پرەزيدەنت بىرقاتار اسكەري قىزمەتشىگە گەنەرال شەنىن تابىستادى

مەملەكەت باسشىسى تاۋەلسىزدىك جىلدارىندا قازاقستان اسكەرىنىڭ كاسىبي بىلىكتىلىگى ارتقانىنا توقتالىپ, ونىڭ قاتارىنداعى ەڭ لايىقتى ازاماتتاردىڭ جوعارى اتاقتارعا يە بولىپ كەلە جاتقانىن ايتتى.  «بۇگىنگى ءراسىمنىڭ قازاقستان قارۋلى كۇشتەرىنىڭ 25 جىلدىعى قارساڭىندا ءوتۋىنىڭ ەرەكشە سيمۆولدىق ءمانى بار. بۇل – ەل ەگەمەندىگىنىڭ سەنىمدى كەپىلىنە اينالعان ايبىندى ارميامىز ءۇشىن ماڭىزدى تاريحي بەلەس. ونىڭ الەۋەتى تاۋەلسىزدىك جىلدارىندا اسكەري رەفورمالاردىڭ, قارۋ-جاراق پەن تەحنيكانىڭ جۇيەلى جاڭارتىلۋىنىڭ ارقاسىندا ايتارلىقتاي نىعايدى», – دەدى نۇرسۇلتان نازارباەۆ.  قازاقستان پرەزيدەنتى جاڭا جاھاندىق قاۋىپ-قاتەرلەر جاعدايىندا ەلىمىزدىڭ قاۋىپسىزدىك پەن قورعانىس سالاسىنداعى بارلىق قۇرىلىمدارىنىڭ كاسىبي جانە جاۋىنگەرلىك دايىندىعىنىڭ جوعارى دەڭگەيدە بولۋىن قامتاماسىز ەتۋ قاجەتتىگىنە نازار اۋدارىپ, بۇل رەتتە كومانديرلەر كورپۋسىنىڭ ەرەكشە ءرولىن اتاپ ءوتتى.  «سىزدەر جاۋىنگەرلىك ونەگەلى ءۇردىستى, بابالاردىڭ ەرلىك ءداستۇرىن جالعاستىرىپ, بارلىق جەكە قۇرام ءۇشىن قالتقىسىز قىزمەتتىڭ ۇلگىسىن كورسەتىپ كەلەسىزدەر. اسكەري دايىندىق دەڭگەيىنىڭ ارتۋى, اسكەردەگى جانە قۇقىق قورعاۋ ورگاندارىنداعى ءمىنسىز احۋال سىزدەردىڭ باسشىلىق ەتۋ ءىسىن ساۋاتتى جۇرگىزۋلەرىڭىزگە بايلانىستى. كۇش-قۋاتتارىڭىز, بىلىمدەرىڭىز بەن تاجىريبەلەرىڭىز قاۋىپسىزدىكتى قامتاماسىز ەتۋگە, قۇقىقتىق ءتارتىپتى, ەلىمىزدىڭ كونستيتۋتسيالىق قۇرىلىمىن ساقتاۋعا باعىتتالۋعا ءتيىس. سىزدەر قوعامداعى ەڭ جاۋاپتى ميسسيانى – قازاقستاندىقتاردىڭ بەيبىت ءومىرى مەن تاۋەلسىزدىگىمىزدىڭ قۇندىلىقتارىن قورعاۋ ءىسىن جۇزەگە اسىرىپ كەلەسىزدەر», – دەدى ەلباسى.  سوڭىندا مەملەكەت باسشىسى راسىمگە قاتىسۋشىلارعا زور دەنساۋلىق, باق-بەرەكە جانە تابىس تىلەدى.  ءراسىم بارىسىندا گەنەرال-لەيتەنانت اسكەري اتاعى ت.مۇحتاروۆقا, ۇلتتىق قاۋىپسىزدىك گەنەرال-لەيتەنانتى ارناۋلى اتاعى س.ابىشكە, ءا.سادىقۇلوۆقا, گەنەرال-مايور اسكەري اتاعى د.ادىربەكوۆكە, ە.الداجۇمانوۆقا, ج.احمەتوۆكە, ت.ابىشەۆكە, ت.امىريەۆكە, ۆ.بەككەرگە, س.يسمايلوۆقا, ق.قاراقۇلوۆقا, ب.قۇرمانباەۆقا, ق.تاسىبەكوۆكە, اۆياتسيا گەنەرال-مايورى اسكەري اتاعى ت.قويشىقۇلوۆقا, كونتر-ادميرال اسكەري اتاعى ق.ەسەنەەۆكە, ۇلتتىق قاۋىپسىزدىك گەنەرال-مايورى ارناۋلى اتاعى ك.ادامبەكوۆكە, پوليتسيا گەنەرال-مايورى ارناۋلى اتاعى ب.ايماعامبەتوۆكە, م.قىزىلوۆقا, 3-ساناتتاعى جوعارى بىلىكتىلىك سىنىبى ت.تاتۋباەۆقا, 3-سىنىپتى مەملەكەتتىك ادىلەت كەڭەسشىسى سىنىپتىق شەنى ق.يگەمباەۆقا, ە.سىبانقۇلوۆقا, ءا.شىنداليەۆكە بەرىلدى.