تۇرعىندار العىسىنا بولەندى. بۇگىندە سەمەي قالاسىنىڭ قۇرامىنداعى ونشاقتى اۋىلدىق وكرۋگ قالا تۇرعىندارىن اۋىلشارۋاشىلىق ونىمدەرىمەن تۇراقتى تۇردە قامتاماسىز ەتىپ كەلەدى.
وسى ماقساتپەن ولار قالادا جارمەڭكەلەردى ءجيى وتكىزۋدە. ەندى, مىنە, ەل تاۋەلسىزدىگىنىڭ 20 جىلدىعىنا وراي اۋىل ونەرپازدارى قالاعا ونەر ساپارىمەن كەلە باستادى. ايتالىق, قالا ماڭىنداعى زنامەنكا اۋىلى ونەرپازدارىنىڭ ويىن-ساۋىعى وسىنداعى م.اۋەزوۆ ەسكەرتكىشى جانىندا اشىق اسپان استىندا ءوتتى. «اتامەكەن» انىمەن اشىلعان اۋىل ونەرپازدارىنىڭ كونتسەرتى ءۇش ساعاتقا سوزىلدى.
داۋلەت سەيسەن ۇلى, سەمەي.
ۇزدىك بالاباقشا بايقاۋى. حالقىمىز «تاربيە بولسا, بالعىن وسەر سومدالىپ» دەگەن. وبلىستىق ءبىلىم باسقارماسى جىل سايىن «ۇزدىك بالاباقشا-2011» بايقاۋىن وتكىزۋى وسىعان دالەل. مەكتەپكە دەيىنگى مەكەمەلەردە تاربيەشىلەردىڭ ءبىلىم, بىلىكتىلىگىن كوتەرۋ, تاجىريبەسىن ناسيحاتتاۋعا ارنالعان شارادا جەڭىمپاز اتانعان بالاباقشا رەسپۋبليكالىق بايقاۋعا قاتىسۋ مۇمكىندىگىن يەلەنەدى. بايقاۋعا وڭىردەگى ۇزدىك دەپ تانىلعان 18 بالاباقشا قاتىسىپ, بايقاۋ شارتى بويىنشا سىنعا ءتۇستى. ۇمىتكەرلەردىڭ شەبەرلىگىنە, مادەنيەتى مەن جاڭاشىلدىعىنا, كاسىبي تاجىريبەسىنە ءمان بەرىلدى. بايقاۋ قورىتىندىسىندا الاكول اۋدانىنىڭ «قۋانىش-2» بالاباقشاسى – ءبىرىنشى, جامبىل اۋدانىنداعى جەكەمەنشىك «جازيرا» بالاباقشاسى – ەكىنشى, بالقاشتىق «جاسۇلان» بالاباقشاسى ءۇشىنشى ورىنداردى ءوزارا ءبولىستى.
كۇمىسجان بايجان, الماتى وبلىسى.
ايگىلى «De Longhi» ىنتىماقتاستىققا ىنتالى. يتالياندىق بۇل كومپانيانىڭ جىلۋ رادياتورلارىن, ونەركاسىپتىك سالقىنداتقىشتار مەن تۇرمىستىق تەحنيكا شىعارۋداعى اتاعى الىسقا ايان. ونىڭ قۇرامىندا يتاليادا 2, قىتايدا 3, رەسەيدە 1 زاۋىت جۇمىس ىستەيدى. وبلىسقا ارنايى جۇمىس ساپارىمەن كەلگەن اتالعان كومپانيا جەتەكشىسى دجۋزەپپە دەلونگ مىرزا ءوڭىر باسشىلارىمەن كەزدەسۋدە ەكىجاقتى ءتيىمدى بايلانىستار ورناتۋعا ىنتالىلىق تانىتتى. ونىڭ ايتۋىنشا, ايماقتا ءوز ونىمدەرىن وندىرۋگە شيكىزات پەن مەتالل جەتكىلىكتىگى, سونىمەن بىرگە بىلىكتى ماماندار مەن ينفراقۇرىلىمنىڭ تاۋىرلىگى ءوندىرىستى قالىپتاستىرۋعا نەگىز قالايدى. وسىعان بايلانىستى ءىس-شارالاردى ىسكە اسىرۋعا نيەت ءبىلدىرىلدى.
ايقىن نەسىپباي, قاراعاندى.
