اقتوبە مەملەكەتتىك پەداگوگيكالىق ينستيتۋتى 2007 جىلى ەلباسى جولداۋىن قولداپ, «ديپلوممەن – اۋىلعا» باستاماسىن كوتەرىپ, جاس مامانداردى اۋىلدىق جەرلەرگە بارۋعا شاقىرعان بولاتىن. باعالى باستاما بىردەن كەڭ قولداۋ تاپقان-دى. بۇل جوباعا جەرگىلىكتى بيلىك تە وڭ كوزقاراس تانىتىپ, اۋىل مەكتەپتەرىنە جاس مۇعالىمدەردى تۇراقتاندىرۋعا قولداۋ كورسەتتى. اۋىلدا ەڭبەك جولىن باستاۋعا تىلەك بىلدىرگەندەرگە تۇرعىن ءۇي ءبولۋ, كوتەرمە اقى بەرۋ ءداستۇرى قالىپتاستى. وبلىستىڭ قوبدا, العا اۋداندارى ينستيتۋت تۇلەكتەرىنىڭ اۋىل مەكتەپتەرىندە تۇراقتاپ قالۋى ءۇشىن قولدان كەلگەننىڭ ءبارىن جاسادى. قوبدا اۋدانىندا جاس ماماندارعا كورسەتىلەتىن جوعارىدا ايتىلعان جەڭىلدىكتەرمەن قاتار, ولاردى كوممۋنالدىق تولەمدەردەن بوساتۋ قاراستىرىلدى. سونىڭ ناتيجەسىندە كوپتەگەن جاس ۇستازدار اۋىل مەكتەپتەرىندە ەڭبەك جولىن باستادى. مۇنداي باستامانىڭ قايتارىمدىلىعىنا ناقتى مىسال وتكەن جىلى ينستيتۋت قابىرعاسىنان ۇشقان 760 تۇلەكتىڭ 85 پايىزىنىڭ اۋىلدىق جەرلەرگە جولداما الۋى دەر ەدىك. ۇلگىلى ءۇردىس بيىل دا جالعاسىن تاپتى. ينستيتۋتتا ءتۇلەكتەردى جۇمىسقا ورنالاستىرۋ باعىتىندا ءبىراز شارۋالار تىندىرىلدى. قارعالى, مارتوك, تەمىر اۋداندىق ءبىلىم بولىمدەرى ماماندارىمەن تۇلەكتەردىڭ كەزدەسۋلەرى وتكىزىلدى, اۋىلدىق كۆوتامەن ءبىلىم العان ءتۇلەكتەر ءبىلىم جانە عىلىم مينيسترلىگىنىڭ جانە وبلىستىق ءبىلىم باسقارماسىنىڭ سۇرانىستارىمەن جانە «ديپلوممەن – اۋىلعا» جوباسىندا قاراستىرىلعان الەۋمەتتىك قولداۋلارمەن تانىستىرىلدى. بۇل وسى جوعارى وقۋ ورنىندا ءتۇلەكتەردى جۇمىسقا ورنالاستىرۋعا بايلانىستى اتقارىلعان شارۋالاردىڭ ءبىر پاراسى عانا دەسەك, ارتىق ايتقاندىق ەمەس.
