قىزىلوردا قالاسىندا «التىن بەلگى» يەگەرلەرىن ماراپاتتاۋعا ارنالعان سالتاناتتى شارا ءوتتى. جيىنعا وبلىس اكىمى بولاتبەك قۋاندىقوۆ, وبلىستىق جانە قالالىق ءماسليحات دەپۋتاتتارى, ءبىلىم سالاسىنىڭ ارداگەرلەرى مەن اتا-انالار قاتىستى.
بيىل سىردىڭ بويىندا «التىن بەلگىمەن» مەكتەپ بىتىرگەن تۇلەكتەردىڭ قاراسى باسىم. بۇل ايماقتاعى ءبىلىم سالاسىنىڭ بىلىگىن كورسەتسە كەرەك. اتاپ ايتار بولساق, جاناقورعان اۋدانى بويىنشا – 12, شيەلى اۋدانىندا – 17, سىرداريا اۋدانىندا – 6, جالاعاش اۋدانىندا – 7, قارماقشى اۋدانىندا – 17, قازالى اۋدانىندا – 46, ارال اۋدانىندا – 27, قىزىلوردا قالاسىندا 43 وقۋشى مەكتەپتى «التىن بەلگىمەن» ءبىتىردى. التىن ۇيالارىن التىنمەن بىتىرگەن وقۋشىلار ورتالىققا جينالىپ, التىننان القا تاعىندى.
وسى ارادا ايتا كەتكەن ابزال, بيىلعى ۇبت قورىتىندىسى بويىنشا قىزىلوردا وبلىسىنىڭ ءبىلىم ۇيىمدارىنىڭ ورتاشا كورسەتكىشى 90,5 بالعا جەتتى. «التىن بەلگىگە» ۇمىتكەر 301 وقۋشىنىڭ 207-ءسى ءوز بىلىمدەرىن دالەلدەپ شىقتى. ال «ۇزدىك اتتەستاتقا» 217 ۇمىتكەر ىرىكتەلىپ شىققان-تىن. ونىڭ 127-ءسى «ۇزدىك اتتەستاتقا» لايىقتى باعا جينادى.
بيىل ءتۇرلى ءپان بايقاۋلارى بويىنشا 25 وقۋشى گرانت يەگەرى اتانىپ وتىر. اتاپ ايتقاندا, فيزيكا, ماتەماتيكا, حيميا, ينفورماتيكا, بيولوگيا, اعىلشىن ءتىلى پاندەرى بويىنشا وقۋشىلار «نازارباەۆ ۋنيۆەرسيتەتىنىڭ», «ءسۇلەيمان دەميرەل» ۋنيۆەرسيتەتىنىڭ, ءال-فارابي اتىنداعى قازاق ۇلتتىق ۋنيۆەرسيتەتىنىڭ, كيمەپ, «ەۋرازيالىق», قورقىت اتا اتىنداعى قىزىلوردا مەملەكەتتىك ۋنيۆەرسيتەتتەرىنىڭ, مۇنىمەن قوسا پراگا, چەحيا مەملەكەتتەرىندەگى, سونداي-اق «پەترو قازاقستان» باعدارلاماسى بويىنشا قىتاي ەلىندەگى جوعارى وقۋ ورىندارىنىڭ گرانت يەگەرلەرى اتاندى. مۇنىمەن قوسا, بيىلعى جىلى وبلىستىڭ مەكتەپ وقۋشىلارى ءتۇرلى دەڭگەيدەگى ءبىلىم باسەكەلەرىندە جاقسى جەتىستىكتەرگە قول جەتكىزىپ, ايماقتىڭ ءبىلىم سالاسىنداعى بەدەلىنىڭ ارتۋىنا وزىندىك ۇلەستەرىن قوستى. سونىمەن بىرگە, وقۋشىلار 2010-2011 وقۋ جىلىندا پاندىك وليمپيادا, عىلىمي جوبا جارىستارىنان شەت مەملەكەتتەردە دە ۇلكەن ءناتيجەگە قول جەتكىزىپ, چەحيا, گرەكيا, كيپر, تۇركيا, اقش, رەسەي, ۆەنگريا, ازەربايجان ەلدەرىندە وقۋشىلار «التىن», «كۇمىس», «قولا» مەدال يگەرلەرى اتانىپ كەلدى.
بيىل وبلىستا 9150 وقۋشى مەكتەپ ءبىتىردى. ونىڭ 77,1%-ى, ۇلتتىق بىرىڭعاي تەستىلەۋگە قاتىسۋعا ءوتىنىش بىلدىرگەن بولسا, 15 حالىقارالىق عىلىمي جوبا جارىستارىنىڭ جەڭىمپازدارى ۇبت-دان بوساتىلدى. ويتكەنى, ولار تەست تاپسىرماي-اق وزدەرى قالاعان جوعارى وقۋ ورنىنا تۇسۋگە مۇمكىندىك العان.
ايتپاقشى, تەست ناتيجەسى بويىنشا 3 وقۋشى 125 بالدان جينادى. اتاپ ايتقاندا, قازالى اۋدانىنداعى №249 مەكتەپتىڭ تۇلەگى انار كەمال مەن ارمان اقباەۆا جانە قىزىلوردا قالاسى №9 كاسىپتىك-تەحنيكالىق ليتسەيىنىڭ وقۋشىسى دەنيس فادەەۆتەر ۇزدىك كورسەتكىشپەن كوزگە ءتۇستى.
ەرجان بايتىلەس.
قىزىلوردا.