ماعجان جۇماباەۆ اتىنداعى وبلىستىق عىلىمي-امبەباپ كىتاپحاناسىندا «نۇر وتان» حالىقتىق-دەموكراتيالىق پارتياسى اقمولا وبلىستىق فيليالىمەن بىرلەسىپ وتكىزگەن «كىتاپ سىيلا – ىزگىلىك سىيلا» اكتسياسىنىڭ قورىتىندىسى شىعارىلدى.
جينالعان قاۋىم الدىندا ءسوز العان «نۇر وتان» حدپ وبلىستىق فيليالى توراعاسىنىڭ ءبىرىنشى ورىنباسارى عالىم شويكين اۋىل كىتاپحانالارىن باسپا ونىمدەرىمەن تولىقتىرۋدى ماقسات ەتەتىن شارانىڭ تەرەڭ ماڭىزى بارلىعىن اتاپ ءوتتى. وبلىستىق پارتيا ۇيىمى بۇعان دەيىن بالالار ۇيلەرىنىڭ, قىلمىستىق اتقارۋ جۇيەلەرىنىڭ كىتاپحانالارىن تولىقتىرۋدا بەلسەندى جۇمىس اتقاردى. الداعى كەزدە دە جۇرەكتەرگە ىزگىلىك نۇرىن قۇياتىن اكتسيالاردى جالعاستىرۋ نيەتى قولداۋ تاۋىپ وتىر. وعان وزگە دە قوعامدىق ۇيىمدار مەن ۇلتتىق-مادەني ورتالىقتاردى جۇمىلدىرۋ كوزدەلگەن.
وبلىستىق تىلدەردى دامىتۋ باسقارماسىنىڭ باستىعى عوسمان تولەعۇل مەن وبلىستىق مادەنيەت باسقارماسى باستىعىنىڭ ورىنباسارى بازارباي كاكەنوۆ, وبلىستىق كىتاپحانانىڭ ديرەكتورى ارمان بەردالين جانە باسقالار اكتسياعا قاتىسۋشىلارعا العىس سەزىمدەرىن ءبىلدىردى.
قازىرگى كەزدە يگى داستۇرگە اينالا باستاعان شاراعا جۇرتشىلىق ايرىقشا كوڭىل ءبولىپ, بەلسەندىلىك تانىتىپ وتىر. ماسەلەن, سارا مۇقاتوۆا ءوزىنىڭ وتباسىلىق كىتاپحاناسىنان 360 اتاۋداعى تاريحي, تەحنيكالىق جانە كوركەم ادەبي كىتاپتارىن سىيعا تارتقان. جالپى, اكتسيا بارىسىندا 4 مىڭنان استام كىتاپ جينالىپ, اۋىلدارداعى ءبىلىم وشاقتارىنا جىبەرىلدى.
باقبەرگەن امالبەك,
اقمولا وبلىسى.