ازاتتىقتىڭ اق تاڭىنا ەسكەرتكىش. الاش يدەياسىنىڭ باستاۋى بولعان قاسيەتتى سەمەيدە الاش ارىستارىنا ەسكەرتكىش ورناتۋ تۋرالى ماسەلەنىڭ كوتەرىلگەنىنە ءبىراز جىل بولعان ەدى.
ەندى, مىنە, ەل تاۋەلسىزدىگىنىڭ 20 جىلدىق مەرەكەسى قارساڭىندا ەل كوكەيىندەگى سول يگىلىكتى شارۋاعا نۇكتە قويىلاتىن سىڭايلى. سوعان وراي رەسپۋبليكالىق كونكۋرس وتكىزىلىپ, وعان 32 جوبا اۆتورى قاتىسسا, سونىڭ ىشىنەن ءمۇسىنشى ەدىگە راحماديەۆتىڭ جوباسى جەڭىمپاز دەپ تانىلدى. سول جەڭىمپاز ءمۇسىنشى سەمەيگە كەلىپ, مۇنداعى ەلدىڭ دە ەسكەرتپەلەرىنە قۇلاق ءتۇرىپ قايتتى. ازاتتىقتىڭ اق تاڭى دەپ اتالاتىن الىپ ەسكەرتكىش جاڭا كوپىردىڭ وڭ جاعالاۋىنداعى ايشىقتى الاڭعا ورناتىلماق.
داۋلەت سەيسەن ۇلى. سەمەي.
جىلدىڭ ەڭ ۇزدىك دارىگەرى. بيىل قىزىلجار وڭىرىندە بالا ءولىمى 19, تۋبەركۋلەزگە شالدىعۋ 2,6 پايىزعا تومەندەپ, انا ءولىمى تىركەلگەن جوق. سابيلەردىڭ دۇنيەگە كەلۋ كورسەتكىشى 4 ەسەگە ارتتى. جۇرەك-قان تامىرلارى اۋرۋلارى دا ازايىپ كەلەدى. اق حالاتتى ابزال جانداردىڭ ءتول مەرەكەسى كۇنى وبلىس اكىمى سەرىك ءبىلالوۆ ونكولوگيالىق ديسپانسەردىڭ باس دارىگەرى ە. ءابدىرىموۆ پەن دەنساۋلىق ساقتاۋ سالاسىن دامىتۋ وبلىستىق فيليالى ديرەكتورىنىڭ ورىنباسارى ت.بايازيتوۆاعا «دەنساۋلىق ساقتاۋ ىسىنە قوسقانى ءۇشىن» مەدالىن تاپسىردى. ءبىر توپ دارىگەر «قازاقستان رەسپۋبليكاسىنىڭ دەنساۋلىق ساقتاۋ ءىسىنىڭ ۇزدىگى» بەلگىسىن الدى. ال دەنساۋلىق ساقتاۋ مينيسترلىگىنىڭ شەشىمىمەن وبلىستىق كارديولوگيالىق ورتالىقتىڭ ءبولىم مەڭگەرۋشىسى, مەديتسينا عىلىمدارىنىڭ كانديداتى سەرگەي چەرەدا «جىلدىڭ ەڭ ۇزدىك دارىگەرى» اتاندى.
ءومىر ەسقالي. سولتۇستىك قازاقستان وبلىسى.
باس ءمۇفتي باتاسىن بەردى. جۇما كۇنى قورعالجىن اۋدانىنداعى سابىندى اۋىلىندا جاقسىگەلدى حاميتجانوۆ اتىنداعى جاڭا مەشىت پەن مەدرەسە اشىلدى. سالتاناتتى شاراعا جينالعان جاميعاتتى قازاقستان مۇسىلماندارى ءدىني باسقارماسىنىڭ توراعاسى, باس ءمۇفتي, ورتا ازيا مۇفتيلەر كەڭەسىنىڭ توراعاسى شەيح ءابساتتار قاجى دەربىسالى, وبلىس اكىمىنىڭ ورىنباسارى اسحات قايناربەكوۆ, اۋىل اقساقالى سايلاۋبەك كاميەۆ, بيكەن اپا حاميتجانوۆا قۇتتىقتادى. حاميتجانوۆتار وتباسىنىڭ قارجىسىمەن جانە جۇرتشىلىقتىڭ دەمەۋشىلىگىمەن سالىنعان رۋحاني كەشەننىڭ اۋماعى 370 شارشى مەتردى الىپ جاتسا, مۇناراسىنىڭ بيىكتىگى 20 مەتردەن اسادى. مۇندا 170 ورىندىق ەرلەر, 70 ورىندىق نامازحانا بار. ال 70 ورىندىق مەدرەسەگە وقۋشىلار قابىلداۋ مەن ءدارىس جۇرگىزۋ «استانا-مەدرەسە» ورتالىعىنا جۇكتەلسە, وعان جۇمسالاتىن شىعىندى حاميتجانوۆ اۋلەتى كوتەرەدى.
باقبەرگەن امالبەك. اقمولا وبلىسى.
