ۇلتىمىزدىڭ ۇلى پەرزەنتى, الاشتىڭ اقيىق اقىنى قاسىم امانجولوۆتىڭ عاسىرلىق تويى قارساڭىندا تاعى ءبىر ءسۇيىنشى حابار جەتتى. عالامتور كەڭىستىگىندە www.qasym.kz مەكەنجايى بويىنشا «قاسىم» ادەبي سايت-پورتالى اشىلدى. جاڭا جوبا قاراعاندى وبلىسى اكىمدىگىنىڭ قولداۋى جانە قاراعاندىداعى «بولاشاق» ۋنيۆەرسيتەتىنىڭ باستاماسىمەن قۇرىلعان.
ەندى جاھاندىق جەلىنى پايدالانۋشىلار «قاسىم» پورتالىنان اقىننىڭ تاعدىرى مەن جاسامپاز شىعارماشىلىعى جايىندا تولىققاندى اقپارات الا الادى. تارقاتىپ ايتساق, داۋىلپاز اقىنعا ارنالعان پورتال «قاسىم-تاعدىر», «پوەزيا», «اۋدارمالار», «كوسەمسوز», «دراما», «...ءوز جايىمدا», «قاسىمتانۋ», «ءبىر كۇي بار», «قاسىم-الەم», «دۇنيەگە كەلەر ءالى...», «فوتوشەجىرە», «بەينەبايان» سياقتى بولىمدەردەن تۇرادى. ءاربىر ءبولىمنىڭ مايەكتى ماقالالارى, ءسۇبەلى ويلارى جانە سۇيەكتى ۇسىنىستارى قاسىمشىل وقىرماندى بەيجاي قالدىرماسى انىق. سونداي-اق, ازاتتىقتىڭ ارىندى اقىنىنا ارنالعان ادەبي پورتالدان ق.امانجولوۆتىڭ 100 جىلدىعىنا وراي رەسپۋبليكا كولەمىندە ءوتىپ جاتقان ءىس-شارالار جايلى بىلۋگە بولادى. قاسىمتانۋشىلاردىڭ سونى دەرەكتەرى مەن زەردەلى زەرتتەۋلەرى, اتاقتى عالىمدار مەن قوعام قايراتكەرلەرىنىڭ ۇزىك ويلارى نازاردان تىس قالماعان. سوندىقتان اتاۋلى سايت جاس ۇرپاقتىڭ رۋحاني كوكجيەگىن كەڭەيتىپ قانا قويماي, جانارتاۋ اقىننىڭ جىرىن ءاربىر جۇرەككە ۇيالاتارى ءسوزسىز.
پورتالدىڭ اقىلداستار القاسىندا قازاقستان جازۋشىلار وداعى توراعاسىنىڭ ءبىرىنشى ورىنباسارى, حالىقارالىق «الاش» سىيلىعىنىڭ لاۋرەاتى عالىم جايلىباي, جازۋشىلار وداعى قاراعاندى وبلىستىق بولىمشەسىنىڭ توراعاسى, اقىن سەرىك اقسۇڭقار ۇلى, «بولاشاق» ۋنيۆەرسيتەتىنىڭ رەكتورى, يدەيا اۆتورى نۇرلان دۋلاتبەكوۆ, قاراعاندى وبلىسى اكىمىنىڭ ورىنباسارى ارمان قىرىقباەۆ, وبلىستىق «ورتالىق قازاقستان» گازەتىنىڭ باس رەداكتورى ماعاۋيا سەمباي, «نۇراستانا» گازەتى باس رەداكتورىنىڭ ورىنباسارى امانگەلدى كەڭشىلىك ۇلى, «قازاقفيلم» كينوستۋدياسىنىڭ باس رەداكتورى, جازۋشى ديدار امانتاي جانە باسقا دا بەلگىلى ازاماتتار بار.
ارينە, بۇگىنگىدەي اقپارات نارىعى مەن يننوۆاتسيا زامانىندا «قاسىم» ادەبي پورتالىنىڭ اشىلۋى زاڭدى قۇبىلىس. ق.امانجولوۆ عۇمىرى مەن پوەزياسىنىڭ اقتاڭداق بەتتەرىن اقتارساق, ءالى تالاي جايدىڭ بەتى اشىلارى انىق. ولاي بولسا, قازاق عالامتورىندا «قاسىم» پورتالىنىڭ ءوز ورنىن الاتىنىنا سەنىم مول.
دۋلات امانجول.
قاراعاندى.