پرەزيدەنت ەكونوميكا جونىندەگى نوبەل سىيلىعىنىڭ لاۋرەاتى روبەرت ماندەللدى قابىلدادى. تاراپتار قازاقستاندىق جانە الەمدىك ەكونوميكاداعى ءىستىڭ جاي-كۇيىن تالقىلادى, دەپ حابارلادى قازاقستان رەسپۋبليكاسى پرەزيدەنتىنىڭ ءباسپاسوز قىزمەتى.
– پرەزيدەنتپەن كەزدەسۋ كەزىندە مەن قازاقستاندىق ۆاليۋتانى ودان ءارى دامىتۋ تۋرالى ءوز ۇسىنىسىمدى ءبىلدىردىم, سونداي-اق ەۋرو مەن دوللار ايماعىنداعى الەمدىك ءبولىنىستىڭ ۇردىستەرىن اتاپ ءوتتىم. مەن الەمگە ورتاق ۆاليۋتانى اينالىمعا ەنگىزۋ كەرەك دەپ ەسەپتەيمىن. بۇل يدەيامدى قىتايدا, فرانتسيادا ايتتىم. بۇعان دەگەن ۇلكەن قىزىعۋشىلىق بار. ەۋروپا قوعامداستىعى بۇل يدەيانى قولدادى. قازاقستانعا قاتىستى ايتسام, بولىپ وتكەن جاھاندىق قارجى داعدارىسىنا قاراماستان, سىزدەر وتە تۇراقتى جاعدايدا ەكەنسىزدەر, – دەدى ر.ماندەلل جۋرناليستەرگە ارنالعان بريفينگ بارىسىندا.
مەملەكەت باسشىسى بۇۇ باس حاتشىسىنىڭ ورىنباسارى, ەۋروپالىق ەكونوميكالىق كوميسسيانىڭ اتقارۋشى حاتشىسى يان كۋبيشپەن, بۇۇ باس حاتشىسىنىڭ ورىنباسارى, ەۋروپالىق ەكونوميكالىق جانە الەۋمەتتىك كوميسسيانىڭ ازيا جانە تىنىق مۇحيت ايماعى بويىنشا اتقارۋشى حاتشىسى نوەلين حەيزەرمەن, بۇۇ ازىق-ت ۇلىك ۇيىمىنىڭ باس ديرەكتورى جاك ديۋفپەن جانە بۇۇ بۇكىلالەمدىك تۋريستىك ۇيىمىنىڭ باس حاتشىسى تالەب ريفايمەن كەزدەستى.
كەزدەسۋ بارىسىندا ەكىجاقتى ىنتىماقتاستىقتى ودان ءارى دامىتۋ جانە نىعايتۋ ماسەلەلەرى, سونداي-اق حالىقارالىق ساياساتتىڭ وزەكتى ماسەلەلەرى تالقىلاندى.
– نۇرسۇلتان نازارباەۆپەن ءبىز كولىك جانە ەكونوميكالىق ءدالىزدى اشۋ پەرسپەكتيۆاسىن, اسىرەسە, حالىقارالىق دەڭگەيدە تالاپ ەتىلەتىن قۇرلىقتاعى كولىك تۇرلەرى سالاسىن, سونداي-اق مۇحيتقا شىعۋعا مۇمكىندىگى جوق ەلدەر ءۇشىن مۋلتي-باعدارلاما ازىرلەۋ جايىن تالقىلادىق. ءبىز سونداي-اق وتكەن فورۋمدا ايتىلعان, ەۋروپادا تابىستى ەنگىزىلگەن, «جاسىل كوپىر» اتتى ماڭىزدى باستامانى قاراستىرۋدامىز, – دەپ اتاپ ءوتتى ن.حەيزەر جۋرناليستەرگە ارنالعان بريفينگتە.
– قازاقستان پرەزيدەنتىمەن كەزدەسۋ جانە اۋىلشارۋاشىلىق سەكتورىن دامىتۋ, سونداي-اق ءونىمدىلىكتى جانە تاۋار اينالىمىن ارتتىرۋ ماقساتىندا ينۆەستيتسيا ماسەلەلەرىن تالقىلاۋ ءبىز ءۇشىن ۇلكەن قۇرمەت. ءبىز سونداي-اق ازىق-ت ۇلىك ساپاسى, قاۋىپسىزدىك جانە وسى اياداعى تۇتىنۋشىلار قۇقىعىن قورعاۋ ماسەلەلەرىن تالقىلادىق, – دەدى ج.ديۋف جۋرناليستەرگە ارنالعان بريفينگ كەزىندە.
نۇرسۇلتان نازارباەۆ حورۆاتيانىڭ ەكس-پرەزيدەنتى س.مەسيچپەن كەزدەستى. اڭگىمەلەسۋ بارىسىندا ەكىجاقتى ىنتىماقتاستىقتىڭ بىرقاتار ماسەلەلەرى, سونداي-اق حالىقارالىق كۇن ءتارتىبى تالقىلاندى.
– قازاقستاندى قالىپتاستىرۋدا نۇرسۇلتان نازارباەۆتىڭ ورنى ايرىقشا. سىزدەر تاۋەلسىزدىك العاندا سىزدەردە كەلەشەك دامۋ ءۇشىن وراسان تابيعي بايلىقتار بولدى, تەك پرەزيدەنت قانا بارلىعىن ءبىر جەرگە جيناپ, وسى يگىلىكتەردى پايدالانۋدىڭ ءتيىمدى جولدارىن تاپتى, – دەپ اتاپ ءوتتى س.مەسيچ جۋرناليستەرگە ارنالعان بريفينگتە.
پرەزيدەنت جاپونيانىڭ ەكس-پرەمەر-ءمينيسترى, جاپونيانىڭ قازاقستانمەن دوستىقتى نىعايتۋ جونىندەگى پارلامەنتتىك ليگاسىنىڭ توراعاسى يۋكيو حاتويامانى قابىلدادى. كەزدەسۋ بارىسىندا تاراپتار ەكىجاقتى قاتىناستاردى ودان ءارى نىعايتۋ جانە دامىتۋ ماسەلەلەرىن تالقىلادى.