مۇنايلى وڭىردە جۇمىس ىستەپ جاتقان رەسەيدىڭ «لۋكويل» كومپانياسى 2010 جىلدان باستاپ, اۋىلدى اجارلاندىرۋعا ارنالعان «اراي» الەۋمەتتىك باعدارلاماسىن وبلىستا ءبىرىنشى بولىپ مۇعالجار اۋدانىندا جۇزەگە اسىرۋدى قولعا الدى. ءناتيجەسىندە 45 ملن. تەڭگە بولاتىن 57 جوبا جەڭىمپاز دەپ تانىلىپ, وسىنشاما كاسىپكەر ءوز ءىسىن اشىپ, جۇمىستارىن جانداندىرىپ كەتتى. كومپانيا بيىل وسى «اراي» الەۋمەتتىك باعدارلاماسىنىڭ كوكجيەگىن كەڭەيتە ءتۇستى. بۇل جوبا مۇعالجار اۋدانىمەن قاتار, بايعانين, تەمىر اۋداندارىندا دا جۇزەگە اسىرىلاتىن بولدى. باعدارلامانىڭ ءبىر ەرەكشەلىگى, حالىقتىڭ از قامتىلعان توبىن – ورالمانداردى, مۇمكىندىگى شەكتەۋلى جانداردى, كوپ بالالى وتباسىلار مەن جۇمىسسىزداردى قامتيتىندىعىندا دەۋ ورىندى.
ۇستىمىزدەگى جىلى كومپانيانىڭ 850 مىڭ تەڭگەگە دەيىن وتەۋسىز بەرىلەتىن گرانتتارىنا يە بولۋ ءۇشىن جاريالانعان كونكۋرسقا وسى ءۇش اۋداننان 1080 ءوتىنىش ءتۇسىپ, سونىڭ 95-ءى جەڭىمپاز بولدى. عازيزا جۇبانوۆا اتىنداعى وبلىستىق فيلارمونيادا كونكۋرس جەڭىمپازدارىنا گرانت سەرتيفيكاتتارى سالتاناتتى جاعدايدا تابىس ەتىلدى. كومپانيا كومەگىمەن وبلىستا قوسىمشا 15 مال, 4 قۇس وسىرەتىن فەرما,14 شاشتاراز, 13 تىگىن تسەحى, 7 اياق كيىم جوندەۋ شەبەرحاناسى, 4 ناۋبايحانا مەن كونديتەر تسەحى, 4 كومپيۋتەر ورتالىعى, 2 ديىرمەن جانە باسقا كوپتەگەن شاعىن كاسىپكەرلىك نىساندارىن اشۋعا مۇمكىندىك تۋدى. سونىمەن بىرگە, الداعى ۋاقىتتا كومپانيا جۇمىس ىستەيتىن اۋداندارداعى اۋىلدىق جەرلەردە مال دارىگەرلىك ەمحانا, ۇگۋ بولمەسى, قۋىرشاق تەاترى, پەردە, پلاستيك جانە شلاكتى-بەتون بۇيىمدارىن شىعاراتىن تسەحتار, اعىلشىن ءتىلىن وقىپ-ۇيرەنۋ ورتالىقتارى, ءدارىحانا سياقتى مەكەمەلەر حالىققا قىزمەت كورسەتەتىن بولدى.
– ءبىزدىڭ اۋىلدان التى ادام كومپانيانىڭ وتەۋسىز بەرىلەتىن گرانتىن جەڭىپ الدى. ولاردىڭ ءبارى دە حالىقتىڭ الەۋمەتتىك ءالسىز توبىنا جاتادى. ەكى ادام ۇلتتىق كيىم جانە باسقا بۇيىمدار تىگەتىن تسەح, ال قالعاندارى اياقكيىم شەبەرحاناسىن, شاشتاراز, قولونەر بۇيىمدارىن جاسايتىن تسەح جانە مال وسىرەتىن شاعىن فەرما اشۋعا تالاپتانىپ وتىر. بۇل باعدارلاما جۇمىسسىزداردى كەمىتۋگە, اسىرەسە, ءوز ءىسىن اشۋعا بانكتەن نەسيە الۋعا مۇمكىندىگى جوق از قامتىلعانداردىڭ قاتارعا قوسىلىپ كەتۋىنە مۇمكىندىك بەرەدى. وڭىردە جۇمىس ىستەيتىن شەتەلدىك كومپانيالاردىڭ ءبارى وسىنداي قادامدارعا بارسا, اۋىلدىق جەردىڭ شىرايى كىرىپ, تۇرمىسى تۇزەلەر ەدى,– دەيدى بايعانين اۋدانى كولتابان سەلولىق وكرۋگىنىڭ اكىمى سۇلەيمەن ءبىتىمباي.
جالپى, «اراي» الەۋمەتتىك باعدارلاماسى اۋىل تۇرعىندارىنىڭ ءال-اۋقاتىن كوتەرۋگە, اۋىل كاسىپكەرلەرىنىڭ ىسكەرلىك جانە شىعارماشىلىق بەلسەندىلىگىن ارتتىرۋعا, جاڭا جۇمىس ورىندارىن اشۋعا ىقپال ەتەدى, شاعىن بيزنەستىڭ دامۋىنا, حالىقتىڭ ەڭبەكپەن قامتىلۋىنا, ەلدى مەكەندەردە ينفراقۇرىلىمنىڭ قالىپتاسۋىنا بەرىك نەگىز قالايدى. سوندىقتان دا بۇل باعدارلاما وبلىس اكىمدىگى مەن حالىقتان زور قولداۋعا يە بولىپ وتىر.
ساتىبالدى ءساۋىرباي.
اقتوبە وبلىسى.