تاراز قالاسىنىڭ تورىندەگى «ھيباتۋللا تارازي» مەشىتى قاسيەتتى ورازا ايى قارساڭىندا شىعىس ساۋلەت ونەرىنىڭ ءسان-سالتاناتىمەن قايتا جوندەلىپ, قۇران كارىم اياتتارىمەن, اللا تاعالانىڭ مۇباراك ەسىمدەرىمەن جانە دۇعا-تىلەكتەرمەن اراب تىلىندە ايشىقتالىپ, جاماعاتقا جاڭادان ەسىك اشتى.
– ورتالىق كوشەنىڭ بويىنداعى كورنەكتى جەردە تۇرعانىنا قاراماستان, قارادۇرسىندەۋ سالىنعان مەشىتتى قالا كوركىنە ساي قايتا بەزەندىرۋ تۋرالى تىلەك كوپ ايتىلدى. ەندى, مىنە, ول اللا تاعالاعا قۇلشىلىق ورنىمەن بىرگە, شاھارىمىزعا شىعىس پەن باتىستان ساياحاتتاپ كەلگەن قوناقتاردى ءتانتى ەتەتىن اسەم ساۋلەت ەسكەرتكىشىنە دە اينالىپ وتىر, – دەگەن وبلىس اكىمى قانات بوزىمباەۆ جينالعاندارعا ورازا قابىل بولسىن ايتتى.
اللا رازىلىعى جولىنداعى يماندى ىسكە «سك قۇلاگەر» كومپانياسى باس بولىپ, وبلىستاعى «قازفوسفات», «SAT كومپاني», «نۇراي», «يۋجكامورگ» جانە «ارسيكوسترويسەرۆيس» كومپانيالارى قارجىلاي دەمەۋشىلىك جاساعان.
كوسەمالى ساتتىباي ۇلى,
جامبىل وبلىسى.