge-دەرى – قانىمىزدا بار جاۋىنگەرلىك رۋحتى دالەلدەيتىن الاڭ. سونداي-اق تاجىريبە الماسىپ, قارىم-قابىلەتىمىزدى باعامدايتىن جارىس بولعاندىقتان ەل نامىسىن ابىرويمەن قورعاۋعا كۇش سالدىق.
– الەم جۇرتشىلىعىنىڭ جانارى اۋعان باسەكەگە ىرىكتەۋ قالاي ءوتتى, دايىندىق بارىسى قالاي ۇيىمداستىرىلدى؟
– حالىقارالىق دودا بولعاندىقتان قۇراما قاتارىنا قازاقستانىمىزدىڭ قاۋقارىن شىنايى كورسەتە الاتىن وكىلدىڭ قاجەت ەكەنى ايدان انىق. وسى ميسسيا نەگىزىندە قۇرامانى ىرىكتەۋ جارتى جىل بۇرىن ءوتتى. الدىن الا ارنايى ازىرلەنگەن تاپسىرمالاردان توسىلماي وتكەن, شەبەرلىگىمەن كوزگە تۇسكەن ەڭ مىقتى جىگىتتەر قاتارعا قوسىلدى. ال دايىندىق جۇيەلى جوسپار نەگىزىندە ءوربىدى. نۇسقاۋشىلار فيزيكالىق, اتىس جانە تاكتيكالىق دايارلىق تۇرعىسىنان قابىلەتىمىزدى شىڭدادى. ءار اسكەريدىڭ قاۋقارىن جەكە باعالاپ, ولقى تۇستارىن وڭالتۋعا كۇش سالدى. جىلدامدىقتى جەتىلدىرۋگە ارنالعان جاتتىعۋلار جيىنى ۇسىنىلىپ, نىسانا كوزدەۋ بويىنشا دا دالدىك شەبەرلىگىمىزدى ارتتىرۋعا كوڭىل ءبولىندى. دايىندىق بارىسىندا نۇسقاۋشىلار ءار سىرعىعان سەكۋندتى ءوز پايدامىزعا اسىرۋدى ۇيرەتتى. ناتيجە ايقىنداعانداي, تياناقتى دايىندىق اقتالىپ قانا قويماي, قازاقستان قارۋلى كۇشتەرىنىڭ اسكەري-تاكتيكالىق ازىرلىگى حالىقارالىق ستاندارتتارعا ساي ەكەنى ايقىندالدى.
– كەز كەلگەن كوماندالىق سىندا جەڭىس تۇعىرىنان تابىلۋ ءۇشىن قۇراما مۇشەلەرىنىڭ ازىرلىگىمەن قاتار مىندەتتەردى ءوزارا ءبولىسۋ, تاپسىرمانى تاۋسىلا ورىنداۋ ماقساتى ورىندالۋى كەرەك ەكەنى تۇسىنىكتى. KAZAKHSTAN س قۇراماسىندا اتالعان فۋنكتسيالار قالاي جىكتەلدى؟ توپتى جەڭىسكە جەتەلەگەن ۇستانىمدى ايتىپ بەرىڭىزشى.
– دۇرىس ايتاسىز, جەڭىس جۇيەلى جوسپار ساتىمەن, ساپالى ورىندالعاندا عانا قانجىعاعا تۇسەدى. ءبىزدىڭ قۇراما مىندەتتەردى دايىندىق بارىسىندا-اق قامدادى. مەرگەن جانە شابۋىلشى مىندەتى اسكەريدىڭ قىزمەت ەتىپ جۇرگەن لاۋازىمىنا سايكەس ءبولىندى. ال كىمنىڭ, قانداي تاپسىرمانى ورىندايتىنى دايىندىق كەزىندە ءار ادامنىڭ مۇمكىندىگىنە قاراي جۇكتەلدى. مەنىڭشە, ءبىزدىڭ توپتىڭ جەڭىسكە جەتۋىنە فيزيكالىق جانە فۋنكتسيونالدىق دايىندىقتىڭ جوعارى دەڭگەيدە بولۋى سەپتەستى. سونداي-اق پسيحولوگيالىق تۇراقتىلىق پەن كاسىبي شەبەرلىك, كوماندا مۇشەلەرى اراسىنداعى سەنىمدى تاكتيكالىق ۇيلەسىمنىڭ ۇلەسى دە جەڭىس ءۇشىن ماڭىزدى مانگە يە. قۇراما اراسىنداعى جانكەشتىلىك, ءبىرىن-ءبىرى ءسوزسىز ءتۇسىنۋ, قولداۋ, ەلىمىزدىڭ كوك بايراعىن الەمدىك ارەنادا جەتىلدىرۋگە دەگەن قۇلشىنىس تا ۇزدىك ناتيجەگە جەتەلەدى دەپ ويلايمىن.
– جارىستىڭ ءسىز ءۇشىن كۇردەلى بولعان تۇسى مەن جارقىن ساتتەرى تۋرالى پىكىرىڭىزدى دە بىلگىمىز كەلەدى...
