مارتەبەلى تۇساۋكەسەردە الدىمەن ءسوز العان بەلگىلى عالىم-قالامگەر, م.و.اۋەزوۆ اتىنداعى ادەبيەت جانە ونەر ينستيتۋتىنىڭ ديرەكتورى ءۋاليحان قاليجانوۆ بۇل شارانىڭ «ەگەمەن قازاقستان» گازەتىندە جاريالانعان ەلباسى – قازاقستاننىڭ تۇڭعىش پرەزيدەنتى ن.ءا.نازارباەۆتىڭ «بولاشاققا باعدار: رۋحاني جاڭعىرۋ» اتتى ماقالاسىمەن تۇسپا-تۇس كەلگەنىنە باسا نازار اۋداردى. «ەلباسىنىڭ ماقالاسىنداعى «تۋعان جەرگە تۋىڭدى تىك!» دەگەن ۇعىم وسىنداي شارالاردان باستالادى, – دەدى قالامگەر-عالىم. – ۇلتتىڭ كوشىن باستايتىن, ۇلتتىڭ رۋحىن بيىككە كوتەرەتىن – كىتاپ. ونىڭ ىشىندە ولەڭ – قازاقپەن ەتەنە تۋعان قۇدىرەت. قازاق ولەڭمەن قۋانىپ, ولەڭمەن ءبىرىن-ءبىرى جۇباتقان. زامان قانشا جەردەن العا وزعانمەن ولەڭدى ەش ۋاقىتتا كومپيۋتەرمەن تەرىپ جازا المايسىڭ... ولەڭ قادىم زاماننان بەرى تەك قانا قالاممەن جازىلعان, سوندىقتان دا, ماناربەك, مەن ساعان حالقىڭدى قۋانتقان جىر جولدارىڭ مولايا بەرسىن دەپ قالام سىيلايمىن!»
قارىمدى قالامگەردىڭ اقىندار-
دىڭ جانىنا جاعىمدى, قۇلاعىنا جىلى تيەر وسىناۋ تىلەگىن ءىلىپ الا ءجونەلگەن ءاربىر شەشەن مىنبەرگە شىعىپ تۇرىپ «باتىرلار مەن اقىندار ەلىنىڭ» توپىراعىندا تۋىپ-وسكەن ءسۇيىنباي مەن جامبىلدىڭ تاريحي جىرلارىنا توقتالماي ءوتكەن جوق. حالىقتىق جىردىڭ قاسيەتىنەن ءنار الىپ, جان سەزىمىنىڭ قىل پەرنەسىن قالامىنىڭ ۇشىمەن دالدەپ ۇلگەرگەن ماناربەك ءىزباساروۆ بۇگىنگى تۇساۋى كەسىلگەن ءۇش كىتاپقا دەيىن «جانىمدا مەنىڭ جالىن بار», «كۇي دومبىرا, ساز عۇمىر», «ساۋلەسىن توگىپ, نۇر سەزىم», «جايىمدى قالاي ۇعارسىڭ» اتتى بارلىعى جەتى كىتابىن وقىرمانعا ۇسىنعانى كيەلى توپىراقتىڭ قاسيەتى ەكەنى جايلى جانە اتاپ ءوتىلدى. ادەبي-سازدى كەشتىڭ كوركىنە اينالعان تالانت يەسى تۋرالى تەرەڭنەن تەبىرەنە ءسوز سويلەگەن قالامداستارى سەگىز قىرلى, ءبىر سىرلى ماناربەكتىڭ پروزا جانرىندا دا ەلەۋلى ۇلەسى بارىن ەسكە سالدى. 2006 جىلى «جازۋشى» باسپاسىنان «قازىرگى قازاق پروزاسى» سەرياسىمەن شىققان «تابيعات حيكايالارى» اتتى اڭگىمەلەر جيناعى سونىڭ ايقىن دالەلى بولسا كەرەك-ءتى.
«اۋەلدە كوپشىلىك جازۋ ونەرىن وڭاي كورەدى, قيامەتىن بىلە بەرمەيدى», دەپ ءسوز باستاعان «قازاق ادەبيەتى» گازەتىنىڭ باس رەداكتورى, جازۋشى جۇماباي شاشتاي ۇلى بۇل شارانى ءبىر كەزدە اۋداندىق «ەكپىندى ەڭبەك» گازەتىندە «پولك بالاسىنداي» بولىپ ۇلكەندەرمەن تەڭەسىپ تەر توگە قىزمەت ىستەگەن ماناربەكتىڭ مەحناتىنىڭ بۇگىنگى جەڭىس تويى دەپ وي سارالادى.
