الماتىدا «نۇربانك» اق-تىڭ توپ-مەنەدجەرلەرى جولداس تەمىراليەۆ پەن ايبار حاسەنوۆتى قاساقانا ءولتىرۋ فاكتىسى بويىنشا قوزعالعان قىلمىستىق ءىستى تەرگەۋ ناتيجەلەرىنە ارنالعان ءباسپاسوز ءماسليحاتى بولىپ ءوتتى. ىشكى ىستەر مينيسترلىگىنىڭ الماتى قالاسىنداعى وكىلدىگىنىڭ عيماراتىندا وتكەن جيىنعا باس پروكۋراتۋرانىڭ تەرگەۋ زاڭدىلىعىن قاداعالاۋ جانە تەرگەۋ جۇرگىزۋ دەپارتامەنتىنىڭ باستىعى نۇرمۇحان يساەۆ, ءىىم تەرگەۋ كوميتەتى باسقارماسىنىڭ باستىعى گاشي ماشانلو, بەرلين مەديتسينا ۋنيۆەرسيتەتى «شاريتە» قۇقىقتىق مەديتسينا ينستيتۋتىنىڭ ديرەكتورى, پروفەسسور ميحاەل تسوكوس جانە باسقالار قاتىستى.
جيىندا ءسوز العان باس پروكۋراتۋرانىڭ تەرگەۋ زاڭدىلىعىن قاداعالاۋ جانە تەرگەۋ جۇرگىزۋ دەپارتامەنتىنىڭ باستىعى نۇرمۇحان يساەۆ جينالعاندارعا قۇرامىندا ر.اليەۆ, ۆ.كوشلياك جانە ق.اكىمقۇلوۆ بار قىلمىستىق توپتىڭ ۇيىمداستىرۋىمەن بولعان جانتۇرشىگەرلىك قىلمىس جانە وسى قىلمىستىق ىسكە بايلانىستى تەرگەۋ قورىتىندىلارى تۋرالى جان-جاقتى بايانداپ بەردى.
– كوپشىلىككە بەلگىلى, «نۇربانكتىڭ» توپ-مەنەدجەرلەرى ج.تەمىراليەۆ پەن ا.حاسەنوۆتىڭ ءمايىتتەرىنىڭ تابىلعانى جونىندە باسپاسوزدە كەڭىنەن جازىلدى. بۇگىنگى باسقوسۋدا سول قىلمىستىق ىسكە بايلانىستى جۇرگىزىلگەن تەرگەۋ جۇمىستارىنىڭ قورىتىندىسىن, ياعني ساراپتاما ءناتيجەلەرىن ايتپاقپىز. 2007 جىلدىڭ 31 قاڭتارىندا ر.اليەۆتىڭ, ۆ.كوشلياكتىڭ جانە ق.اكىمقۇلوۆتىڭ باسشىلىعىنداعى قىلمىستىق توپتىڭ مۇشەلەرى سول بانك باسقارما توراعاسىنىڭ بۇرىنعى ورىنباسارى ج.تەمىراليەۆ پەن اكىمشىلىك-شارۋاشىلىق باسقارماسىنىڭ بۇرىنعى باستىعى ا.حاسەنوۆتى ۇرلاعان بولاتىن.
