استاناداعى ۇلتتىق اكادەميالىق كىتاپحانادا ءتىل ءبىلىمى سالاسىنىڭ وزەكتى ماسەلەلەرىنە ارنالعان عىلىمي-پراكتيكالىق دوڭگەلەك ۇستەل ءوتتى. سونداي-اق جيىندا اكادەميك شورا سارىباەۆتىڭ عىلىمي ەڭبەكتەرى كوپشىلىككە تانىستىرىلدى.
دوڭگەلەك ۇستەلگە مەملەكەت جانە قوعام قايراتكەرلەرى, كورنەكتى عالىمدار, عىلىمي ۇيىمدار مەن جوعارى وقۋ ورىندارىنىڭ وكىلدەرى قاتىستى. جيىندا ۇلتتىق اكادەميالىق كىتاپحانا باسشىسى كۇمىس سەيىتوۆا مەن عىلىم جانە جوعارى ءبىلىم مينيسترلىگى ءتىل ساياساتى كوميتەتىنىڭ توراعاسى ەربول تىلەشوۆ قۇتتىقتاۋ ءسوز سويلەسە, اكادەميك كارىمبەك قۇرماناليەۆ «اكادەميك شورا سارىباەۆتىڭ 100 جىلدىعىنا وراي اتقارىلعان شارالاردىڭ قورىتىندىلارى», احمەت بايتۇرسىن ۇلى اتىنداعى ءتىل ءبىلىمى ينستيتۋتىنىڭ ديرەكتورى, پروفەسسور انار فازىلجان «شورا سارىباەۆ. قازاق ءتىلتانىمىنىڭ وزەكتى ماسەلەلەرى» كىتابى تۋرالى, ال پروفەسسور تىنىشتىق ەرمەكوۆا «عالىم. عىلىم. عيبرات» جيناعى جايىندا بايانداما جاسادى.
سونىمەن قاتار ءتىل ءبىلىمى ينستيتۋتى دايىنداعان «قازاق ءتىلتانىمىنىڭ وزەكتى ماسەلەلەرى» قوس تومدىعى مەن حالىقارالىق «قازاق ءتىلى» قوعامىنىڭ باستاماسىمەن جارىق كورگەن «عالىم. عىلىم. عيبرات» جيناعى, كوپشىلىك نازارىنا ۇسىنىلىپ, كىتاپحانا قورىنا تاپسىرىلدى. اتالعان كىتاپتاردا عالىمنىڭ ديالەكتولوگيا, لەكسيكولوگيا, ءتىل تاريحى, گرامماتيكا, تەرمينولوگيا, ەملە, ستيليستيكا, ت.ب. سالالارداعى عىلىمي مۇراسى جۇيەلەنگەن. سونداي-اق جيىن سوڭىندا عالىمنىڭ ۇلى, «شام-شىراق» عىلىم, ءبىلىم مەن ونەر ميراسىن قولداۋ قورىنىڭ وكىلى قايرات شورا ۇلى اكادەميكتىڭ جەكە كىتاپحاناسىندا ساقتالعان ءتىل بىلىمىنە ارنالعان مىڭعا جۋىق سيرەك باسىلىمدى ۇلتتىق اكادەميالىق كىتاپحانانىڭ شورا سارىباەۆ اتىنداعى وقۋ زالىنا تاپسىردى.