ەلوردامىزدا ءوتىپ جاتقان IV استانا ەكونوميكالىق فورۋمى جۇمىسى شەڭبەرىندە قازاقستان پارلامەنتى ءماجىلىسىنىڭ ءتوراعاسى ورال مۇحامەدجانوۆ جاپونيانىڭ بۇرىنعى پرەمەر-ءمينيسترى جانە اتالعان ەلدىڭ قازاقستانمەن دوستىقتى نىعايتۋ جونىندەگى پارلامەنتتىك ليگاسىنىڭ توراعاسى يۋكيو حاتويامامەن كەزدەستى, دەپ حابارلادى ءماجىلىستىڭ ءباسپاسوز قىزمەتى.
ءماجىلىس توراعاسى ءسوز باسىندا بيىلعى كوكتەمدە بولعان ءزىلزالانىڭ قاسىرەتىن شەككەن جاپونيا حالقىنا كوڭىل ايتتى. يۋكيو حاتوياما كەزىندە قازاقستان حالقى سەمەي سىناق ايماعىندا بولعان يادرولىق جارىلىستاردىڭ زارداپتارىن شەككەنىن جان-جۇرەگىمەن تۇسىنەتىنىن جەتكىزدى. سوندىقتان تابيعات اپاتىنا ۇشىراعان جاپون حالقىنىڭ جاعدايىنا ەرەكشە نازار اۋدارعان قازاقستاندىقتارعا كورسەتكەن كومەگى ءۇشىن العىسىن ءبىلدىردى.
قازاقستان مەن جاپونيا اراسىنداعى قارىم-قاتىناستى دامىتۋ وسى باسقوسۋ بارىسىنداعى ءاڭگىمەنىڭ نەگىزگى ارقاۋىنا اينالدى. ءماجىلىس توراعاسىنىڭ ءمالىمدەۋىنشە, جاپونيامەن ستراتەگيالىق ارىپتەستىك بايلانىستى ءورىستەتۋ – قازاقستاننىڭ سىرتقى ساياساتتاعى باسىمدىق بەرىلگەن باعىتى. پرەزيدەنت ن.نازارباەۆتىڭ 2008 جىلعى ماۋسىم ايىندا توكيوعا جاساعان رەسمي ساپارى ەكى ەلدىڭ اراسىنداعى ىنتىماقتاستىقتىڭ مۇمكىندىگى مول ەكەندىگىن كورسەتتى.
تاراپتار پارلامەنتارالىق كەزدەسۋلەر ساياسي ۇنقاتىسۋدىڭ ماڭىزدى تەتىگى بولاتىنىن اتاپ ءوتتى. سونىڭ جارقىن كورىنىسى ءوتكەن جىلى قاراشا ايىندا ورال مۇحامەدجانوۆ باستاعان قازاقستان پارلامەنتشىلەرىنىڭ جاپونياعا بارعان رەسمي ساپارى بولىپ تابىلادى. سول ساپار بارىسىندا قازاقستانمەن دوستىقتى نىعايتۋ جونىندەگى جاپونيانىڭ پارلامەنتتىك ليگاسىمەن كەزدەسۋلەر بولىپ ءوتتى. قازاقستان پارلامەنتىنىڭ ماجىلىسىندە دە جاپونيا پارلامەنتىمەن ىنتىماقتاستىق جونىندەگى دوستىق توبى بار.
وسى ورايدا ءماجىلىس ءتوراعاسى يۋكيو حاتويامانى قازاقستانمەن دوستىقتى نىعايتۋ جونىندەگى پارلامەنتتىك ليگانىڭ توراعاسى قىزمەتىنە تاعايىندالۋىمەن قۇتتىقتادى. جانە دە پارلامەنتتىك دوستىق ليگاسىنىڭ بىرلەسكەن وتىرىسىن وتكىزۋ جونىندە ۇسىنىس جاسادى.