بيىل اڭساپ جەتكەن تاۋەلسىزدىگىمىزدىڭ 20 جىلدىق مەرەيىنە دەگەن يگىلىكتى ىستەر قاتارى تولىعا تۇسۋدە. ەركىن تىنىستاپ, كوك بايراعىمىزدى بيىككە كوتەرىپ, الىس-جاقىنداعى ەلدەرگە بىرلىگىمىز بەن ىنتىماعىمىزدى پاش ەتىپ كەلەمىز. بولاشاق قوعامنىڭ بەلسەندىلەرى – جاستارعا دەگەن قامقورلىقتا دا شەك جوق. تەك تالپىن, جاستىق ءجىگەرىڭدى جانى. جاناتىن جۇرەككە مۇمكىندىگىنشە قولداۋ بار. وسى ماقساتتا وتكەن جىلى تالدىقورعان قالاسىندا اشىلعان «نازارباەۆ زياتكەرلىك مەكتەبىندەگى» ءشاكىرتتەر بىلىكتى ۇستازداردان ءبىلىم الىپ, باسەكەگە قابىلەتتىلىكتەرىن دامىتۋ ۇستىندە.
مەكتەپ وقۋشىلارى ۇزدىك بىلىمدەرىمەن بىرگە, جالپى اۋماعى 3,5 گەكتار جەردى كوگالداندىرىپ, كوكتەمدە «تۇلەكتەر» اللەياسىنىڭ ىرگەتاسىن قالادى. مەكتەپ ۇستازدارى مەن شاكىرتتەرى 250 اققايىڭ كوشەتىن وتىرعىزىپ, گۇلزارلاردىڭ ورنىن بەلگىلەدى. كوكتەمنىڭ ءار كۇنىن ءتيىمدى پايدالانعان ولار ارنايى جوبا بويىنشا شىرشا, ءسامبىتال, ۇيەڭكى, روزا, تاعى باسقا كوركىنە كوز تويمايتىن سايالى اعاش وتىرعىزدى.
– بيىل ەل مەرەيىنىڭ 20 جىلدىعى مەن تالدىقورعان قالاسىنىڭ وبلىس ورتالىعى بولىپ قايتا قۇرىلعانىنا 10 جىل تولادى. ارينە, بۇل – بارشامىز ءۇشىن ءۇلكەن قۋانىش. وقۋشىلاردىڭ وي-ءورىسىن كەڭەيتىپ, ارمانعا قۇلاش ۇرۋىنا جول اشۋ ماقساتىندا ءبىلىم شاڭىراعىن كوركەيتۋدەگى ۇتىمدى, كوركەم جوبالار پايدالانىلۋدا. سونداي-اق مادەني, سپورتتىق جارىستار دا ءوتكىزىلۋدە. «مەنىڭ وتانىم – قازاقستان», «مەنىڭ پرەزيدەنتىم», «تۋعان جەر – تۇنعان تاريح», تاعى باسقا تاقىرىپتاردا كەشتەر ۇيىمداستىرىلىپ, ەلجاندىلىق قاسيەتتەرگە كەڭىنەن جول اشىلۋدا. مەكتەپتىڭ اتىنا زاتى ساي بولادى, دەيدى زياتكەرلىك مەكتەپ ديرەكتورىنىڭ ورىنباسارى ءمادينا ساتىبالدينوۆا.
كۇمىسجان بايجان.
الماتى وبلىسى.