Beeline ءبىرىنشى بولىپ بايقوڭىردا كەڭ جولاقتى ينتەرنەتكە قول جەتكىزدى
الەمدە بايقوڭىردان دا باسقا عارىش ايلاقتارى بار. الايدا, بۇگىنگى تاڭدا پايدالانۋى جاعىنان بايقوڭىر مىنا جاھاندا ءبىرىنشى كەزەكتە تۇر. قاي جاعىنان الساق تا, بايقوڭىر ەشقانداي قالالاردى قايتالامايتىن كىشىگىرىم شاھار. وسى ءبىر كوككە جالعانعان عاجايىپ عارىش قالاسىن عالامتور قىزمەتىنسىز ەلەستەتۋ مۇمكىن ەمەس.
ونىڭ ۇستىنە بۇل قالادا عارىشتىق تەحنولوگيالاردى دامىتۋ, زەرتتەۋ سالاسىنا قىزمەت ەتەتىن ەرەكشە ماماندىق يەلەرى – قازاقستان مەن رەسەي ازاماتتارى تۇراتىنى ايان. اسىرەسە, مۇندا ساپالى دا جىلدام ينتەرنەتكە دەگەن سۇرانىس تا جوعارى. وسى ماسەلەگە وراي ەلىمىزدەگى Beeline بايقوڭىردا كەڭ جولاقتى عالامتورعا قول جەتكىزگەن ءبىرىنشى ۇيالى وپەراتورعا اينالدى.
وقىرمانداردىڭ بارشاسى تەلەكوممۋنيكاتسيا سالاسىنىڭ ادامى ەمەس. سوندىقتان قاراپايىم تۇتىنۋشىلارعا FTTB (Fiber-To-The-Building) تەحنولوگياسى نە ەكەندىگىن تۇسىنىكتى تىلمەن ايتقاندا, ول «ۇيگە دەيىنگى تالشىقتى جەلى» دەگەن اتاۋدى بىلدىرەدى. «تالشىق» ءسوزىنىڭ استارىندا مىس سىمنىڭ ورنىنا تالشىقتى سىمدى پايدالانۋ ۇعىمى جاتىر. تالشىقتى جەلى ارقىلى عالامتور مەن تەلەۆيدەنيەنى قوسۋعا بولادى. ونىڭ وتكىزگىشتىك قاسيەتى ADSL تەحنولوگياسىمەن جۇمىس جاسايتىن مىس سىمعا قاراعاندا جۇكتەمەسىن وڭاي اتقارادى.
وسىناۋ جاعىمدى جاڭالىققا جارشى بولۋ ءۇشىن ءبىز دە ارناۋلى ۇشاقپەن بايقوڭىر قالاسىنا بەت العان ەدىك. ايتقانداي, بۇل قالادا كادىمگى عارىش راكەتالارىنان بولەك, كۇن سايىن دەرلىك كىشكەنتاي راكەتالار ۇشىپ جاتادى ەكەن. ايتۋلى وقيعاعا ورايلاس الدىمەن ۆ.چەلومەي اتىنداعى حالىقارالىق عارىش مەكتەبىنە ساياحات شەكتىك. مۇندا عارىشكەرلەر مەن عارىش سالاسىنا قىزمەت ەتەتىن جانداردىڭ بالالارى, سونداي-اق كەلەشەكتە كوسماناۆت بولۋدى كوكسەيتىن ورەندەر وقيدى. ياعني, ەرەكشە مەكتەپتە اكادەميك ۆلاديمير چەلومەيدەي تاماشا عالىمنىڭ ءىزباسارلارى ءبىلىم الۋدا. كەزىندە وسى عالىمنىڭ جەتەكشىلىگىمەن «پروتون» راكەتا-تاسىمالداۋشىسى, جاساندى جەر سەرىكتەرى جاسالىنعانى بەلگىلى.
حالىقارالىق عارىش مەكتەبىنىڭ ءشاكىرتتەرى مۇندا راكەتالاردىڭ كىشىگىرىم ماكەتتەرىن جاساپ, تەحنولوگيالىق تالاپتارعا سايكەس ۇشىرىپ جاتاتىنىن كوردىك.
ادامزاتتىڭ عارىشتى باعىندىرعانىنا تۋرا جارتى عاسىر تولعاندا بايقوڭىرعا تابانىمىز تيگەن سوڭ, ونداعى عارىشكەرلەر اللەياسىنا, عارىش سالاسىنىڭ تاريحىنا ارنالعان مۇراجايعا, اشىق اسپان استىنداعى مۋزەيگە سوعۋدىڭ ءساتى ءتۇستى. سونداي-اق, عارىش ايلاعىنان كەزەكتى راكەتا-تاسىمالداۋشىنىڭ عارىشقا كوتەرىلگەنىنە كۋا بولدىق. قىپ-قىزىل وتقا ورانىپ عارىشقا باعىت الاتىن راكەتانى تاماشالاۋ – بۇل دا سيرەك بولاتىن عانيبەت. ارينە, مۇنىڭ ءبارى بولەك اڭگىمە.
نەگىزگى وقيعاعا ورالساق, سونىمەن قازاقستانداعى Beeline برەندىنىڭ يەسى «كار-تەل» جشس بايقوڭىر قالاسىندا كەڭ جولاقتى ينتەرنەتكە قول جەتكىزدى. ەندىگى جەردە بايلانىس FTTB تەحنولوگياسى ارقىلى اقپاراتتى بەرۋ جىلدامدىعى سەكۋندىنا 100 مبيت-ءتى قۇرايتىن بولادى. وسىلايشا قازاقستانداعى ۇيالى بايلانىس وپەراتورى بايقوڭىر قالاسىنداعى FTTB جەلىسىن دامىتۋ جونىندەگى لوكالدىق سەرىكتەسى «تەلەسكان» كومپانياسىمەن قاجەتتى كەلىسىمگە قول قويدى.