جۋرناليست, اقىن, جازۋشى, باسپاگەر ازاماتتىڭ رۋحاني سالادان ءوز ۇلەسىن الا ءجۇرىپ, بۇگىنگى تاڭدا بيزنەس بيىگىنە كوتەرىلۋى دە كوپ جايتتان حاباردار ەتسە كەرەك. «رۋحاني جاڭعىرۋ جولىندا بابالارىمىزدان ميراس بولىپ قالعان, قانىمىزعا سىڭگەن ءبۇگىنگى تامىرىمىزدا بۇلكىلدەپ جاتقان ىزگى قاسيەتتەردى قايتا ءتۇلەتۋدە» قالامگەر ماناربەك ءىزباساروۆتىڭ سىڭىرگەن ەڭبەگى وتە زور. تەك قانا تاريحي-تانىمدىق ءمانى بار 20 كىتاپ شىعارعان ەكەن. تاريحتىڭ قويناۋىنان سىر تارتقان سۇرانشى-ساۋرىق, مەدەتبەك باتىرلار, قۇدايبەردى بي, بايتەلى بابا, تاعى باسقا دا تاريحي شىعارمالار بولاشاق ۇرپاق ءۇشىن ءوزىڭنىڭ ۇلتتىق جانە جەكە بايلىعىڭدى ناقتى بىلۋگە باعىت بەرەرى انىق. «ءاربىر ولكەنىڭ حالقىنا سۋىقتا پانا بوپ, ىستىقتا سايا بولعان, ەسىمدەرى ەل ەسىندە ساقتالعان ءبىرتۋار پەرزەنتتەرى بار» دەمەكشى, ماناربەكتىڭ «ايتۇمار» باسپاسىنان شىققان حالىق ءۇشىن بويتۇمارداي بولعان تۇلعالار قاتارى مولايا تۇسۋدە.
جامبىل اۋدانى اكىمىنىڭ ورىنباسارى داستان ءشاينۇسىپوۆ, زاڭ عىلىمدارىنىڭ دوكتورى ارىقباي اعىباەۆ, ارقالى اقىن ورىسباي ءابدىلدا ۇلى, اقىن-كومپوزيتور جولداسحان قۇرامىسوۆ, قاۋىپسىزدىك قىزمەتىنىڭ گەنەرال-لەيتەنانتى ء ادىل شاياحمەتوۆ, قازاق ۋنيۆەرسيتەتىنىڭ پرورەكتورى ابدىكەرىم سەرىكباەۆ, قازاقستان رەسپۋبليكاسى سوتتار قاۋىمداستىعى توراعاسىنىڭ ورىنباسارى سەرىك بايباتىروۆ, اقىن-جازۋشىلار ناعاشىبەك قاپالبەكوۆ پەن دوقتىرحان تۇرلىبەك جانە باسقالارى ماناربەكتىڭ بويىنداعى اقىندىق قاسيەتىمەن قوسا, تۋعان جەرگە, ونىڭ تاريحى مەن مادەنيەتىنە, سالت-ءداستۇرىنە, بابالار مۇراسىنا دەگەن جاناشىرلىق قاسيەتىن باسا كورسەتىپ, تىلگە تيەك ەتىپ جاتتى. اقىننىڭ قۇرمەتىنە ءان ايتىلدى, كۇي تارتىلدى, جىر وقىلدى.
قازاقستان جازۋشىلار وداعىنىڭ مۇشەسى, مادەنيەت قايراتكەرى اقىن ماناربەك ءىزباساردىڭ ادەبي-سازدى كەشىن ءدوڭگەلەتىپ جۇرگىزگەن اقىن باقىت بەدەلحاننىڭ تىلىمەن ايتقاندا, «اقىننىڭ وقىرمانىنا ۇسىنىپ وتىرعان «ساعىم», «قوڭىر كۇزىم كەلدىڭ بە؟!», «تاعىلىم» اتتى جيناقتارى رۋحاني جاڭعىرۋ ساتىسىندا جاڭا قادام بولعان زاماندا كۇندە پاراقتالىپ, كۇندە وقىلىپ, ونەگەلى ءدۇنيەگە اينالسىن», دەپ تۇيىندەر ەدىك.
گۇلزەينەپ سادىرقىزى,
تالعات ءسۇيىنباي,
«ەگەمەن قازاقستان»
الماتى وبلىسى,
جامبىل اۋدانى
سۋرەتتى تۇسىرگەن
نۇرمانبەت قيزات ۇلى