كەشە استانادا سىرتقى ىستەر ءمينيسترى ەرجان قازىحانوۆ كورەيا رەسپۋبليكاسى پارلامەنتىنىڭ دەپۋتاتى پاك سان چونمەن كەزدەستى.
قازاقستاننىڭ سىرتقى ساياسات ۆەدومستۆوسىنىڭ باسشىسى كەزدەسۋ بارىسىندا ەكى ەل اراسىنداعى ءوزارا ىنتىماقتاستىقتىڭ جاڭا ساپالى ستراتەگيالىق ارىپتەستىك دەڭگەيىنە كوتەرىلگەنىن, بۇعان جوعارى دەڭگەيدەگى ساپار الماسۋلاردىڭ ىقپالى دالەل بولا الاتىنىن اتاپ ءوتتى. «جاقىن كۇندەرى كورەيا رەسپۋبليكاسىنىڭ پرەزيدەنتى لي ميون باكتىڭ قازاقستانعا رەسمي ساپارى قوس مەملەكەتتىڭ ستراتەگيالىق ارىپتەستىگىندەگى ماڭىزدى كەزەڭ بولاتىنىنا سەنىمىمىز مول», – دەدى ە.قازىحانوۆ.
ەكى ەل اراسىنداعى پارلامەنتارالىق ءوزارا بايلانىستار ءجونىندە ءسوز قوزعاي كەلە, سىرتقى ىستەر ءمينيسترى كورەيا رەسپۋبليكاسىنىڭ ۇلتتىق اسسامبلەياسى دەپۋتاتتارىمەن ۇنەمى قارىم-قاتىناستى دامىتىپ وتىرعان قازاقستان پارلامەنتى دەپۋتاتتارىنىڭ توبى بار ەكەندىگىن دە اتاپ ءوتتى. قازاقستاندىق مينيستر ەكى ەلدىڭ دەپۋتاتتارى قوس مەملەكەت اراسىنداعى تۇراقتى بايلانىستى, ءوزارا تۇسىنۋشىلىك پەن سەنىمدى ودان ءارى تەرەڭدەتۋگە ىقپال ەتسە, ال مۇنداي كەزدەسۋلەر حالىقتار اراسىنداعى دوستىقتى نىعايتۋعا مۇمكىندىك بەرەدى دەگەن ويىن جەتكىزدى.
يادرولىق قارۋدى تاراتپاۋ ءماسەلەلەرىنە توقتالعان ە. قازىحانوۆ 2012 جىلدىڭ كوكتەمىندە سەۋلدە وتەتىن يادرولىق قاۋىپسىزدىك ءسامميتىنىڭ وزەكتىلىگىن اتاپ ءوتتى. «ءوز ەركىمەن ءىرى يادرولىق پوليگوندى جاۋىپ, جاھاندىق قارۋسىزدانۋعا ۇلكەن تاريحي ۇلەس قوسقان قازاقستان وسىنداي ءىس-شارالاردى وتكىزۋ باستامالارىن تۇتاستاي قولدايدى», دەدى بۇل تۋراسىندا مينيستر.
ە.قازىحانوۆ كورەياارالىق رەتتەۋ تاقىرىبىن تالقىلاي كەلە, بۇۇ قاۋىپسىزدىك كەڭەسىنىڭ ءتيىستى قارارلارىنىڭ ورىندالۋىنا جانە التىجاقتى كەلىسسوزدەردىڭ جالعاسۋىنا قازاقستاننىڭ وڭ كوزقاراس تانىتىپ وتىرعانىن جەتكىزدى.
ءلايلا ەدىلقىزى.