وسى ارادا «كار-تەل» كومپانياسى «ۆىمپەلكوم لتد» كومپانيالار توبىنا كىرەتىنىن ەسكە سالا وتىرىپ, ماڭىزدى وقيعادان كەيىن «ۆىمپەلكوم لتد» كومپانيالار توبىنىڭ تمد ەلدەرىندەگى بيزنەستى دامىتۋ جونىندەگى ۆيتسە-پرەزيدەنتى دميتري كرومسكي ءوز ويىن بىلايشا ورنەكتەدى:
– مەن فەدەرالدى عارىش اگەنتتىگىنە, بايقوڭىر قالاسىنىڭ اكىمدىگىنە جانە «جەردەگى عارىشتىق ينفراقۇرىلىمدارى نىساندارىن پايدالانۋ ورتالىعى» فممك-سىنا زامانعا لايىقتى تەلەكوممۋنيكاتسيالىق تەحنولوگيانى دامىتۋعا قولداۋ كورسەتكەندەرى ءۇشىن زور العىسىمدى بىلدىرەمىن. بۇل شارا قالانىڭ قارىشتاعان ىرعاقپەن دامۋىنا عانا ەمەس, عارىش الەمىن يگەرۋىنە جاردەمىن تيگىزەدى دەپ ويلايمىن, – دەسە, تەحنولوگيالىق تۇرعىدا ابدەن دامىعان بايقوڭىر قالاسى اكىمىنىڭ ورىنباسارى اناتولي پەترەنكو:
– قالامىزدا ينتەرنەتكە دەگەن سۇرانىس – اۋاداي قاجەت ماسەلەلەردىڭ ءبىرى. ەندەشە, بايقوڭىردا جاڭادان ەنگىزىلىپ جاتقان قىزمەت وسىنداعى رەسەي فەدەراتسياسى مەن قازاقستان رەسپۋبليكاسىنىڭ ازاماتتارىنىڭ اراسىن جاقىنداتىپ قويماي, رەسەيدە, قازاقستاندا, ۋكراينادا, بەلورۋسسيادا جانە باسقا دا مەملەكەتتەردە تۇرىپ جاتقان ءارىپتەستەرمەن, دوستارمەن ۇنەمى بايلانىستا بولۋعا زور سەپتىگىن تيگىزەدى, – دەدى.
قازىرگى تاڭدا كۇندەلىكتى قىزمەتىمىزدى ينتەرنەت بايلانىسىنسىز ەلەستەتۋ قيىن. ۋاقىت ۇدەرىسىنە ىلەسۋدە ارزان دا جەدەل ينتەرنەتتىڭ پايدا بولۋى بايقوڭىر قالاسىنداعى عارىشتىق نىساندار مەن مەكەمەلەردىڭ تابىستىلىعىنا, ءىسىنىڭ العا جىلجۋىنا ايتارلىقتاي ىقپالىن تيگىزەرى انىق. وسى ماسەلەگە وراي «جەردەگى عارىشتىق ينفراقۇرىلىمدارى نىساندارىن پايدالانۋ ورتالىعى» فممك باس ديرەكتورىنىڭ ءبىرىنشى ورىنباسارى ۆالەري كرەحتۋنوۆ مىرزا:
– وزىمىزبەن تۇراقتى سەرىكتەستىك تانىتىپ كەلە جاتقان Beeline كومپانياسىنىڭ بىزگە جاڭا ۇسىنىستارمەن شىعىپ, نىساندارىمىزدى زاماناۋي ۇلگىدەگى بايلانىسپەن قامتاماسىز ەتە الاتىنىنا ريزامىز. بۇگىنگى تاڭدا جەدەل مالىمەتتەر الماسۋ – بارلىق سالاداعى باستى تابىس كەپىلى بولا الاتىن تەتىكتەردىڭ ءبىرى. اسىرەسە, جوعارى تەحنولوگيالىق عارىش سالاسىندا بۇل اسا وزەكتى بولىپ تابىلادى. ۋاقىت تالابىنان تۋىنداعان وسى سۇرانىسىمىزعا Beeline كومپانياسى دەر كەزىندە ءۇن قاتىپ, ناقتى شارانى جۇزەگە اسىرۋى – ءبىز ءۇشىن ماڭىزدى وقيعا, – دەدى.
رەتى كەلىپ تۇرعاندا, FTTB تەحنولوگياسىن بۇگىنگى تاڭدا ەلىمىزدىڭ استانا, الماتى, جەزقازعان, قاراعاندى, پەتروپاۆل, تاراز جانە شىمكەنت قالالارىنىڭ تۇرعىندارى پايدالانىپ وتىرعانىن اتاپ وتەلىك.
بولاشاقتا FTTB تەحنولوگياسىمەن قازاقستاننىڭ باسقا دا ءىرى قالالارى مەن وبلىس ورتالىقتارى قامتاماسىز ەتىلەتىن بولادى. وسى ارادا Beeline كومپانياسى بۇعان دەيىن دە قازاقستان اۋماعىندا ءبىرىنشى بولىپ, 2008 جىلى GSM 1800 ستاندارتىندا ۇيالى بايلانىس قىزمەتىن ۇسىنۋعا رەسمي رۇقسات العانىن ايتا كەتۋگە بولادى.
ايناش ەسالي, «ەگەمەن قازاقستان» – بايقوڭىردان.