ەل تاۋەلسىزدىگىنىڭ 20 جىلدىعىنا ارنالعان يگى شارالار قىزىلجار وڭىرىندە ودان ءارى جالعاسا تۇسۋدە. سولاردىڭ ءبىرىنىڭ تۇساۋى قازاقستان پرەزيدەنتى جانىنداعى ايەلدەر ءىسى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا, قازاقستان ىسكەر ايەلدەر قاۋىمداستىعى جانە «حابار» اگەنتتىگىنىڭ ۇيىمداستىرۋىمەن وتكەن «جاسىل جاپىراق» اكتسياسى اياسىندا كەسىلدى. بۇل كۇنى وبلىستىق پەريناتالدىق ورتالىق الاڭىنا ادامدار كوپ جينالىپ, «انا مەن بالا» ساياباعىنىڭ ىرگەسى قالاندى. ونىڭ اشىلۋىنا وبلىس اكىمى سەرىك ءبىلالوۆ قاتىسىپ, انا مەن بالانىڭ مۇددەسىن قورعاۋ جولىندا مەملەكەت تاراپىنان اتقارىلىپ جاتقان جۇمىستاردى ايتىپ بەردى. وبلىستا بىلتىردان بەرى «ۇرپاق قورى» باعدارلاماسى جۇمىس ىستەپ كەلەدى. قازىر وعان كەمى 4 بالا ءوسىرىپ وتىرعان 300-دەن استام وتباسى مۇشە. ولاردىڭ بالالارى ءۇشىن بانكتەن ارنايى دەپوزيت اشىلعان. «بالاپان» باعدارلاماسى بويىنشا وتكەن جىلى 5 مىڭ ءبۇلدىرشىن بالاباقشالار مەن شاعىن ورتالىقتارعا ورنالاستىرىلسا, بيىل 2700-گە كوبەيەتىن بولادى.
اكتسيا بارىسىندا اللەياعا 150 ءتۇپ شىرشا كوشەتى ەگىلدى.وعان ەڭبەك ارداگەرلەرى, «التىن القا» يەگەرلەرى اتسالىستى. «ۇرپاق قورى» باعدارلاماسىنىڭ قاتىسۋشىسى ولگا كۋرەنكوۆا 4 بالاسىنا ارناپ اعاش وتىرعىزدى. ول كوپ بالالى انا اتانعانىن ماقتانىش ەتەتىنىن, تاعى دا ءسابيلى بولۋدى ارماندايتىنىن جاسىرمادى. الداعى ۋاقىتتا جاڭا الاڭعا مۇسىندىك كومپوزيتسيالار ورناتۋ جوسپارلانىپ وتىر.
پەريناتالدىق ورتالىقتىڭ باس دارىگەرى جاننا ماۋىتوۆانىڭ ايتۋىنشا, ەمدەۋ مەكەمەسىندە 20 جىلدىڭ ىشىندە 63 مىڭداي نارەستە دۇنيەگە كەلىپتى.
ءومىر ەسقالي.
سولتۇستىك قازاقستان وبلىسى.