مىنە, وسى فاكت بويىنشا الماتى قالالىق ءىىد قىلمىستىق كودەكستىڭ 125-بابىنىڭ 3-بولىگىمەن (ادام ۇرلاۋ) جانە 235-بابىنىڭ 1-بولىگىمەن (ۇيىمداسقان قىلمىستىق توپ قۇرۋ جانە ونى باسقارۋ) كوزدەلگەن قىلمىس بەلگىلەرى بويىنشا قىلمىستىق ءىس قوزعاعان ەدى. ال, ەندى بۇل قىلمىستىق ءىستى تەرگەۋ 2007 جىلدىڭ كۇزىندە اياقتالىپ, كەلەر جىلدىڭ قاڭتار ايىندا ر.اليەۆ, ۆ.كوشلياك, ق.اكىمقۇلوۆ جانە وزگە دە ادامدار وسى, سونداي-اق باسقا دا بىرقاتار قىلمىستارى ءۇشىن الماتى قالاسى المالى اۋداندىق سوتىنىڭ ۇكىمىمەن سوتتالعاندىعى بارشاعا ءمالىم. ادام ۇرلاۋ فاكتىسىن تەرگەۋ كەزىندە-اق قك-ءنىڭ 99-بابىنىڭ 2-بولىگىنىڭ (قاساقانا ادام ءولتىرۋ) بەلگىلەرى بويىنشا قىلمىستىق ءىس قوزعالدى. ءويتكەنى, سول كەزدىڭ ءوزىندە تەرگەۋ ورىندارىندا جابىرلەنۋشىلەر قىلمىسكەرلەر قۇرباندىعىنا اينالدى دەپ ۇيعارۋىنا نەگىز بولدى. قىلمىستىق قۋدالاۋ ورگاندارى ۇرلانعانداردىڭ قاي جەردە ەكەندىگىن انىقتاۋ باعىتىنداعى ءىس-شارالاردى ءتورت جىل بويى جالعاستىردى. اتاپ ايتارلىعى, جاقىندا عانا, ياعني 12 مامىردا الماتى قالاسىنىڭ رەميزوۆ شاتقالىنىڭ جانىنان تەمىراليەۆ پەن حاسەنوۆتىڭ مايىتتەرى تابىلدى, – دەدى نۇرمۇحان مولدالى ۇلى.
انىعىراق ايتقاندا, ولاردىڭ ءمايىتى ءال-فارابي داڭعىلى, 16 «ب» مەكەن-جايىندا ورنالاسقان «قازتەلەراديو» اق قويما بازاسىنىڭ بەتوندى قورشاۋىنان شىعىسقا قاراي ون مەتر قاشىقتىق شاماسىندا, قۇرىلىس قوقىستارىن توگۋگە ارنالعان ارنايى شۇڭقىردا, ءۇش-ءتورت مەتر تەرەڭدىكتە تەمىر بوشكەنىڭ ىشىنەن تابىلعان. سىيىمدىلىعى 200 ليترلىك اك سالىنعان تەمىر بوشكەنىڭ ىشىنەن بەلگىسىز ادامنىڭ جارتىلاي سكەلەتتەلگەن ءمايىتى شىقتى. ءمايىتتىڭ باسىنداعى قارا ءتۇستى توقىما باس كيىمنىڭ ءۇستىنەن پوليەتيلەندى پاكەت كيگىزىلىپ, ءمايىتتىڭ موينى جەلى سىمىمەن تارتىلىپ بايلانعان. «وقيعا بولعان جەردى ودان ءارى قاراۋ كەزىندە ەرتەڭىنە, ياعني 13 مامىر كۇنى تاعى دا ءبىر ىشىنە اك سالىنعان 200 ليترلىك تەمىر بوشكەنىڭ ىشىنەن بەلگىسىز ادامنىڭ جارتىلاي سكەلەتتەلگەن ءمايىتى تابىلدى», دەدى ءوز ءسوزىن ودان ءارى جالعاستىرعان باس پروكۋراتۋرا وكىلى نۇرمۇحان يساەۆ.
ج.تەمىراليەۆ پەن ا.حاسەنوۆتى قاتىگەزدىكپەن ءولتىرۋ فاكتىسىنە بايلانىستى جۇرگىزىلگەن تەرگەۋ جۇمىستارى, سونداي-اق سوت-ءدارىگەرلىك ساراپتاما ءناتيجەلەرى ءبىرقاتار كۇماندى سەيىلتىپ, اقيقاتتىڭ بەتىن اشتى. باسپاسوز ءماسليحاتىنا قاتىسقان نۇرمۇحان يساەۆ, گاشي ماشانلو, ميحاەل تسوكوس جانە باسقالار اۋقىمدى ءارى بۇلتارتپاس ناقتى ءمالىمەتتەردى جاريا ەتتى.
سونىمەن, سالا باسشىلارىنىڭ ايتۋىنشا, تەرگەۋ جۇمىستارى تولىقتاي اياقتالعان. قىلمىسكەرلەرگە حالىقارالىق ىزدەۋ جاريالانىپ, ەكستراديتسياعا سۇراۋ جولدانعان.
باقىت بالعارينا,
الماتى.