اتىراۋ وبلىسىندا ورتا مەكتەپتىڭ ەكى تۇلەگى وقۋدى ۇزدىك اياقتاعان. الايدا مۇعالىمدەر تۇلەكتەردىڭ باعالارىنا تۇزەتۋلەر ەنگىزىپتى. ءبىلىم باسقارماسىنىڭ كوميسسياسى پەداگوگتەردىڭ تۇزەتۋلەرىنە سۇيەنىپ, تۇلەكتەرگە «التىن بەلگى» بەرۋدەن باس تارتقان, دەپ حابارلايدى Egemen.kz.
وبلىستىق سوتتىڭ ءباسپاسوز قىزمەتىنىڭ اقپاراتىنا قاراعاندا, مەكتەپ تۇلەكتەرىنىڭ زاڭدى وكىلدەرى كوميسسيانىڭ بۇل شەشىمىمەن كەلىسپەي, سوتقا جۇگىندى.
«مامانداندىرىلعان اۋدانارالىق اكىمشىلىك سوتىندا ءىس ماتەريالدارى قارالدى. تالاپ قويۋشىلاردىڭ 5-11-سىنىپتار ارالىعىندا بارلىق ءپان بويىنشا جىلدىق, توقساندىق جانە قورىتىندى باعالارى ۇزدىك بولىپ, قورىتىندى اتتەستاتتاۋدان ءساتتى وتكەن. بۇل «التىن بەلگى» الۋ تالاپتارىنا سايكەس كەلەدى. باعالاردى قويۋ, وزگەرتۋ جانە تۇزەتۋ تەك پەداگوگتەردىڭ قۇزىرەتى مەن جاۋاپكەرشىلىگىنە عانا قاتىستى. وسىعان بايلانىستى وقۋشىلار مۇعالىمدەر تاراپىنان بولۋى مۇمكىن قاتەلىكتەر نەمەسە پروتسەستىك بۇزۋشىلىقتار ءۇشىن جاۋاپتى بولماۋى ءتيىس, مۇنىڭ تەرىس سالدارى بولۋى مۇمكىن ەمەس. ءبىلىم باسقارماسىمەن اكىمشىلىك سوت ءىسىن جۇرگىزۋدىڭ بازالىق قاعيداتتارى, ونىڭ ىشىندە سەنىم قۇقىعىن قورعاۋ, ادىلدىك جانە مولشەرلەستىك قاعيداتتارى بۇزىلعان. ويتكەنى تەرىس سالدارلار تۇلەكتەرگە ولاردىڭ كىناسىنسىز جانە ولاردىڭ تاراپىنان دالەلدەنگەن بۇزۋشىلىقسىز جۇكتەلدى», دەپ حابارلادى سوتتىڭ ءباسپاسوز قىزمەتى.
اتىراۋ وبلىسىندا مەكتەپ بىتىرەتىن 222 تۇلەك «التىن بەلگى» الۋى مۇمكىن
سوت ءىستى قاراۋ كەزىندە ءبىلىم جانە عىلىم ءمينيسترىنىڭ بۇيرىعىنىڭ ەرەجەلەرىن ەسكەردى. سوعان سايكەس مودەراتسيا ءراسىمى وقۋشىلاردىڭ وقۋ جەتىستىكتەرىن باعالاۋ بويىنشا داۋلى ماسەلەلەر بولعان كەزدە عانا قولدانىلادى. بۇل جاعدايدا مۇنداي داۋلى ماسەلەلەر بولماعان.
«التىن بەلگى» يەگەرلەرىنىڭ 23 پايىزعا جۋىعى ۇستاز ماماندىعىن تاڭداعان
«️سوت پەداگوگتەر ەنگىزگەن تۇزەتۋلەرگە نەگىزدەلگەن كوميسسيا شەشىمىن زاڭ تالاپتارىنا قايشى دەپ تانىدى. مەكتەپ بىتىرۋشىلەرگە قاتىستى كوميسسيا وتىرىسىنىڭ داۋلى حاتتاماسىنىڭ كۇشىن جويدى. ءبىلىم باسقارماسىنا «التىن بەلگى» بەرۋ تۋرالى ماسەلەنى قايتا قاراۋدى مىندەتتەدى. ️اتىراۋ وبلىستىق سوتى بۇل شەشىمدى وزگەرىسسىز قالدىردى», دەپ ءمالىم ەتتى سوتتىڭ ءباسپاسوز قىزمەتى.
«التىن بەلگىگە» ۇمىتكەرلەر كوبەيدى