ليۆيانىڭ ۇكىمەتتىك اسكەرى بۇرناعى كۇنى ەرەۋىلشىلەردىڭ قول استىنداعى زينتان قالاسىنا بىرقاتار سوققىلار جاسادى.
ارتيللەريالىق اتقىلاۋ «گراد» اتتى دۇركىن-دۇركىن وق اتۋ جۇيەسى ارقىلى جۇزەگە اسىرىلعان. كۋاگەرلەردىڭ ايتۋىنشا, زينتان قالاسى ەكى قايتارا سوققىنىڭ استىنا الىنعان. جالپى سانى 40 رەاكتيۆتى سناريادتار قالاعا جىبەرىلگەن كورىنەدى. زارداپ شەككەندەر تۋرالى ازىرگە مالىمەتتەر جوق. قالانى اتقىلاۋ باستالىسىمەن قالانىڭ ۇستىندە ناتو كۇشتەرىنىڭ اۆياتسياسى پايدا بولعان ەكەن. بىراق ول جونىندە دە ناقتى مالىمەتتەر بولماي وتىر.
جەلدەتكىش قوندىرعىلار ورناتىلماقشى
«فۋكۋسيما-1» اتوم ەلەكتر ستانساسىنىڭ ءبىرىنشى رەاكتورىنا عيماراتتى راديواكتيۆتى زاتتاردان تازارتاتىن 6 جەلدەتكىش قوندىرعىلار ورناتۋ ءۇشىن جۇمىستار جۇرگىزىلۋدە.
ساراپشىلاردىڭ باعالاۋىنشا, جاڭا جەلدەتكىش جۇيەنى پايدالانۋ رەاكتور عيماراتىندا رادياتسيالىق فوندى بىرنەشە ميلليزيۆەرتكە دەيىن تومەندەتۋگە جاعداي جاسايدى. ەگەر عيمارات ىشىندەگى رادياتسيا دەڭگەيىن تومەندەتۋدىڭ ءساتى تۇسەر بولسا, اەس قىزمەتكەرلەرى اپاتتان كەيىن العاش رەت رەاكتوردىڭ ىشكى بولىگىندەگى سالقىنداتۋ جۇيەسىنىڭ جۇمىسىنا جانە باسقا دا جۇيەلەرگە باقىلاۋ جاساۋ ءۇشىن ونىڭ ىشىنە كىرمەكشى.
كومىر شاحتاسىندا بولعان اپات
مەكسيكانىڭ سولتۇستىگىندە كواۋيلا شتاتىنداعى كومىر شاحتاسىندا جارىلىس بولىپ 3 ادام قازا تاپقان.
بەلگىلى بولعان مالىمەتتەر بويىنشا تاعى دا 3 كەنشى جەر استىندا قالىپ قويعان كورىنەدى. الدىن-الا الىنعان اقپاراتقا قاراعاندا, شاحتا قابىرعاسىنىڭ قۇلاپ تۇسۋىنە مەتان گازىنىڭ جارىلىسى سەبەپ بولعان. كەنشىلەر شامامەن 50 مەتر تەرەڭدىكتە قامالىپ قالعان كورىنەدى. سوندىقتان ازىرگە ولارمەن بايلانىس ورناتۋدىڭ ءساتى تۇسپەي وتىر. ەل پرەزيدەنتى فەليپە كالدەرون كەنشىلەردى قۇتقارىپ الۋ ءۇشىن قولدان كەلگەننىڭ ءبارى جاسالاتىنىن مالىمدەگەن.
ۋساما بەن لادەن تۋرالى كينو تۇسىرىلمەك
ۋساما بەن لادەن ءومىرىنىڭ ەكراندالعان تاريحىنىڭ بلوكباستەرگە اينالۋ مۇمكىندىگى وتە ۇلكەن بولىپ وتىر.
سوندىقتان دا ول قازا تاپتى دەگەن حاباردان سوڭ بىرنەشە ساعاتتان كەيىن-اق گولليۆۋد ۋساما بەن لادەن تۋرالى فيلم ءتۇسىرۋدى قولعا الماق دەگەن سىبىس تاراپ كەتكەن. بۇگىندە اڭگىمە جۇزدەگەن ميلليون دوللار تابۋ مۇمكىندىگىن قانداي ستۋديا جانە قاي رەجيسسەر وزگەلەردەن بۇرىن پايدالانىپ قالادى دەگەنگە كەلىپ تىرەلىپ تۇر. قاۋەسەتكە سەنسەك, بەلگىلى رەجيسسەرلەردىڭ ىشىنەن يراكتاعى سوعىس تۋرالى تۇسىرگەن كينوسى ءۇشىن وسكار جۇلدەسىنە يە بولعان كەترين بيگەلوۋ ەرەكشە قىزىعۋشىلىق تانىتقان كورىنەدى.
رەسەي كەپىلدىك تالاپ ەتۋدە
اقش-تىڭ رۋمىنيادا زىمىرانعا قارسى قورعانىس جۇيەسىن ورنالاستىرۋ ءجونىندەگى جوسپارى رەسەي سىرتقى ىستەر مينيسترلىگى تاراپىنان الاڭداۋشىلىق تۋعىزدى.