بيىلعى ءبىر ەرەكشەلىك – مەملەكەتتىك جوعارى وقۋ ورىندارىندا اۋىلدىق كۆوتامەن وقۋ ءبىتىرىپ جاتقانداردى مەملەكەتتىك تاپسىرىس بويىنشا اۋىلدىق جەرلەرگە جولدامامەن جىبەرۋ ءۇردىسىنىڭ ەنگىزىلۋى دەر ەدىم. ەلىمىز بويىنشا 1647, وبلىسقا 404 جاس مامان جەتىسپەسە, وبلىستاعى اۋىل مەكتەپتەرىنە عانا 327 مۇعالىم كەرەك ەكەن. ءبىزدىڭ جوعارى وقۋ ورنىنا ءبىلىم جانە عىلىم مينيسترلىگىنىڭ تاپسىرىسى بويىنشا, ەلىمىزدىڭ بارلىق وبلىستارىنا 91 تۇلەكتى جولدامامەن جىبەرۋ كوزدەلگەن. ولاردىڭ ءبارى دە اۋىلدىق جەرلەرگە بارادى. سونىڭ 46-سى ءوز وبلىسىمىزدىڭ اۋىلدىق مەكتەپتەرىنە جولداما الدى. مەملەكەتتىك تاپسىرىسپەن بولىنگەن تۇلەكتەر كەمىندە ءۇش جىل سول جەردە ەڭبەك ەتەدى. ولارعا بارلىق جاعداي جاسالادى. بيىل 21 ماماندىق بويىنشا بىتىرگەلى وتىرعان 560 ءتۇلەكتىڭ 90 پايىزى اۋىل مەكتەپتەرىنە بارۋدى ۇيعاردى. جالپى العاشقى جىلدارداعىداي ەمەس, اۋىلعا بارىپ جۇمىس ىستەۋدىڭ تيىمدىلىگىن تۇلەكتەر دە ءتۇسىندى. بۇرىن بىرەن-ساران بولسا دا اۋىلدان قاشقاقتايتىندار كەزدەسەتىن, بيىل بىردە-ءبىر تۇلەك باس تارتقان جوق. ەسەسىنە اقىلى توپتاعىلار اراسىنان دا قاي جەردە قانشالىقتى الەۋمەتتىك قولداۋ كورسەتىلەتىنىن تاڭداعاندار تابىلدى. ياعني, جاس مامانداردى الەۋمەتتىك قولداۋ قايتارىم بەرە باستادى دەگەن ءسوز. ءبىز وسىنداي ىرگەلى ىسكە باستاماشى بولعانىمىزدى ماقتانىش تۇتامىز جانە وسى باعىتتاعى جۇمىستاردى جەتىلدىرە بەرۋدى, اۋداندىق ءبىلىم ءبولىمدەرىمەن تىعىز بايلانىستى نىعايتۋدى جالعاستىرامىز, – دەيدى اقتوبە مەملەكەتتىك پەداگوگيكالىق ينستيتۋتىنىڭ رەكتورى, ەكونوميكا عىلىمدارىنىڭ دوكتورى عالىمجان نۇرىشەۆ.
ينستيتۋتتىڭ بيىلعى تۇلەگى ۆيكتور تكاچەنكو قارعالى اۋدانىنداعى ءبىر سەرىكتەستىككە جولداما الىپتى. جالپى, ءبىز سويلەسكەن تۇلەكتەردىڭ قاي-قايسى دا اۋىلعا بارۋعا ىنتالى, الەۋمەتتىك قولداۋعا ءدان ريزا.
جاقسى باستاما قاشاندا جۇعىستى. «ديپلوممەن – اۋىلعا» باستاماسى وبلىس ورتالىعىنداعى مارات وسپانوۆ اتىنداعى مەملەكەتتىك مەديتسينا ۋنيۆەرسيتەتى تۇلەكتەرى تاراپىنان دا كەڭ قولداۋعا يە بولىپ وتىر. مەديتسينالىق ۋنيۆەرسيتەتتى بيىل ءبىتىرىپ جاتقان 309 تۇلەكتىڭ تەڭ جارتىسىنان استامى اقتوبە, اتىراۋ, ماڭعىستاۋ, باتىس قازاقستان جانە قىزىلوردا وبلىستارىنىڭ اۋىلدارىنداعى دەنساۋلىق ساقتاۋ مەكەمەلەرىندە ەڭبەك ەتۋگە بەل بۋدى. سونداي-اق, قالاداعى گۋمانيتارلىق, اۋىل شارۋاشىلىعى جانە كولىك, كوممۋنيكاتسيا جانە جاڭا تەحنولوگيا كوللەدجدەرىن بىتىرۋشىلەر دە ەڭبەك جولدارىن اۋىلدان باستاۋدى ۇيعاردى. مۇنىڭ ءوزى اۋىلدىڭ كوركەيۋى مەن دامۋىنا اناعۇرلىم سەرپىن بەرەتىن بولادى.
ساتىبالدى ءساۋىرباي.
اقتوبە وبلىسى.