ەلباسىنىڭ الەمدىك دەڭگەيدەگى بەدەلى, سىرتقى ساياساتتى جۇرگىزۋدەگى داناگوي شەشىمدەرى, حالىقتىڭ تۇرمىس-تىرشىلىگى مەن مادەنيەتىنە دەگەن قامقورلىعى مەن ەل ەكونوميكاسىن دامىتۋ جولىنداعى باتىل قادامدارى كەشەگى وتكەن سايلاۋدا ەل قالاۋىن انىقتاپ بەردى. ن.نازارباەۆتى كوشباسشى دەپ تانىعان ەل ۇرپاقتىڭ بولاشاعىن سول كىسىگە سەنىپ تاپسىرىپ وتىر. پرەزيدەنت جۇرگىزىپ وتىرعان سىندارلى ساياساتتىڭ ارقاسىندا اشىق اسپانىمىزدىڭ استىندا كوك تۋىمىز جەلبىرەپ, كورشىلەس ەلدەرمەن تاتۋلىق قارىم-قاتىناس, ىسكەرلىك ىنتىماقتاستىق ورناپ, دۇنيە ءجۇزى الدىندا قازاقستاننىڭ ابىروي-اتاعى اسقاقتاپ كەلەدى.
تاۋەلسىزدىك العالى 20 جىلدىڭ ءجۇزى بولدى, جەتكەن جەتىستىكتەرىمىز كوڭىل قۋانتادى. كەڭەس وكىمەتى ىدىراعان العاشقى جىلدارى سول وداقتىڭ قۇرامىندا بولعان رەسپۋبليكالاردىڭ بارلىعى دەرلىك تارام-تارام جولدان تاڭداۋ تاپپاي, ابدىراپ قالعانى بەلگىلى. بۇل قازاقستاندى دا اينالىپ وتكەن جوق. ەكونوميكادا داعدارىس ەتەك الىپ, ودان قۇرىلىس ءوندىرىسى سالاسى دا زارداپ شەكتى. باي تەحنيكالىق مۇمكىندىكتەرىنە جانە بىلىكتى ماماندار ۇجىمىنىڭ بولۋىنا قاراماستان, كوپتەگەن كاسىپورىندار, عىلىمي-زەرتتەۋ, جوبالاۋ ۇيىمدارى جاڭا نارىق تالاپتارىنا توتەپ بەرە المادى. جوبالاۋ ىسىندە تۇرلاۋلى تاپسىرىستار بولماي, قۇرىلىس يندۋسترياسى قۇلدىرادى. بىراق ەلباسىنىڭ كورەگەن ساياساتىنىڭ ارقاسىندا بۇل قيىنشىلىقتار قازىر ارتتا قالدى.
سارى دالانىڭ توسىندەگى اقمولا قالاسىن ەلىمىزدىڭ استاناسى ەتىپ جاريالاۋ سول كەزدە كوپتىڭ باسىن شايقاتقانى راس. قىسى-جازى جەل جوسىعان بۇدىرى جوق جازىقتا ءبۇتىن ءبىر ەلدىڭ كەلبەتى بولاتىن قالا تۇرعىزۋ كوپشىلىك ءۇشىن اقىلعا سىيمايتىن كەرەعار وي بولاتىن. الايدا اقىل جەتپەس ايلا جوق, باتىلدىق الماس قامال جوق. مەملەكەت باسشىسىنىڭ باتىل قادامىنىڭ ناتيجەسىنە قازاقستاندىقتار عانا ەمەس, بۇكىل دۇنيە ءجۇزى ءتانتى بولىپ وتىر.
1998 جىلى استانا قالاسىنىڭ باس جوسپارىنىڭ جوباسىنا جاريالانعان حالىقارالىق كونكۋرسقا توراعالىق ەتۋ قۇرمەتىنە يە بولدىم. بۇل كونكۋرس الەمنىڭ بەلگىلى ءساۋلەتشىلەرىنىڭ قىزىعۋشىلىعىن تۋعىزدى, بايقاۋعا 20-دان اسا ەلدىڭ ساۋلەتشىلەرى ەلۋدەي جوبا ۇسىندى. كونكۋرستىڭ شارتى بويىنشا جوبالاردىڭ ىشىنەن ەڭ ۇزدىك ۇشەۋىن تاڭداپ الىپ, ەل پرەزيدەنتىنىڭ تاڭداۋىنا ۇسىنۋ كەرەك بولدى. ەلباسىنىڭ تاڭداۋى كوپتىڭ تاڭداۋىمەن ۇندەس شىقتى – استانا قالاسىنىڭ ورتالىعىن جوبالاۋ مارتەبەسى جاپوندىق ساۋلەتشى, الەمگە اتى ايگىلى كيسە كۋراكاۆاعا ءتيدى.
قالانىڭ قازىرگى كەلبەتىنە قاراپ, بۇل تاڭداۋدىڭ ءساتتى بولعانىنا تاعى دا كوز جەتكىزەمىز. كوسەم كورەگەندىگىنە تولاعاي تاۋەكەلىن سەرىك ەتىپ, ەل استاناسىن كوشىرگەندە, حالىق ساناسىنا ۇيالاعان كۇماندى كوپ ۇزاماي-اق ماقتانىش سەزىمى الماستىردى. پرەزيدەنتتىڭ ءوزى «استانا» دەپ اسقاقتاتىپ ات بەردى. سول استانا بۇگىندە تىڭ ويلار مەن ۇلى باستامالاردىڭ, شالقار شابىت پەن زيالى زەردەنىڭ توعىسار ورداسىنا اينالدى. بۇل وردا مەملەكەت باسشىسىنىڭ وسى قالاعا ارناعان ەڭبەگىنىڭ, كۇش-جىگەرىنىڭ ارقاسىندا قازاق تاريحىندا عانا ەمەس, الەم تاريحىندا ەڭسەسى بيىك, كەلبەتى كورىكتى استانالاردىڭ ءبىرى بولىپ قالادى. سول ءۇشىن كەلەر ۇرپاقتىڭ دا العىس ايتارى حاق!
قازاقستان رەسپۋبليكاسىندا ساۋلەت, قالا قۇرىلىسى جانە قۇرىلىس قىزمەتىن دامىتۋ شارالارىنىڭ باعدارلامالارى جاسالىپ, ەلىمىزدىڭ قۇرىلىس يندۋسترياسىنىڭ الەۋەتىن ارتتىرۋ ءىسى العا قويىلدى. بۇل سالادا قۇرىلعانىنا كوپ بولماسا دا, قارىمدى جۇمىستاردى جوسپارلاپ وتىرعان قازاقستان جوبالاۋشىلار قاۋىمداستىعى ەلباسىنىڭ ساۋلەت جانە قۇرىلىس سالاسى بويىنشا ءجۇرگىزىپ وتىرعان ساياساتىن قولدايتىندىعىن بىلدىرەدى جانە ەل باسقارۋ ىسىندە قاجىماس قايرات, مىقتى دەنساۋلىق تىلەيدى.
ابدىساعيت تاتىعۇلوۆ, قازاقستان جوبالاۋشىلار قاۋىمداستىعىنىڭ پرەزيدەنتى, قر ۇلتتىق ينجەنەرلىك اكادەمياسىنىڭ اكادەميگى, مەملەكەتتىك سىيلىقتىڭ لاۋرەاتى.