– جاسىراتىنى جوق, سايىس بارىسىندا قاۋىپتى جاتتىعۋلار بولدى. توپ مۇشەلەرى ءوز مىندەتىن مۇلتىكسىز اتقارا العانىنىڭ ارقاسىندا مۇنداي ساتتەردى ەڭسەرە بىلدىك. KAZAKHSTAN س ساپىندا ءۇشىن جارىستىڭ ەكىنشى كۇنىندەگى تاپسىرمالاردى 2 مينۋتتا ورىنداپ, رەكوردتىق ۋاقىت كورسەتكىشىمەن مارەگە جەتۋىمىز ەستەن كەتپەس ادەمى اسەر سىيلادى. سونداي-اق سايىس بارىسىندا 18 سەكۋند ىشىندە 5-قاباتقا كوتەرىلىپ, نىسانانى جويعانىم, ءوز كەزەگىندە بۇل ناتيجە توبىمىزدىڭ جەڭىسكە جەتۋىنە ەلەۋلى ۇلەس قوسقانى قۋانتادى.
– ارنايى جاساقتار اراسىندا وتەتىن «وليمپياداعا» تەڭەلگەن بۇل باسەكەدە باستى قارسىلاستارىڭىز قاي مەملەكەتتەر بولدى؟
− باسەكە بار جەردە ناتيجە دە جاقسارا تۇسەدى. سوندىقتان مەن باسەكە ۇعىمىنىڭ جاعىمدى تۇستارىن قاپەرگە الامىن. باسەكەلەسۋ كوماندانى ءوزارا ۇيىستىرىپ, ماقساتقا ءبىر باعىتتا قاراۋعا مۇمكىندىك بەرەدى. ال UAE SWAT Challenge-2026 حالىقارالىق جارىسىندا قىتاي حالىق رەسپۋبليكاسىنان كەلگەن ارنايى جاساق ەرەكشە قابىلەتتىلىگىمەن نازارىمىزدى اۋداردى. سوندىقتان وسى ەلدەن كەلگەن قۇراما لايىقتى قارسىلىق كورسەتتى. جارىس قورىتىندىسى بويىنشا اتالعان قۇرامادان وزىپ, ەكىنشى ورىنعا تۇراقتادىق. قىتاي ارنايى جاساعى ۇزدىك ۇشتىكتى تۇيىندەدى.
– ال جەڭىسكە جەتكەندەگى كۇيىڭىز بەن اسەرىڭىز قانداي بولدى؟
– جەڭىسكە جەتكەندەگى اسەردى سوزبەن جەتكىزۋ مۇمكىن ەمەس. ەڭ الدىمەن, ەلىمىزدىڭ ابىرويىن اسقاقتا العانىمىز ءۇشىن كەۋدەمدى ماقتانىش كەرنەدى. بۇل عاجايىپ ءساتتىڭ ارتىندا ۋاقىتپەن ساناسپاي جاسالعان ازىرلىك, ەڭبەك جانە ماڭداي تەر تۇر. ءبىز كاسىبي قىزمەتىمىزدى اتقارا ءجۇرىپ, حالىق پەن مەملەكەت باسشىسىنىڭ ءۇمىتىن اقتاي الدىق. وسى سەزىم جانىمىزدى جادىراتتى.
– 16 اقپان كۇنى پرەزيدەنت قاسىم-جومارت توقاەۆ UAE SWAT Challenge-2026 حالىقارالىق جارىسىنان جۇلدەلى ورالعان كوماندالاردى اقوردا رەزيدەنتسياسىندا قابىلداپ, سالتاناتتى تۇردە ماراپاتتادى. جوعارى دەڭگەيدەگى قولداۋدى سەزىنە الدىڭىزدار ما, سونداي-اق مەملەكەت باسشىسى الدا تاعى قانداي مىندەتتەر جۇكتەدى؟
− پرەزيدەنتىمىز وتكەن جىلى ناتيجەنى جاقسارتا ءتۇسۋدى تاپسىرعان. ءبىز جۇكتەلگەن تاپسىرما ۇدەسىنەن شىعا بىلدىك. ال اتالعان راسىمدە پرەزيدەنت «جاۋىنگەرلىك ەرلىگى ءۇشىن» مەدالىن كەۋدەمىزگە تاقتى. ەڭبەكتىڭ ەلەنگەنى كىمدى دە بولسىن شابىتتاندىرادى. ال پرەزيدەنتتىڭ قولىنان ماراپات الۋ – اسا زور مارتەبە. ءبىز ءوز كەزەگىمىزدە دۋباي تورىندە ولجالاعان كۋبوكتى مەملەكەت باسشىسى قاسىم-جومارت توقاەۆقا تابىستادىق. سونداي-اق جوعارى قولداۋدى سەزىنىپ, كەلەر جىلعى ماقساتىمىزدى تاعى ءبىر رەت شەگەلەدىك. اسىلىندا, چەمپيون بولۋ مەن چەمپيوندىق اتاقتى قورعاپ قالۋ تاباندىلىقتى تالاپ ەتەدى. كەلەر جىلى بيىلعى جەڭىستىڭ كەزدەيسوق بۇيىرماعانىن, ناعىز چەمپيون اتاعىنا لايىق ەكەنىمىزدى دالەلدەۋ مىندەتى تۇر.
– اڭگىمەڭىزگە راقمەت!