كەشە اقوردادا جوعارى لاۋازىمدى قىزمەتكە تاعايىندالعان ءبىر توپ مەملەكەتتىك قىزمەتكەر قازاقستان رەسپۋبليكاسىنىڭ كونستيتۋتسياسىنا جانە «قازاقستان رەسپۋبليكاسىنىڭ مەملەكەتتىك قىزمەت تۋرالى» زاڭىنا سايكەس ەل پرەزيدەنتى مەن قازاقستان حالقىنا سالتاناتتى جاعدايدا انت بەردى.
مەملەكەت باسشىسى نۇرسۇلتان نازارباەۆتىڭ الدىندا انتتى العاشقى بولىپ باس پروكۋرور اسحات داۋىلباەۆ بەردى. ول «قازاقستان رەسپۋبليكاسىنىڭ حالقى مەن پرەزيدەنتى الدىندا ءوز وتانىم – قازاقستان رەسپۋبليكاسىن ەكونوميكالىق جانە رۋحاني دامىتۋ ىسىنە بار كۇش-جىگەرىم مەن ءبىلىمىمدى جۇمساۋعا, مەملەكەتتىڭ كونستيتۋتسياسى مەن زاڭدارىن قاتاڭ ساقتاۋعا, ءوزىمنىڭ بارلىق ءىس-ارەكەتتەرىمدە زاڭدىلىق پەن ادىلەتتىلىك, ازاماتتىق پەن ۇلتارالىق تاتۋلىق قاعيدالارىن ۇستانۋعا, قازاقستان حالقىنا ادال قىزمەت ەتۋگە, ءوز ەلىمنىڭ مەملەكەتتىلىگى مەن الەمدىك قوعامداستىقتاعى بەدەلىن نىعايتا بەرۋگە سالتاناتتى تۇردە انت بەرەمىن, انت ەتەمىن», – دەدى ەش كىدىرىسسىز.
ودان كەيىن مەملەكەتتىك قىزمەت ىستەرى اگەنتتىگىنىڭ توراعاسى ءاليحان بايمەنوۆ, سىرتقى ىستەر ءمينيسترى ەرجان قازىحانوۆ, ىشكى ىستەر ءمينيسترى قالمۇحامەت قاسىموۆ, اۋىل شارۋاشىلىعى ءمينيسترى اسىلجان مامىتبەكوۆ, بايلانىس جانە اقپارات ءمينيسترى اسقار جۇماعاليەۆ, ءبىلىم جانە عىلىم ءمينيسترى باقىتجان جۇماعۇلوۆ, دەنساۋلىق ساقتاۋ ءمينيسترى ساليدات قايىربەكوۆا, كولىك جانە كوممۋنيكاتسيالار ءمينيسترى بەرىك كاماليەۆ, تۋريزم جانە سپورت ءمينيسترى تالعات ەرمەگياەۆ, ەكونوميكالىق ينتەگراتسيا ىستەرى ءمينيسترى جانار ايتجانوۆا, «سىربار» سىرتقى بارلاۋ قىزمەتىنىڭ ديرەكتورى امانجول جانقۇليەۆ, اقمولا وبلىسىنىڭ اكىمى سەرگەي دياچەنكو, الماتى وبلىسىنىڭ اكىمى اڭسار مۇساحانوۆ جانە جامبىل وبلىسىنىڭ اكىمى قانات بوزىمباەۆ انت بەردى. انت بەرۋ سىزدەر ءۇشىن ەرەكشە سالتاناتتى كۇن دەپ ەسەپتەيمىن, دەدى مەملەكەت باسشىسى نۇرسۇلتان نازارباەۆ انت بەرۋ ءراسىمى اياقتالعاننان كەيىنگى سوزىندە.
كەز كەلگەن ازاماتقا مەملەكەتتىك قىزمەتكەر بولۋ – وتە ۇلكەن مارتەبە. وعان بارلىق قازاقستاندىقتاردىڭ قولى جەتە بەرمەيدى. ال ۇكىمەت مۇشەسى بولۋ, مينيستر بولۋ ودان دا زور جاۋاپكەرشىلىك بولىپ تابىلادى. جاڭا وزدەرىڭىز ايتقان انت ءماتىنىنىڭ ءار ءسوزىن جۇرەكتەن وتكىزەتىندەي, جۇمىس ۇستەلدەرىڭنىڭ ۇستىنە قويىپ, كۇن سايىن قاراپ وتىرساڭىزدار, وندا مەنىڭ ايتايىن دەگەن سوزدەرىمنىڭ بارلىعى بار. بۇدان سوڭ پرەزيدەنت مەملەكەتتىك قىزمەتكەرلەر حالىقتىڭ مۇددەسىنە ادال قىزمەت ەتۋ قاجەتتىگىنە توقتالدى. ەلباسىنىڭ توقتالىپ وتكەنىندەي, مەملەكەتتىك قىزمەتكە العان كەزدە, ولاردى مەملەكەتكە ادال قىزمەت ەتۋ ءۇشىن شاقىرادى. سوندىقتان ءاربىر مەملەكەتتىك قىزمەتكەر وزدەرىن حالىقتىڭ قىزمەتشىلەرى رەتىندە سەزىنۋلەرى ءتيىس. وسى ماسەلەنى ۇمىتپاۋلارى قاجەت. مانساپقورلىقتان اۋلاق بولۋ, ءاربىر ادامنىڭ مۇڭ-مۇقتاجىنا نازار اۋدارىپ, ۋاقىت وزدىرماي ءتيىستى جاۋابىن بەرۋ – مەملەكەتتىك قىزمەتكەردىڭ پارىزى. سوندا اكىمدىكتەر دە, مەملەكەتتىك قىزمەتشىلەر دە حالىققا جاقىن بولادى.
تاۋەلسىزدىك العاننان بەرگى 20 جىل ىشىندە جۇزەگە اسىرىلعان قىرۋار شارۋالاردى جۇرگىزگەندەر كىمدەر؟ مەملەكەتتىك قىزمەتكەرلەر, دەدى پرەزيدەنت ءارى قاراي. قول جەتكىزگەن تابىستارىمىزدى ۇيىمداستىرىپ, باسى-قاسىندا جۇرگەندەر, تاعى سول مەملەكەتتىك قىزمەتكەرلەر. الدىمىزعا قويىلعان يندۋستريالىق-يننوۆاتسيالىق باعدارلاما ەڭ ۇلكەن بەلەس بولىپ سانالادى. ونى جۇزەگە اسىرۋ ءۇشىن ەرەكشە كۇش-قۋات, بىرلىك پەن بىلىمدىلىك, جىگەر كەرەك. سونىڭ بارلىعىن ورىنداۋعا سەنىم ارتىپ وتىرعان سىزدەر بولاسىزدار. مەملەكەت باسشىسى اتاپ وتكەندەي, بۇگىندە ەلىمىزدەگى مەملەكەتتىك قىزمەتكەرلەر اراسىندا تاجىريبەسى مول ۇلكەن بۋىن دا, ورتا بۋىن دا بار. قازىرگى كەزدە مەملەكەتتىك قىزمەتكە جاستار دا كەلىپ جاتىر. ولاردىڭ بارلىعى ءبىر-بىرىمەن ساباقتاسا وتىرىپ, تاۋەلسىز قازاقستاننىڭ ءوسىپ-وركەندەۋى ءۇشىن ايانباي قىزمەت ەتۋلەرى ءتيىس. ەلباسى ءسوزىنىڭ سوڭىندا انت بەرگەندەرگە قىزمەتتەرىندە تابىس تىلەدى.
ءاليسۇلتان قۇلانباي.