ورال قالاسىندا ءوڭىردىڭ دەنساۋلىق ساقتاۋ سالاسىنىڭ تاريحى مەن بۇگىنگى جاي-كۇيىنە ارنالعان قوس بىردەي شارانىڭ تۇساۋكەسەر ءراسىمى وتكىزىلدى. مۇنىڭ ءبىرىنشىسى, وبلىستىق كلينيكالىق اۋرۋحانانىڭ جانىنان اشىلعان مەديتسينالىق مۇراجاي. ەكىنشىسى, «باتىس قازاقستان وبلىسى دەنساۋلىق ساقتاۋ سالاسىنىڭ دامۋ كەزەڭدەرى» اتتى تاريحي وچەركتەر جيناعى. مەديتسينالىق مۇراجايعا سالانىڭ وتكەنى مەن ءبۇگىنگىسىنەن سىر شەرتەتىن اسا قۇندى ەكسپوناتتار قويىلعان. بۇل ءجادىگەرلەر 1917 جىلعا دەيىنگى كەزەڭدى, كەڭەستىك ءداۋىردى جانە ەلدىڭ تاۋەلسىزدىك العاننان كەيىنگى سوڭعى جيىرما جىلىنىڭ ارالىعىن قامتيدى.
ايتالىق, مۇراجايداعى سوناۋ XIX عاسىردىڭ باسىندا, بوكەي حاندىعىندا اشىلعان اۋرۋحانادا قولدانىلعان كونە مەديتسينالىق اپپاراتتاردىڭ ءۇلگىلەرى وعان كەلۋشىلەردىڭ ۇلكەن قىزىعۋشىلىعىن تۋعىزۋدا. مۇنداعى تانىس تا, بەيتانىس قوندىرعىلار ەشكىمدى دە سەلقوس قالدىرا المايدى. كەڭەستىك كەزەڭدە قولدانىستا بولعان امبۋ قاپشىعى, ەلەكترلىك لارينگوسكوپ, جەدەل ءجاردەم سومكەسى, جاساندى بۇيرەك قوندىرعىسى سەكىلدى سىرى كەتسە دە سىنى كەتپەگەن بۇيىمداردا ۇقىپتى دا جاناشىر قولداردىڭ ىزدەرى بايقالادى. سونداي-اق تاۋەلسىزدىك جىلدارى تۇتاستاي ەلىمىزدىڭ, سونىڭ ىشىندە ورال ءوڭىرىنىڭ دەنساۋلىق ساقتاۋ سالاسى جەدەل ءارى تۇراقتى دامۋ جولىنا قالاي تۇسكەنىن ايعاقتايتىن ەكسپوناتتار دا مۇراجايدىڭ كورنەكى جەرىنەن ورىن العان.
ال جوعارىدا اتالعان تاريحي وچەركتەر جيناعى ايماقتاعى مەديتسينالىق ۇيىمداردىڭ قالىپتاسۋ كەزەڭدەرى مەن ەۆوليۋتسيالىق ساتىلارىنىڭ جىلناماسى ءارى شەجىرەسى ىسپەتتەس. مۇندا ولاردىڭ العاش اشىلعان ءساتى مەن بۇگىنگى كۇنگە دەيىنگى تىنىس-تىرشىلىگى تۇتاستاي قامتىلعان. ءوڭىردەگى دەنساۋلىق ساقتاۋ سالاسىنىڭ دامۋىنا ايرىقشا ۇلەس قوسقان ماماندار مەن دارىگەرلەر ءجونىندە جازىلعان ءومىرباياندىق ءارى تانىمدىق سيپاتتاعى ماتەريالدار دا مول. ولاردىڭ ءىس-ءتاجىريبەلەرى مەن كاسىبي بىلىكتىلىگى ءجونىندەگى وچەركتەر كوركەم دە تۇسىنىكتى تىلمەن باياندالعان.
ارينە, ءوڭىر مەديتسيناسىنىڭ وسىنداي تاعىلىمدى تاريحىندا وتاندىق مەديتسيناعا بۇگىنگى زامانعى تەحنولوگيالار مەن قۇرال-جابدىقتار ەنگىزىلۋىنىڭ جانە دياگنوستيكالىق تاسىلدەر مەن ەمدەۋدىڭ سوڭعى جەتىستىكتەرىنىڭ الاتىن ورنى قوماقتى. بۇل جونىندە مۇراجايدان دا, ارنايى شىعارىلعان جيناقتان دا مول ماعلۇماتتار الۋعا بولادى. سونىمەن بىرگە مۇندا تۇرعىنداردى مەديتسينالىق تۇرعىدان قامتۋ ءىسىنىڭ جىل وتكەن سايىن جەتىلدىرىلىپ كەلە جاتقانىن ايعاقتايتىن دەرەكتەر مەن دايەكتەر دە جەتكىلىكتى.
مەديتسينالىق مۇراجايدىڭ تۇساۋكەسەر راسىمىنە قاتىسقان باتىس قازاقستان وبلىسى اكىمىنىڭ ءبىرىنشى ورىنباسارى نۇرلان نوعاەۆ رەسپۋبليكادا بالاماسى جوق ەرەكشە سالالىق مۇراجاي اشۋعا جانە كولەمدى ارنايى باسىلىم شىعارۋعا باستاماشى بولعان باتىس قازاقستان وبلىسى دەنساۋلىق ساقتاۋ باسقارماسىنىڭ باستىعى حاميدوللا يرمەنوۆكە ءوز ريزاشىلىعىن جەتكىزدى.
تەمىر قۇسايىن, باتىس قازاقستان وبلىسى.