مەملەكەت باسشىسى «سامۇرىق-قازىنا» ۇلتتىق ءال-اۋقات قورىنىڭ بىرقاتار ەنشىلەس قۇرىلىمدارىنىڭ اكتسيالار پاكەتىن سالالىق مينيسترلىكتەرگە سەنىمدى باسقارۋعا بەرىلۋىن قامتاماسىز ەتۋ تۋرالى ۇكىمەتكە تاپسىرما بەردى.
«قازاقستان رەسپۋبليكاسىنىڭ مەملەكەتتىك باسقارۋ جۇيەسىن ءارى قاراي جەتىلدىرۋ جونىندەگى شارالار تۋرالى» جارلىققا مەملەكەت باسشىسى 10 تامىزدا قول قويدى.
اتاپ ايتقاندا, «دامۋ» كاسىپكەرلىكتى دامىتۋ قورى» اكتسيونەرلىك قوعامى اكتسيالارىنىڭ پاكەتى ەكونوميكالىق دامۋ جانە ساۋدا مينيسترلىگىنە; «قازاقستاننىڭ دامۋ بانكى» اكتسيونەرلىك قوعامى اكتسيالارىنىڭ پاكەتى يندۋستريا جانە جاڭا تەحنولوگيالار مينيسترلىگىنە; «قازاقستان ينۆەستيتسيالىق قورى» اكتسيونەرلىك قوعامى اكتسيالارىنىڭ پاكەتى يندۋستريا جانە جاڭا تەحنولوگيالار مينيسترلىگىنە; «Kazyna Capital Management» اكتسيونەرلىك قوعامى اكتسيالارىنىڭ پاكەتى يندۋستريا جانە جاڭا تەحنولوگيالار مينيسترلىگىنە; «قازەكسپورتگرانت» ەكسپورتتىق-كرەديتتىك ساقتاندىرۋ كومپانياسى» اكتسيونەرلىك قوعامى اكتسيالارىنىڭ پاكەتى يندۋستريا جانە جاڭا تەحنولوگيالار مينيسترلىگىنە سەنىمگەرلىك باسقارۋعا بەرىلدى.
وسى جارلىقپەن ۇكىمەتكە سونداي-اق, «سترەستى اكتيۆتەر قورى» اكتسيونەرلىك قوعامىنىڭ اكتسيالار پاكەتىن يەلەنۋ جانە پايدالانۋ قۇقىقتارىن ەكونوميكالىق دامۋ جانە ساۋدا مينيسترلىگىنە; «قازاقستاننىڭ تۇرعىن ءۇي قۇرىلىس جيناق بانكى», «يپوتەكالىق كرەديتتەرگە كەپىلدىك بەرۋدىڭ قازاقستاندىق قورى», «قازاقستاندىق يپوتەكالىق كومپانيا» يپوتەكالىق ۇيىمى» اكتسيونەرلىك قوعامدارى اكتسيالارىنىڭ پاكەتتەرىن يەلەنۋ جانە پايدالانۋ قۇقىقتارىن قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى اگەنتتىگىنە بەرىلۋىن قامتاماسىز ەتۋ مىندەتتەلدى.
جارلىق قول قويىلعان كۇننەن باستاپ كۇشىنە ەندى.