قازاقستان جازۋشىلار وداعىنىڭ 75 جىلدىق مەرەيتويىنا جانە تاۋەلسىزدىگىمىزدىڭ 20 جىلدىعىنا وراي «ان ارىس» باسپاسىنان حح عاسىرداعى قازاق ادەبيەتىنىڭ وزىق تۋىندىلارى توپتاستىرىلعان «التىن قالام» سەرياسى جارىق كوردى. وقىرمانعا ەكىنشى رەت جول تارتقان سەريانىڭ بۇل جولعى توپتاماسىنا تولەگەن ايبەرگەنوۆ, تاحاۋي احتانوۆ, ءالجاپپار ابىشەۆ, تاكەن ءالىمقۇلوۆ, وسپانحان اۋباكىروۆ, قاليجان بەكحوجين, ورالحان ءبوكەەۆ, حاميت ەرعاليەۆ, ءىلياس ەسەنبەرلين, ساكەن ءجۇنىسوۆ, سىرباي ماۋلەنوۆ, جۇبان مولداعاليەۆ, باۋىرجان مومىش ۇلى, سايىن مۇراتبەكوۆ, جۇمەكەن ناجىمەدەنوۆ, ءابۋ سارسەنباەۆ, بەردىبەك سوقپاقباەۆ, ءابدىلدا تاجىباەۆ, سافۋان شايمەردەنوۆ, قۋاندىق شاڭعىتباەۆ سىندى قارىمدى قالامگەرلەردىڭ كلاسسيكالىق شىعارمالارى ەنگەن.
«التىن قالام» كىتاپتارىن تانىستىرۋ ءراسىمىن قازاقستان جازۋشىلار وداعى باسقارماسىنىڭ ءتوراعاسى نۇرلان ورازالين اشىپ, ادەبيەتىمىزدىڭ تورىنەن ورىن العان بۇل شىعارمالاردىڭ وسىنداي سەريامەن قايتا باسىلۋى ۇلت مادەنيەتى ءۇشىن ۇلكەن قۋانىش ەكەنىن ايتا كەلىپ, بولاشاقتا بۇل ءۇردىس جالعاسىن تاباتىنىن بايان ەتتى. بۇل كوزايىم كىتاپتاردىڭ لەنتاسىن قالامگەرلەردىڭ قارا شاڭىراعىندا وتىرعان اياۋلى جارلارى زايدا (قاليجان بەكحوجين), سوفيا (جۇبان مولداعاليەۆ), ءناسىپ (جۇمەكەن ناجىمەدەنوۆ) جەڭگەلەرىمىز قيىپ, قازاقستان جازۋشىلار وداعى مەن «ان ارىس» باسپاسىنا العىستارىن ايتتى.
سونىمەن قاتار, ۇلتتىق مەملەكەتتىك كىتاپ پالاتاسى, قازاقستان باسپاگەرلەرى مەن كىتاپ تاراتۋشىلار اسسوتسياتسياسى «التىن قالام» سەرياسى بويىنشا قازاق ادەبيەتىنىڭ كلاسسيكالىق شىعارمالارىن ناسيحاتتاپ, كىتاپ پالاتاسىنداعى مۇراعات قورىن ۇزدىك شىعارمالارمەن تولىقتىرعانى ءۇشىن جازۋشىلار وداعىنىڭ باسقارماسى مەن «ان ارىس» باسپاسىن ارنايى ديپلوممەن ماراپاتتادى. بۇعان قوسا, «ان ارىس» باسپاسى وسى سەريا ءۇشىن « ۇلى جىبەك جولىمەن» دەگەن اتپەن وتكەن VI حالىقارالىق كىتاپ جانە باسپا ونىمدەرى جارمەڭكەسى اياسىندا «كوركەم ادەبيەت» نوميناتسياسى بويىنشا ديپلوم ەنشىلەدى. اتالعان ەكى ديپلومدى كىتاپ پالاتاسىنىڭ پرەزيدەنتى جانات سەيدۋمانوۆتىڭ اتىنان وسى مەكەمەنىڭ وكىلى قوڭىر مۇقاتايقىزى تابىس ەتتى.
قورعانبەك امانجول.
______________________
سۋرەتتى تۇسىرگەن بەرسىنبەك سارسەنوۆ.