كەشە «ىلە» پوليگونىندا «دالا قىرانى – 2011» تاكتيكالىق-ارنايى بىتىمگەرلىك وقۋ-جاتتىعۋلارى باستالدى
بيىلعى وقۋ-جاتتىعۋلارعا قازاقستان ارمياسى, ۇلىبريتانيا جانە اقش قارۋلى كۇشتەرىنىڭ اسكەري قىزمەتشىلەرى عانا ەمەس, ليتۆا جانە قىرعىز رەسپۋبليكاسىنىڭ جاۋىنگەرلەرى دە قاتىسۋدا.
وقۋ-جاتتىعۋعا 1400-دەن استام اسكەري قىزمەتشى جانە جۇزگە جۋىق جاۋىنگەرلىك تەحنيكا تارتىلعان. بيىلعى بىرلەسكەن جاتتىعۋلار وسىمەن توعىزىنشى رەت وتكىزىلىپ وتىر.
جاتتىعۋلاردىڭ اشىلۋ سالتاناتىنا قورعانىس مينيسترلىگى شتابتار باستىقتارى كوميتەتى توراعاسىنىڭ ورىنباسارى, گەنەرال-مايور مۇقان دۇيسەكەەۆ, شەت مەملەكەتتەردىڭ اسكەري باقىلاۋشىلارى, ناتو-نىڭ ءارتۇرلى شتابتارىنان ساراپشىلار جانە قازاقستان رەسپۋبليكاسىندا تىركەلگەن اسكەري-ديپلوماتيالىق كورپۋس وكىلدەرى قاتىسادى.
جاتتىعۋدى وتكىزۋ ماقساتى – بىتىمگەرشىلىك وپەراتسيالاردى ورىنداۋ كەزىندە قازبريگ پەن اليانس قارۋلى كۇشتەرى ءبولىمشەلەرىنىڭ ۇيلەسىمدىلىگىن تەكسەرۋ, سونداي-اق بولىمشەلەردى ۇزدىكسىز باسقارۋ كەزىندە كومانديرلەردىڭ ءىس-تاجىريبەدەگى داعدىلارىن جوعارىلاتۋ, بىتىمگەرشىلىك وپەراتسيالارىن وتكىزۋ بارىسىندا ءوزارا ءىس-قيمىلداردى ۇيىمداستىرۋ.
«دالا قىرانى» جاتتىعۋى 2003 جىلى باستالىپ, ءبىرىنشى رەت ەكىجاقتى ىنتىماقتاستىق شەڭبەرىندە ۇلىبريتانيادا ءوتكىزىلگەن بولاتىن. وقۋ-جاتتىعۋ بىتىمگەرشىلىك وپەراتسيالارى كەزىندە «قازبريگتىڭ» جەدەل ءۇيلەسىمدىلىگىنە جەتۋگە باعىتتالعان جانە بىتىمگەرشىلىك برياگاداسىنىڭ بىرىككەن قولباسشىلىقپەن كوپ ۇلتتى كۇشتەر قۇرامىندا تاپسىرمالاردى ورىنداۋ قابىلەتتەرىن شىنايى تەكسەرەدى.
وكسانا پارپۋرا, قورعانىس مينيسترلىگى ءباسپاسوز قىزمەتىنىڭ قىزمەتكەرى.
سۋرەتتەردى تۇسىرگەن ەرمەك سارباسوۆ.