سوڭعى ءبىر-ەكى جىلدان بەرى ەلىمىزدىڭ شىعىسىندا وبلىس اكىمى بەردىبەك ساپارباەۆتىڭ باستاماسىمەن «تۋعان جەرگە تاعزىم» اكتسياسى تۇراقتى ءتۇردە جۇرگىزىلىپ كەلەدى. وسى يگىلىكتى شارادان اباي اۋدانى دا سىرت قالىپ وتىرعان جوق. اتالعان اۋداننىڭ تىزگىنىن جاڭادا عانا قولعا العان تۇرسىنعازى ءمۇساپىربەكوۆ تە اكتسيا اياسىندا بىردەن ماڭىزدى شارۋاعا قىزۋ كىرىسىپ كەتتى.
اكىم باستاماسىمەن جۋىردا وسى وڭىردەن شىققان ەسىمى ەلگە كەڭىنەن تانىمال ازاماتتار اۋدان ورتالىعى – قاراۋىلدا باسقوسىپ, تۋعان جەردى تۇلەتۋ ماقساتىندا كەڭىنەن پىكىر الماستى. ءبىر قۋانارلىق ءجايت سول, اۋدانداعى كەلەلى ماسەلەلەردەن وزگە دە كەيبىر ازاماتتار سىرت قالمادى.
اۋدان اكىمى, ەڭ الدىمەن, قازىردە اتقارىلىپ جاتقان يگى ىستەرگە توقتالدى. ايتالىق, اۋدان ورتالىعىندا بۇرىنعى «ارمان» كينوتەاترى قايتادان جوندەۋدەن ءوتكىزىلۋدە. ول ەندى جاستار ءۇيى بولىپ اشىلماق. مۇندا, سونداي-اق سپورت زالى مەن الاڭى جاساقتالىپ جاتقان كورىنەدى. اۋدانعا كىرە بەرىستە اعاشتار وتىرعىزىلىپ, ساياباق اشىلۋى دا وڭدى شارۋا بولدى. «انا مەن بالا» گۇلزارىنىڭ اشىلۋىن دا قۇپتاماسقا بولمايدى. وسىنداعى اۋەزوۆ ەسكەرتكىشى جوندەۋدەن وتكىزىلۋدە.
ال جەكەلەگەن اۋىلدارعا كەلسەك, ولاردا دا وڭدى ىستەر جوق ەمەس. ماسەلەن, مەدەۋ اۋىلىندا كلۋب ءۇيى جوندەلىپ جاتىر ەكەن. سارجال اۋىلىندا سۋ قۇبىرى تارتىلۋدا. امانتاي مۇقاتاەۆ, سايلاۋ كوشكين سەكىلدى ەل ازاماتتارى حاكىم ابايدىڭ ەڭ جاقىن شاكىرتتەرىنىڭ ءبىرى كوكبايدىڭ كەسەنەسى مەن مۇراجايىن جوندەتىپ بەرەمىز دەپ وتىر. ال بيىلعى جىلى كوكباي اقىننىڭ تۋعانىنا 150 جىل تولسا, ول دا ءوز دارەجەسىندە اتاپ وتىلمەك.
قاراۋىلدا بۇگىنگى كۇنى دۇرىس قوناق ءۇي, اسحانا, تويحانا جوق. سوعان وراي, شاكارىم اتىنداعى سەمەي مەملەكەتتىك ۋنيۆەرسيتەتىنىڭ رەكتورى ەرلان سىدىقوۆ وسىندا ءوز قاراجاتىنا قوناق ءۇي سالىپ بەرۋگە ۋادە ەتتى.
داۋلەت سەيسەن ۇلى.
سەمەي.