بۇگىن الماتىدا حالىقارالىق وپەرا جانە بالەت ونەرىنىڭ فەستيۆالى باستالادى
بۇل كۇندەرى اباي اتىنداعى قازاق مەملەكەتتىك اكادەميالىق وپەرا جانە بالەت تەاترى قاربالاس ۇستىندە. ەكى مۋزانىڭ دا ايتۋلى جۇلدىزدارى كەزەگىمەن ەلىمىزگە قوناققا كەلىپ جاتىر. دەمەك, بۇل سوڭعى جىلدارى داستۇرگە اينالعان حالىقارالىق وپەرا ءجانە بالەت ونەرىنىڭ فەستيۆالى باستالدى دەگەن ءسوز. قازاقستان مۋزىكا قايراتكەرلەرى وداعى قازكوممەرتسبانكپەن ءبىرلەسە وتىرىپ, 22-26 ماۋسىم ارالىعىندا وتكىزەتىن ايتۋلى مادەني شارا قازاقستان تاۋەلسىزدىگىنىڭ 20 جىلدىعىنا ارنالماق.
بەكزات ونەردىڭ مايتالماندارىن ءبىر جەردە توعىستىراتىن كەزەكتى فەستيۆالدە اباي اتىنداعى تەاترمەن قاتار يتاليا جانە رەسەيدiڭ بەلگىلى وپەرا جانە بالەت شەبەرلەرى الماتى كورەرمەندەرى مەن قوناقتارى الدىندا ونەر كورسەتەدى. فەستيۆالگە اسىعىپ جەتكەن وسى قوناقتاردىڭ ءبىرى يتاليانىڭ تانىمال تەنورى, ايگىلى «فەرۋچچو تالياۆيني», «تيتو سكيپا» سىندى بايقاۋلاردىڭ باستى ءجۇلدەگەرى الدو كاپۋتا دا قازاق جەرىنە العاش رەت اياق باسىپ وتىر ەكەن.
– قازاقستانداعى ءدال وسى تەاترعا جولىم تۇسكەنىنە قۋانىشتىمىن! الماتى شىنىندا دا جاپ-جاسىل قالا ەكەن. تەاتردىڭ عيماراتى دا ۇنادى. وركەستردىڭ قالاي وينايتىنىن دا كوردىم. تاماشا! مەن ءسىزدەردىڭ بارلىقتارىڭىزدى ءبىزدىڭ قويىلىمداردى تاماشالاۋعا شاقىرامىن, دەدى ول ءباسپاسوز ءماسليحاتىنا قاتىسىپ, جۋرناليستەرگە بەرگەن سۇحباتىندا.
ال سانكت-پەتەربۋرگتەگى ماريا تەاترىنىڭ مەتستسو-سوپرانوسى زلاتا بۋلىچەۆا وسىدان 5 جىل بۇرىن الماتىعا جولى ءتۇسىپ, «كارمەن» وپەراسىنىڭ پارتيالارىن ورىنداعان بولاتىن. پەتەربورداعى وسى تەاتردىڭ بەلدى رەجيسسەرى يركين گابيتوۆ بايىرعىدان-اق قازاق وپەراسىنىڭ دامۋىنا ۇلەسىن قوسىپ جۇرگەن ونەر تارلانبوزى. انە ءبىر جىلدارى قازاقستانداعى تاۋەلسىز «تارلان» سىيلىعىمەن ماراپاتتالعان, وسىدان كەيىن دە اباي تەاترىندا «ترۋبادۋردى» قويعان رەجيسسەر م.گابيتوۆ بۇل جولى دا فەستيۆالدىڭ جوعارى دەڭگەيدە وتۋىنە اتسالىسپاق.
ونىڭ ايتۋىنشا, بىزدەگى حالىقارالىق فەستيۆال ءتورت كۇنگە سوزىلسا, سانكت-پەتەربۋرگتە وتكىزىلەتىن وپەرا جانە بالەت ونەرىنىڭ «اق تۇندەر» فەستيۆالى 1,5 ايعا دەيىن سوزىلىپ, كۇن سايىن بىرنەشە مادەني شارالار وتكىزىلەدى ەكەن.
– قازىرگى تاڭدا كلاسسيكالىق ونەردىڭ وزىندىك مەنەدجمەنتى قالىپتاستى. ايگىلى وپەرا جانە بالەت جۇلدىزدارىنىڭ جۇمىس كەستەسى الدىن الا 2-3 جىلعا قۇرىلىپ قويادى. ياعني, ولار كەلەر جىلدىڭ قاي كۇنى قاي جەردە ونەر كورسەتەتىنىن ءبىلىپ وتىرادى. بۇگىنگى بەكزات ونەردىڭ جۇيەسى وسىنداي, – دەيدى يركين گابيتوۆ.
ەگەر وسى تۇستان وي تارقاتاتىن بولساق, يتاليا مەن رەسەيدىڭ ايگىلى ديريجەرلەرىنىڭ, ءانشى, بيشىلەرىنىڭ قازاقستانعا ارنايى ات باسىن تىرەپ وتىرعانى ايتۋلى وقيعا. كلاسسيكالىق ونەردى باعالايتىن قاۋىم مۇنداي مۇمكىندىكتى جىبەرمەۋى ءتيىس.
سونىمەن, فەستيۆال باعدارلاماسىنداعى دج.ۆەرديدىڭ «ايدا» جانە گ.دونيتسەتتيدىڭ «ماحاببات شىرىنى» وپەرالارىندا اباي تەاترىنىڭ بەيىمبەت قوجاباەۆ, ءجاميلا باسپاقوۆا, بولات ەسىمحانوۆ, ولەگ تاتاميروۆ, الەكساندر سمەتانين, ولگا لۋكاشوۆا سياقتى ءانشىلەرىمەن بىرگە, يتاليا وپەراسىنىڭ جۇلدىزدارى دانيەللا سكيلاچي, لەوناردو گرامەنيا, الدو كاپۋتو مەن رەسەيدىڭ اتاقتى وپەرا جۇلدىزدارى زلاتا بۋلىچەۆا, پاۆەل چەرنىح ونەر كورسەتپەك. ال پ.چايكوۆسكيدىڭ «لەبەدينوە وزەرو» جانە س.پروكوفەۆتىڭ «رومەو مەن دجۋلەتتا» بالەتىنىڭ باستى پارتيالارىن رەسەيلiك بالەت سوليستەرى رۋسلان سكۆورتسوۆ, نينا كاپتسوۆا, دانيلا كورسۋنتسەۆ, اناستاسيا كولەگوۆا جانە اباي اتىنداعى وپەرا جانە بالەت تەاترىنىڭ سوليستەرى دميتري سۋشكوۆ, ۇلان بادەنوۆ, گۇلنۇر بۋريەۆا, دوسجان تابىلدى, اسەت مۇرزاقۇلوۆ, فارحاد بۋريەۆ, اسەل مۋسينوۆا, گۇلۆيرا قۇربانوۆا, ءاليا ساپۋگوۆا, ازامات اسقاروۆ ورىنداماق. وسى ارادا وركەسترگە ەربولات احمەدياروۆ, ارمان ورازعاليەۆ ديريجەرلىك جاسايتىنىن دا ايتا كەتسەك دەيمىز.
ايناش ەسالي.
الماتى.