كەشە استانادا 2011 جىلدىڭ جازىندا بولاتىن يسلام كونفەرەنتسياسى ۇيىمى سىرتقى ىستەر مينيسترلەرى كەڭەسىنىڭ 38-ءشى سەسسياسىندا قازاقستان توراعالىعى لوگوتيپىنىڭ تۇساۋى كەسىلدى.
لوگوتيپ التىن كۇن مەن قىراننىڭ بەينەلەرى كەلتىرىلگەن كوگىلدىر شەڭبەر تۇرىندە. جوعارعى شەتتەرىندە 38th Session of the OIC Council of Foreign Ministers, ال تومەنگىسىندە Astana Kazakhstan. June 28-30, 2011 دەگەن ءماتىن كەلتىرىلگەن. قازاقستان توراعالىعىنىڭ ۇرانى («بەيبىتشىلىك, ىنتىماقتاستىق جانە دامۋ») ۇيىمنىڭ ءۇش رەسمي تىلىندە (اعىلشىن, فرانتسۋز, اراب) جاسىل تۇسپەن لوگوتيپتى اينالا جازىلعان. سونداي-اق لوگوتيپتىڭ سىرتى ەلىمىزدىڭ مادەنيەتى مەن ءداستۇرىن نىشاندايتىن قازاقتىڭ ويۋ-ورنەگىمەن اشەكەيلەنگەن. كوگىلدىر جانە التىن تۇستەر, سونىمەن قاتار, كۇن مەن قىران بەينەلەرى قازاقستاننىڭ مەملەكەتتىك تۋىنىڭ تۇستەرى مەن سيمۆولدارى رەتىندە يسلام كونفەرەنتسياسى ۇيىمىنىڭ سىرتقى ىستەر مينيسترلەرى كەڭەسىنىڭ 38-ءشى سەسسياسىنىڭ قازاقستاندا وتەتىنىنە سىلتەسە, جاسىل ءتۇس الداعى بولاتىن شارانىڭ مۇسىلمان الەمىمەن بايلانىسىن اڭعارتادى.