قارتتارىم امان-ساۋ ءجۇرشى!..

«قارياسى بار ءۇي – قۇتى بار ءۇي» ەكەنى اقيقات. ابىز اقسا­قالى, شەجىرە كەۋدە اناسى بار شاڭىراققا باس سۇقساڭ اشۋلى كىتاپ, شاشۋلى قازىنانىڭ ءۇستى­نەن تۇسكەندەي بولاسىڭ. سونداي قۇت قونعان قارا شاڭىراقتىڭ ءبىرى التى ۇل, التى قىزدى ومىرگە اكەلىپ, 23 نەمەرە, 14 شوبەرەنى تاربيەلەپ وتىرعان قاسىمحان اقساقال مەن كۇلشاري اجەنىڭ ۇلگىلى وتباسى. كۇلشاري اجە. سەكسەننىڭ سەڭگىرىنە قادام باسقان قارت انا عاسىرعا جۋىق ءومىر جولىنا كوز جۇگىرتىپ, قايتا ورالماس قىز شا­عىن, ۇلكەن ءومىردىڭ تابالدى­رى­عىن جان جارى قاسىمحان اتا­مەن قاتار اتتاعان ءساتىن, ەل باسىنا بۇلت ۇيىرىلگەن زۇلمات سوعىس جىلدارى, ودان كەيىنگى تىڭ يگەرۋ, تۋ­عان جەردىڭ تو­پىراعىنا تامعان ءاربىر جاس, ءاربىر تام­شى تەردى ەسىنە العاندا يەگى دىرىلدەپ, كوز­دە­­رى­­نە جاس ءۇيى­رە­دى. قازاق دا­لا­سى الما­عا­يىپ ساياسات­تىڭ الاڭى بو­لىپ تۇرعان سوناۋ 1936 جىلى دۇنيەگە كەلىپ, ۇلكەن-كىشى ۇيىندە ەركىن كۇلە المايتىن زاماندا بالالىق شاعى باستان ءوتتى. 1941-1945 جىل­دار­داعى سوعىس كەزىندە تىلدا ما­ساق تەردى, ءشوپ جيىپ شومەلە ءۇيدى. شۇكىر, قازەكەم: «ورنىندا بار وڭالار», دەگەن عوي. اۋىرتپا­لىقتى ارتقا تاستاپ, ەل بولىپ ەس جيماققا بەت تۇزەگەن 1947 جىلى تاعدىر قوسىپ مامىتقانوۆ قا­سىم­حان ەكەۋى شاڭىراق كو­تەردى. ۇيلەندىك ەكەن, ءۇي بولدىق ەكەن دەپ وتىراتىن زامان ەمەس, سودان باستاپ زەينەت جاسىنا جەتىپ, قاريالىققا اياق باسقانشا شارۋاشىلىق­تىڭ شاشەتەك جۇمىسىمەن بەل شەشپەي ەڭبەكتەندى. 12 بالا­نى ومىرگە اكەلىپ, كەڭەس ودا­عى كەزىندە, 1966 جىلى «ار­داق­تى انا» اتاندى. ۇلدى ۇيا­عا, قىزدى قياعا قوندىرامىن دەپ جۇرگەندە قوعام وزگەرىپ, ەلىمىز ءوز الدىنا تاۋەلسىز مەم­لەكەت بولدى. ەلباسى ن.ءا. نا­زار­باەۆ­تىڭ جارلىعىمەن قارت انانىڭ ومىراۋىنا «التىن القا» تاعىل­دى. وتاعاسى قاسىمحان اتامەن شاڭىراق كوتەرگەندەرىنە 60 جىل تولىپ, نەمەرە مەن شوبەرەنىڭ ورتاسىندا 80 جاسىن تويلاپ وتىرعان كۇلشاري اجە وتكەنگە كوڭىل جۇگىرتىپ, بولاشاققا كوز تىگىپ وتىرعان قارت تاريح ىسپەتتى. قانات ەسكەندىر, جۋرناليست.