اكىمدەر دوپ تەپتى. بۇرناعى كۇنى شيەلى اۋدانىندا وبلىس اكتيۆىنىڭ كوشپەلى وتىرىسى وتكەن. ونىڭ سوڭى وبلىس اكىمدىگى مەن شيەلى اۋدانىنىڭ اكىمدىگى اراسىنداعى فۋتبولدان دوستىق كەزدەسۋگە جالعاستى. وبلىستىڭ كومانداسىن الاڭعا ايماق باسشىسى بولاتبەك قۋاندىقوۆ باستاپ شىقتى. ال قۇرامىندا جەتى اۋداننىڭ اكىمى بار شيەلىنىڭ كومانداسىنا اۋدان اكىمى نۇرلىبەك نالىباەۆ كاپيتاندىق جاسادى. جاسىل الاڭداعى ويىن تارتىستى ءوتتى. ەسەپتى الدىمەن وبلىستىڭ كومانداسى اشتى. شيەلى اۋدانىنىڭ كومانداسى دا قاراپ قالعان جوق. ناتيجەسىندە دوستاستىق كەزدەسۋ 2:1 ەسەبىمەن وبلىس كومانداسىنىڭ پايداسىنا شەشىلدى.
ەرجان بايتىلەس. قىزىلوردا وبلىسى.
جورىق برەستى بەتكە الدى. وتكەن اپتادا ۇلى وتان سوعىسى باستالعانىنا جەتپىس جىل تولۋىنا وراي موتوجورىقشىلار ورالداعى مانشۇك مامەتوۆا اتىنداعى الاڭنان برەست قالاسىنا اتتانىپ كەتتى. ولار 22 ماۋسىم كۇنى وسىندا وتەتىن سالتاناتتى شاراعا قاتىسپاق. حالىقارالىق شارانى سوعىستا حابارسىز كەتكەندەر تۋرالى مالىمەتتەر ىزدەستىرۋمەن اينالىساتىن «بەرەگ» قوعامدىق بىرلەستىگى ۇيىمداستىرىپ وتىر. سانكت-پەتەربۋرگتە قونىس تەپكەن اتالعان ۇيىمعا ورال قالاسىنىڭ تۇلەگى يگور پينچۋك جەتەكشىلىك جاسايدى. «داستۇرگە اينالىپ كەلە جاتقان حالىقارالىق موتوجورىقشىلار سايىسىنىڭ باستى ماقساتى – بوزداقتاردىڭ ەرلىگىن ۇلىقتاۋ. پاتريوتتىق تاربيەنىڭ جاڭا ءورىسىن اشۋ», دەيدى ول.
تەمىر قۇسايىن. ورال.
جەتىنشى اۋلا كلۋبى اشىلدى. وتكەن اپتانىڭ بەيسەنبىسىندە وبلىس ورتالىعى – تاراز قالاسىندا بۇلدىرشىندەرگە ارنالعان وسىمەن جەتىنشى اۋلا كلۋبى اشىلدى. بۇگىندە بايزاق باتىر كوشەسىندە تۇراتىن بالالار مەن جاقىن ماڭداعى №16 جانە №24 گيمنازيا وقۋشىلارىنىڭ قۋانىشىندا شەك جوق. ويتكەنى, «قازاقستان اۋىل جاستارى» رەسۋرستار بازاسى ورتالىعى جانىنان اشىلعان اۋلا كلۋبىندا بي, سۋرەت ۇيىرمەسى, كومپيۋتەرلىك كۋرس, ينتەرنەت جانە شاحمات, دويبى, توعىزقۇمالاق سەكتسيالارى جۇمىس ىستەيدى. وبلىس ورتالىعىنداعى بارلىق اۋلا كلۋبتارى دەمەۋشىلەر بولگەن قارجى ارقىلى جۇمىس اتقارۋدا.
كوسەمالى ساتتىباي ۇلى. تاراز.
سپورتشىلار زاۋىت جۇلدەسىن ءبولىستى. وتكەن اپتادا اقسۋ قالاسىندا «قازحروم» ترانسۇلتتىق كومپانياسى» اق-قا قاراستى فەرروقورىتپا زاۋىتىنىڭ سپورت كەشەنىندە ءوندىرىس ورىندارى اراسىنداعى 8-ءشى جازعى سپورتتىق ويىن تۇرلەرىنەن جارىس بولىپ ءوتتى. وعان ەلىمىزدىڭ وندىرىستىك كومپانيالارىمەن قاتار, رەسەيدىڭ سەروۆسك فەرروقورىتپا زاۋىتىنان كەلگەن بارلىعى 400-دەي سپورتشى قاتىستى. حالقىمىزدىڭ ۇلتتىق سالت-داستۇرلەرىنە ساي ورنەكتەلگەن كەشەن ىشىندەگى سپورت مەرەكەسى شاشۋ شاشىلىپ, «قاراجورعا» بيلەپ بارىپ باستالدى. الاۋ وتى جاعىلدى. «كازحروم» مەتاللۋرگيانىڭ كوشباسشىسى عانا ەمەس, سپورت پەن الەۋمەتتىك سالانى دامىتۋدا دا الدا كەلەدى. ءسويتىپ, بۇل جولى دا اقسۋلىق زاۋىت سپورتشىلارى جۇلدەلى ورىندى يەلەندى.
فاريدا بىقاي. پاۆلودار وبلىسى.