مەدرەسەسى بار جاڭا مەشىت. شالعايداعى جەكەكول اۋىلىندا جاڭا مەشىت بوي كوتەرىپ, جۇرتشىلىقتىڭ يگىلىگىنە پايدالانۋعا بەرىلدى. ونى وسى اۋىلدىڭ تۋماسى, اتاقتى ءباري قاريدىڭ نەمەرەسى مەدەت سالدىردى. اللا تاعالانىڭ جەردەگى ءۇيىنىڭ اشىلۋ سالتاناتىنا «قىزىلجار» ورتالىق مەشىتىنىڭ باس يمامى قاسىمحان قاجى ابدوللا ۇلى, وبلىس اكىمىنىڭ ورىنباسارى فارحاد قۋانعانوۆ, اۋدان اكىمى سەرىك ىبىراەۆ جانە جان-جاقتان كەلگەن مەيماندار قاتىسىپ, جىلى لەبىزدەرىن ارنادى. ءبىر مەزەتتە 600 ادام ناماز وقي الاتىن عيباداتحانانىڭ 120 ورىندىق اسحاناسى, مەدرەسەسى بار. مەدرەسە سىنىپتارى تالاپقا ساي جابدىقتالىپ, ينتەراكتيۆتى تاقتا, ءتۇرلى-ءتۇستى تەلەديدار ورناتىلعان. مەشىتكە بار عۇمىرىن ءدىن جولىنا ارناعان ءباري قاريدىڭ ەسىمى بەرىلىپ, ادىلبەك قايىربەكوۆ يمام بولىپ تاعايىندالدى.
ءومىر ەسقالي, سولتۇستىك قازاقستان وبلىسى, جامبىل اۋدانى.
سۇيىندىكتە ء«بىر تەرەزە» اشىلدى. قۇرمانعازى اۋدانىنداعى سۇيىندىك اۋىلدىق وكرۋگى ءوڭىر ورتالىعىنان 500-دەي شاقىرىم قاشىقتا ورنالاسقان. اۋدان ورتالىعىنا جەتۋ دە قيىن. جول اسفالتتالماعان. مامىر ايىندا وسى وكرۋگتە بولعان وبلىس اكىمى ب.رىسقاليەۆ ءبىراز قيىندىقتىڭ شەشىلەتىنىن ايتىپ ەدى. وتكەن اپتادا سۇيىندىكتە حالىققا قىزمەت كورسەتۋ ورتالىعى اشىلدى. بۇدان بىلاي اۋىل تۇرعىندارى انىقتاما الۋ, نە تولقۇجات اۋىستىرۋ ءۇشىن اۋدان ورتالىعىنا شاپقىلامايتىن بولدى. ەندى ءبارىن ء«بىر تەرەزەدەن» الۋعا مۇمكىندىك بار.
جولداسبەك شوپەعۇل, اتىراۋ وبلىسى.
وقۋشىلارعا ارنالعان سىيلىق. «نۇر وتان» حدپ وبلىستىق فيليالى «جاس وتان» جاستار قاناتىنىڭ كومەگىمەن «مەكتەپكە جول» رەسپۋبليكالىق قايىرىمدىلىق اكتسياسى شەڭبەرىندە ۇلكەن يگىلىكتى ىسكە ۇيىتقى بولدى. ءسويتىپ, جاڭا وقۋ جىلى قارساڭىندا بايزاق اۋدانى بويىنشا 100 وقۋشى مەكتەپ فورماسى, سومكە, قالام-قاعاز سياقتى وزدەرىنە اسا قاجەتتى تاعى باسقا زاتتارعا يە بولدى. سىيلىقتارعا دەگەن قاراجاتتى بايزاق اۋدانى اكىمدىگى ءبولدى. جاڭا وقۋ جىلىنا دەيىن مۇنداي سىيلىق از قامتاماسىز ەتىلگەن وتباسىلارداعى تاعى 200 وقۋشىعا بەرىلەدى.
كوسەمالى ساتتىباي ۇلى, جامبىل وبلىسى.
قازاقستان — بايتاق ەلىم, كەڭ ارنام. جاقىندا ماقتاارال اۋداندىق ورتالىق كىتاپحاناسىندا تاۋەلسىزدىكتىڭ 20 جىلدىعىنا ارنالعان “قازاقستان – بايتاق ەلىم, كەڭ ارنام” اتتى كىتاپ كورمەسى ءوتتى. “تاۋەلسىزدىك – ۇلتتى وركەندەتۋدىڭ ۇلى قۇندىلىعى”, “ەلتاڭباسىمەن ەڭسەلى, كوك بايراعىمەن ايبىندى” جانە “الەمگە ايگىلى – استانا” بولىمدەرىنەن تۇراتىن كورمەگە كەلۋشىلەر مول بولدى. مەملەكەتىمىزدىڭ ءجۇرىپ وتكەن جولىن باياندايتىن, پاتريوتتىق تاربيە بەرەتىن, وتانسۇيگىشتىك سەزىمىن نىعايتاتىن كىتاپ كورمەسىنىڭ, اسىرەسە, جاستارعا تاعىلىمى ۇلكەن ەكەندىگى انىق.
باقتيار تايجان, وڭتۇستىك قازاقستان وبلىسى.