ۆەدومستۆونىڭ مالىمەتىنە قاراعاندا, رەسەي «جولتوسقىش» زىمىرانداردىڭ وزىنە قاتەر توندىرمەيتىنىنە سەنىمدى ەمەس. سوندىقتان دا ماسكەۋ ولاردى رەسەيلىك يادرولىق كۇشتەرگە قاراي باعىتتامايتىندىعى جونىندە ۆاشينگتوننان كەپىلدىك تالاپ ەتىپ وتىر. رۋمىنياداعى بۇرىنعى كەڭەستىك اسكەري-اۋە بازاسى ورنالاسقان جەردە اقش-تىڭ زقق ورنالاستىراتىندىعى تۋرالى بۇرناعى كۇنى بۋحارەستتە حابارلانعان بولاتىن.
ءوزارا بىتىمگە كەلمەك
كايردە پالەستينالىق ەكى ءىرى قوزعالىس – حاماس پەن فاتح وزدەرىنىڭ بىتىمگە كەلگەندىگى تۋرالى حابارلايدى دەپ كۇتىلۋدە.
الدىنداعى كۇنى ەگيپەتتىڭ دەلدالدىعىمەن ازىرلەنگەن قاراردى گازا سەكتورى مەن يوردان وزەنىنىڭ باتىس جاعالاۋىندا ءىس-قيمىلدار جاسايتىن وننان استام توپتىڭ وكىلدەرى قۋاتتاعان كورىنەدى. ەڭ باستى ماقسات – وتپەلى ۇكىمەت قۇرىپ, جالپىعا بىردەي پارلامەنتتىك سايلاۋ وتكىزۋدىڭ ۋاقىتى جونىندە كەلىسىمگە كەلۋ, ءسويتىپ, ەكىگە بولىنگەن پالەستينانى بىرىكتىرۋ. دەگەنمەن, بۇل كەلىسىم تەل-ءاۆيۆتىڭ قارسىلىعىن دا تۋىنداتىپ وتىر.
قارجىلاي كومەك الماق
پورتۋگاليا 78 ميلليارد ەۋرو قارجىلاي كومەك الۋ جونىندە ەۋرووداقپەن جانە حالىقارالىق ۆاليۋتا قورىمەن كەلىسىمگە كەلدى.
ول ءۇشىن پورتۋگاليا بيۋدجەت تاپشىلىعىن 2010 جىلعى ءىجو كولەمىنىڭ 9,1 پايىزىنان ۇستىمىزدەگى جىلعى 5,9 پايىزعا دەيىن قىسقارتۋى كەرەك. ءۇش جىلعا ەسەپتەلگەن كەلىسىم ۇلتتىق بانك جۇيەسىنە قارجىلاي كومەك كورسەتۋ جاعىن دا قاراستىرادى. دەگەنمەن, كەلىسىم پورتۋگاليانىڭ وپپوزيتسيالىق پارتيالارى, سول سياقتى ەۋرووداق تاراپىنان قولداۋ تابۋعا ءتيىس. حالقى 10 ميلليون ادامنان ءسال عانا اساتىن پورتۋگاليا ەكونوميكاسى بيىلعى جىلى تاعى دا 1,3 پايىزعا قىسقارۋى مۇمكىن.
مىڭعا جۋىق وپپوزيتسيونەر تۇتقىندالدى
جاپپاي جۇرگىزىلگەن تۇتقىنداۋلار بارىسىندا سيريادا 1 مىڭعا جۋىق وپپوزيتسيالىق اكتيۆيستەر قاماۋعا الىندى.
بىرقاتار اقپارات اگەنتتىكتەرىنىڭ ەلدىڭ ۇلتتىق قۇقىق قورعاۋ ۇيىمدارىنا سىلتەمە جاساي وتىرىپ حابارلاۋىنشا, پوليتسيا وپپوزيتسيونەرلەردىڭ ۇيلەرىن ارالاي وتىرىپ, رەيد ءجۇرگىزگەن. وسىدان كەيىن كوپتەگەن وپپوزيتسيونەرلەر ءمۇلدەم جوق بولىپ كەتكەن كورىنەدى. سونىمەن بىرگە, ءسال بۇرىنىراق سيريا اسكەرىنىڭ داماسكىدەن 280 شاقىرىم سولتۇستىك-باتىستا ورنالاسقان بانياس قالاسىنداعى كوتەرىلىستى تۇنشىقتىرعانى تۋرالى حابارلاعان بولاتىن. دەگەنمەن, سيريالىق وپپوزيتسيا وكىلدەرى وزدەرىنىڭ جاڭا اكتسيالار ۇيىمداستىرماق نيەتتەرى بار ەكەنىن مالىمدەۋدە.
ماسكەۋ كوشەسىندەگى توبەلەس
ماسكەۋدىڭ شىعىسىندا ورىن العان جاپپاي توبەلەس سالدارىنان تاجىكستاننىڭ 1 ازاماتى قازا تاۋىپ, تاعى 2 ادام دەنە جاراقاتتارىن العان.
ماسكەۋ قالالىق ىشكى ىستەر باسقارماسى اقپارات جانە جۇرتشىلىقپەن بايلانىس باسقارماسىنىڭ حابارلاۋىنشا, جاراقات العان ءۇش ادام اۋرۋحاناعا جەتكىزىلگەن. ولاردىڭ ەكەۋىنىڭ جاعدايى وتە اۋىر دەپ باعالانىپ وتىر. الدىن-الا مالىمەتتەر بويىنشا ولار دا تاجىكستان ازاماتتارى بولىپ تابىلادى. قازىرگى كەزدە وقيعانىڭ سەبەپتەرى انىقتالۋدا.
ينتەرنەت ماتەريالدارى نەگىزىندە ازىرلەندى.