ءانىن جازعان ءشامىل ءابىلتاي
ءسوزىن جازعان تورەعالي تاشەنوۆ
ۋا, تىڭدا,
ءتورت قاقپالى تۇركىستان!
قوس قاقپالى قوجا احمەت!
عاسىرلاردىڭ سىناعىنا شىداعان,
قابىرعاسىن قىزىر-بابا سىلاعان
قاسيەتتى كوك كۇمبەز,
تۇرسىڭ با,
ۋا, ءدىن-امان!
الىستان حاق دەم بەرگەن,
ارىستان باب تەڭ كورگەن,
تاقۋالار جول بەرگەن,
مۇساپىرگە قول بەرگەن,
حالايىقتى مەڭگەرگەن,
ماشايىقتى ءجون كورگەن,
ازىرەتى سۇلتان قوجا احمەت,
زيارات ەتىپ كەلگەن – مەن...
شىرقاۋ اسىپ شىعىپ كەتكەن سانادان
ۇكى قۇس بوپ جەتكەن سەن بە دانا جان؟!.
باۋىرىنا بۇحارانى بالاعان,
سەرىگىنە سامارقاندى ساناعان
سەندەي كەنتتى تابا الام با دالادان –
اسىق ەتكەن جەرىمە گۇل جاھاندى,
ءناسىپ ەتكەن تورىمە اللا تاعالام!
ۋا, تىڭدا,
باي ولكە ۇلىس – بايتاعىم!
جاتسىنىپ جوق قايتارىم,
ساقسىنىپ بار ايتارىم:
قانشاما جىل عارىپ بولىپ ساف دىلگە,
ارىپ-تالىپ جەتكەن كەزدە اق كۇنگە,
قارسى قويىپ قاۋىمىڭدى حاق دىنگە,
ۇرپاعىمدى ۇيىتپاسىن جات كىرمە.
دالام ءۇشىن جولىن كەسىپ تاۋىمنىڭ,
كۇلشە سالمان كەرسەنىنە كاۋىردىڭ.
ءتىلىڭ مەنەن جىرىڭ جانە دىلىڭە
قوسا تۇت دەپ ءتۇزۋ ءدىنىن ءتاڭىردىڭ,
ءتورت تاراپتان تۇگەل قوستىم تۇركى ۇلىن
توعىسىندا عاسىرلار مەن ءداۋىردىڭ.
ۋا, تىڭدا,
ءتورت قاقپالى تۇركىستان!
قوس قاقپالى قوجا احمەت!
دۇعاڭ سەنىڭ جاتىر جالعاپ جەر-كوكتى.
اياماعان ءوز باسىڭنان قۇرمەتتى,
ءاز-كورەگەن ءامىر تەمىر ءدۇر تەكتى.
قۇدىعىڭنىڭ سۋىن التىن تىللامەن,
دىنمۇحامەد قوناەۆ بوپ تەربەتتى.
اتىڭدى اتاپ, الاشىمدى الەمگە,
نازارباەۆ نۇرسۇلتان كەپ ورلەتتى.
كوك بايراعىم كوكتە بيىك جەلبىرەپ,
قازاعىما تاۋەلسىزدىك تورلەتتى.
بەۋ, تۇركىستان, ازىرەت سۇلتان,
كوك كۇمبەزىڭ كۇن استىندا كورنەكتى!