استانانىڭ تۋعان كۇنىنە وراي قالا قوناقتارى مەن تۇرعىندارىنا ارنالىپ ۇيىمداستىرىلعان مەرەكەلىك دۋماندار 6 شىلدە كۇنى الەمدىك ساحنا جۇلدىزى, ءان پاديشاسى اتانعان سارا برايتماننىڭ كونتسەرتىمەن جالعاستى. ال كەشكىسىن رەسپۋبليكالىق «سارىارقا» ۆەلوترەگىندە وتكەن مەرەكەلىك كەشكە Mr. Black Star تيماتي, «گرادۋسى», Quest Pistols, Arash, Jay Sean جانە يتاليالىق دي-دجەي Alex Gaudino مەن قازاقستاندىق دينارا سۇلتان, ايقىن, «وردا», «رينگو» جانە «نە ۆسە سكازانو» توپتارى قاتىسىپ, جينالعان كوپشىلىككە ونەرلەرىن پاش ەتتى.
قالا كۇنىن ەستە قالارلىقتاي ءارى قىزىقتى وتكىزۋ ماقساتىندا استانا اكىمدىگى بارىنشا دايىندالىپتى. وعان ءوزىنىڭ سوپرانو داۋىسىمەن الەمدى اۋزىنا قاراتقان اعىلشىن ءانشىسى سارا برايتماننىڭ جەكە كونتسەرتپەن كەلۋگە كەلىسىم بەرۋى دالەل. ول ءوزىنىڭ اسقان شەبەر سوپرانو داۋىسىنىڭ ارقاسىندا الەمگە تانىلىپ, ءان پاديشاسى اتانعان ءانشى. ءوز شىعارماشىلىعىندا ەكى مۋزىكالىق باعىتتى – وتكەن عاسىردىڭ كلاسسيكالىق مۋزىكاسى مەن سوڭعى ونجىلدىقتاعى «پوپ» جانرىن شەبەر ۇيلەستىرە بىلگەن سارا برايتماننىڭ «Time To Say Goodbye» مۋلتيپلاتينالى ءان جيناعى 1997 جىلى 35 اپتا بويى Billboard جۋرنالىنىڭ كلاسسيكالىق چارتىنان تۇسپەيدى, سونداي-اق ول الەمنىڭ 21 ەلىندە التىن جۇلدەگە يە بولادى. ءدال وسى ساتتەن باستاپ سارانىڭ ەسىمى الەمدى شارلاپ كەتەدى. سارانىڭ اندرەا بوچەلليمەن بىرلەسە ءان ورىنداۋى ەڭ تاڭداۋلى ءارى تەز تارالعان سينگلگە اينالدى.
استانالىقتار مەن ەلوردا قوناقتارىنىڭ كوڭىل-كۇيىن كوتەرۋگە بەرىلگەن مۇمكىندىك كەڭىنەن بولدى. مەرەكەلىك كونتسەرتتەرگە كىرۋ بيلەتتەرى دە قولجەتىمدى باعادا ساتىلدى. مۇشەل جاستان شىققان استانانىڭ تۋعان كۇنى وسىلايشا كەزەكتى رەت جوعارى دارەجەدە اتالىپ ءوتىلدى.
ۆەنەرا تۇگەلباي.