جاقىن ارادا ءبىلىم جانە عىلىم مينيسترلىگىنىڭ كۋبوگى جولىندا ستۋدەنتتىك فۋتبول ليگاسىنىڭ كۇزگى ماۋسىمى باستالادى.
بيىلعى جارىستا كوماندالار وتكەن جىلداعىداي ورتالىق, سولتۇستىك, شىعىس, باتىس, وڭتۇستىك-1, وڭتۇستىك-2 بولىپ التى ءوڭىرلىك توپقا بولىنەدى. وسى ءوڭىرلەردىڭ ارقايسىسىنان فينالعا تەك ەكى كوماندا عانا شىعادى. ال جەڭىمپاز كوماندا ەل تاۋەلسىزدىگىنىڭ 20 جىلدىعى قارساڭىندا انىقتالادى. بۇل تۋرنيرگە بارلىق اۋەسقوي ستۋدەنتتىك كوماندالار قاتىسا الادى. وتكەن جىلى ءتۋرنيردىڭ جەڭىمپازى بولىپ قورقىت اتا اتىنداعى قىزىلوردا مەملەكەتتىك ۋنيۆەرسيتەتىنىڭ كومانداسى اتانعان ەدى.
«اۋەسقوي فۋتبول ليگاسى» قوعامدىق ۇيىمىنىڭ پرەزيدەنتى ەرلان جارىلقاسىنوۆتىڭ ايتۋىنشا, ستۋدەنتتىك فۋتبول ليگاسىنىڭ ماقساتى – جاستاردى ورتاق ماقساتقا بىرىكتىرىپ, ولاردىڭ بوس ۋاقىتتارىن ءتيىمدى وتكىزۋ ءۇشىن دەنە تاربيەسى جانە سپورتپەن اينالىسۋلارىنا, جاس كەزىندە سالاماتتى ءومىر سالتىن ۇستانىپ, فۋتبولدىڭ ناسيحاتتالۋىنا مۇمكىندىك جاساۋ. سونىمەن بىرگە, جوعارى وقۋ ورىندارى اراسىنان فۋتبول كوماندالارىن ىرىكتەۋ.