پرەزيدەنتتىك مادەنيەت ورتالىعىنىڭ كورمە زالىندا سۋرەتشى تاڭسىق ءماجيتوۆانىڭ «ادام. ۋاقىت. ءداۋىر» اتتى جەكە كورمەسى اشىلدى.
بەلگىلى تۇلعالاردى بەينەلەيتىن كورمەدە پورترەتتەر قاز-قاتار ءتىزىلىپ تۇر. قۇددى ءبىر پورترەتتەر گالەرەياسى دەرسىڭ. تاعى ءبىر قىزىعى – ولاردىڭ ەشقايسىسى التىندالعان راماعا سالىنباعان. سويتسەك, ول جۇرت نازارىنا ۇسىنىلعان ەڭبەكتىڭ تابيعيلىعى مەن سۋرەتشىنىڭ ەرەكشەلىگىن بىلدىرەدى ەكەن. بۇل ءۇردىستى سوڭعى جىلدارى ەۋروپا ءجيى قولداناتىن كورىنەدى. تاڭسىق ءماجيتوۆانىڭ پورترەتتەر گالەرەياسى قازاقستاننىڭ حالىق جازۋشىسى ءابىش كەكىلباەۆتان باستالىپتى. ودان ءارى جەزتاڭداي ءانشى بيبىگۇل تولەگەنوۆا, اتاقتى اكتەر ءاسانالى ءاشىموۆ, كورنەكتى عالىم, زاڭگەر سالىق زيمانوۆ, تۇڭعىش عارىشكەر توقتار اۋباكىروۆ, اقىن فاريزا وڭعارسىنوۆا جانە باسقا دا مەملەكەت قايراتكەرلەرى مەن سپورت شەبەرلەرىنىڭ سۋرەتتەرى بولىپ جالعاسىپ كەتە بەرەدى. بۇل پورترەتتەردە سۋرەتشى ءومىردەگى ءاربىر كورىنىستى نازىك سەزىنە كەلە, ادامنىڭ مىنەز-قۇلقىن, ءتىپتى كەيىپكەردىڭ ءوزى سەزىپ-بىلە بەرمەيتىن ەرەكشەلىكتەرىن دە اشا بىلگەن.
كورمەنىڭ اشىلۋىنان كەيىن بىزگە سۋرەتشىگە جولىعىپ, بىرەر سۇراق قويۋدىڭ ءساتى تۇسكەن.
– پورترەتتەردى سالۋ بارىسىندا قانداي ماقسات ۇستاندىڭىز؟
– بيىل ەل تاۋەلسىزدىگىنە 20 جىل تولادى. مەنىڭ سۋرەتتەرىمنىڭ يدەياسى دا وسى مەرەكە تاقىرىبىمەن استاسىپ جاتىر. ءويتكەنى, كەز كەلگەن ءداۋىر تىنىسىن ادام جاسايدى. ياعني, تۇلعالار ارقىلى ءداۋىردى قابىلدايمىز, سەزىنە الامىز. مەن دە وسى تۇلعالاردىڭ پورترەتتەرى ارقىلى كورمەنى تاماشالاۋشىلارعا قازاقستاننىڭ 20 جىلدىق كەزەڭىنىڭ تىنىسىن جەتكىزگىم كەلدى. وندا دا حالىققا جاقىن, كورەرمەندەرگە قىزىقتى, ەلىنە بەلگىلى ادامداردى سالۋعا بەل بۋدىم. قولىمنان قانشالىقتى كەلە الدى, بىلمەيمىن. باعاسىن كورەرمەندەر بەرە جاتار.
– تاڭداعان كەيىپكەرلەرىڭىز ءسىزدى قانداي قاسيەتتەرىمەن قىزىقتىردى؟
– مەن قوعامنىڭ بارلىق سالاسىن قامتۋعا تىرىستىم. ونەر, سپورت, ادەبيەت, قۇقىق, كينو, ساياسات جانە باسقا دا سالالاردا قىزمەت ىستەپ جۇرگەن جارقىن تۇلعالاردى تاڭدادىم. مىسالى, ءابىش كەكىلباەۆ, فاريزا وڭعارسىنوۆالاردى بىلمەيتىن جان كەمدە-كەم. ال جاقسىلىق ءۇشكەمپىروۆ كەڭەستىك كەزەڭدە تۇڭعىش وليمپيادا چەمپيونى اتانعان بولسا, عالىم باينازار ۇلى قازاقستاننىڭ بانك جۇيەسىنىڭ اتاسى. قازاقستانداعى بانك ءىسىنىڭ باستاۋىندا تۇرعان بۇل كىسىگە ۇلتتىق بانك جۇيەسى قارىزدار دەسەك تە بولادى. قايىربەك سۇلەيمەنوۆ بولسا, قازاقتىڭ تۇڭعىش ىشكى ىستەر ءمينيسترى. جالپى, مەن سالعان پورترەت كەيىپكەرلەرى ەل تاۋەلسىزدىگىنە ەڭبەك سىڭىرگەن تۇلعالار. باسقاشا ايتسام – سيمۆول. قازاقتىڭ سيمۆولىنا اينالعان جانداردى تىكەلەي «ءوز نۇسقالارىنان» سالدىم. ويتكەنى, پورترەت – تابيعي تۇردە سالىناتىن دۇنيە. تاعى ءبىر ەرەكشە ايتا كەتەتىن ءجايت, اسانالى ءاشىموۆ اعامىزبەن جاساعان جۇمىس ماعان وتە ۇنادى. ول كىسىمەن بىرگە وبراز ىزدەدىك. ماعان اعامىزدىڭ بەينەسى جولاۋشى-جۇرگىنشىنى ەلەستەتتى.
– بۇل كورمە باسقا قالالاردا كورسەتىلە مە؟ تاعى كىمدەردىڭ پورترەتتەرىن سالعىڭىز كەلەدى؟
– ول جاعى ءالى بەلگىسىز. جۇرت نازارىنا ەندى ۇسىنىلىپ جاتىر عوي, جۇرت ىقىلاسى قانداي بولماقتىعىن كەيىنىرەك ايتۋ كەرەك سياقتى.
كورمەگە تاماشالاۋعا كەلگەن ورالباي ابدىكارىموۆ, فاريزا وڭعارسىنوۆا, مىرزاتاي جولداسبەكوۆ, قۋانىش سۇلتانوۆ, ساۋىتبەك ابدراحمانوۆ سەكىلدى زيالى قاۋىم وكىلدەرى ءوز پىكىرلەرى مەن سۇيسىنىستەرىن, سونداي-اق سۋرەتشى قولتاڭباسى تۋرالى ءوز ويلارىن ءبىر-بىرىمەن ءبولىسىپ جاتتى.
مىڭجىلدىق باسىنداعى قازاقستاننىڭ ولشەۋسىز رۋحاني بايلىعىن, جارقىن بولاشاققا دەگەن ۇمتىلىسى مەن سەنىمىن كوز الدىڭىزعا اكەلەتىن پورترەتتىك گالەرەيا كورەرمەندەر نازارىنا 27 ماۋسىمعا دەيىن ۇسىنىلماق.
ۆەنەرا تۇگەلباي.
سۋرەتتەردى تۇسىرگەن ورىنباي بالمۇرات.