بيىلعى تالاپقا ساي ۇلتتىق بىرىڭعاي تەستىلەۋ ەكى كەزەڭدە وتكەلى وتىر. ءبىرىنشىسى- قورىتىندى اتتەستاتتاۋ – بۇل مەملەكەتتىك ءبىتىرۋ ەمتيحانى. ەكىنشىسى - ۇبت - جوعارى وقۋ ورىندارىنا ءتۇسۋ ەمتيحانى. قورىتىندى اتتەستاتتاۋ مەكتەپتە بەس پاننەن ونىڭ ىشىندە 4 مىندەتتى, 1 تاڭداۋ ءپانى بويىنشا وتەدى. بارلىق ەمتيحاندار, ونىڭ ىشىندە تەستىلەۋ دە ءبىلىم الۋشىنىڭ ءوزى وقيتىن مەكتەبىندە وتكىزىلەدى.
ايتا كەتەيىك, ەمتيحانعا بەرىلگەن باعالاۋمەن كەلىسپەگەن جاعدايدا, ءبىتىرۋشى كەلەسى كۇنگى ساعات 13.00-گە دەيىن اۋداندىق, قالالىق ءبىلىم بولىمدەرىنىڭ جانە وبلىستىق ءبىلىم باسقارمالارىنىڭ جانىنان قۇرىلعان كوميسسياعا شاعىمدانۋىنا قۇقىعى بار. ەمتيحاندار شامامەن 2017 جىلعى 29 مامىر مەن 9 ماۋسىم ارالىعىندا وتكىزىلەتىن بولادى.
«قورىتىندى اتتەستاتتاۋدىڭ بارلىق ماتەريالدارىن دايىنداۋدى جانە ءبىلىم باسقارمالارىنا دەيىن جەتكىزۋدى ۇلتتىق تەستىلەۋ ورتالىعى, ال مەكتەپتەرگە دەيىن جەتكىزۋدى ءبىلىم باسقارمالارى ۇيىمداستىرادى. سونداي-اق جازباشا جانە اۋىزشا ەمتيحاندى باعالاۋدى, بەرىلگەن دۇرىس جاۋاپ كودتارى نەگىزىندە جاۋاپ پاراقتارىن تەكسەرۋدى مەكتەپتە قۇرىلعان ەمتيحان كوميسسياسى ءار ءپان بويىنشا جۇرگىزەدى», - دەيدى راۋشان ەستلەۋسقىزى.
ۇبت جوعارى وقۋ ورنىنا ءتۇسۋ ەمتيحانى جانە مەملەكەتتىك گرانتتاردى ءبولۋ جۇيەسى رەتىندە قالادى. جاڭا فورماتىنا ساي ۇبت-عا 5 ءپان بويىنشا 120 سۇراق بەكىتىلىپ وتىر. ونىڭ 3-ءى مىندەتتى جانە تالاپكەردىڭ جوعارى وقۋ ورنىنا تاپسىراتىن ماماندىعىنا بايلانىستى 2-ءى بەيىنى بويىنشا قاراستىرىلۋدا. ال, تەستىلەۋ ۋاقىتى 3 ساعات 30 مينۋتتى قۇرايدى. شەكتى بالل 50 وزگەرىسسىز قالادى.
تەستىلەۋگە قاتىسۋعا ءوتىنىش قابىلداۋ 10 ناۋرىز - 10 مامىر ارالىعىندا ۇبت-نى وتكىزۋ پۋنكتتەرى ارقىلى جۇزەگە اسىرىلادى. ۇبت-نى وتكىزۋ مەرزىمى – 20 ماۋسىم مەن 1 شىلدە ارالىعىنا بەلگىلەنىپ وتىر. 2017 جىلعى تامىز ايىندا جانە 2018 جىلدىڭ قاڭتار ايىندا ۇبت-نى اقىلى نەگىزدە قايتا تاپسىرۋ مۇمكىندىگى بەرىلەدى. شەكتى بالل – 50.
«التىن بەلگى» يەگەرلەرى, جالپى ءبىلىم بەرەتىن پاندەر بويىنشا حالىقارالىق, رەسپۋبليكالىق وليمپيادالاردىڭ, عىلىمي جوبالاردىڭ جەڭىمپازدارى مەن جۇلدەگەرلەرى ۇبت-نى جالپى نەگىزدە تاپسىرادى. سونداي-اق بالل سانى بىردەي بولعان جاعدايدا ءبىلىم بەرۋ گرانتتارىن الۋ باسىمدىعى ەسكەرىلگەن. مىسالى, ەگەر ءبىتىرۋشى جانە «التىن بەلگى» يەگەرى دە 122 بالل السا, گرانت «التىن بەلگى» يەگەرىنە بەرىلەدى. ەگەر ءبىتىرۋشى كوبىرەك بالل جيناعان جاعدايدا, «التىن بەلگى» يەگەرىنە باسىمدىق بەرىلمەيدى. جالپى ءبىلىم بەرەتىن پاندەر بويىنشا 5 حالىقارالىق وليمپيادانىڭ جەڭىمپازدارى مەن جۇلدەگەرلەرىنە ارنايى گرانتتار بولىنەدى.
بۇدان بولەك, الدىڭعى جىلدارداعى مەكتەپ بىتىرگەن جانە تەحنيكالىق جانە كاسىپتىك ءبىلىم بەرۋ ورنىن بىتىرگەن تۇلەكتەر ءۇشىن جوعارى وقۋ ورنىنا ءتۇسۋ ءۇشىن كەشەندى تەستىلەۋ وتكىزىلەدى. كەشەندى تەستىلەۋگە ءوتىنىش بەرۋ مەرزىمى اعىمداعى جىلعى 1-20 ماۋسىم ارالىعى دەپ بەلگىلەنىپ وتىر. تەستىلەۋ وتكىزى مەرزىمى 17-23 شىلدە ارالىعى. تەستىلەۋ ۋاقىتى – 1 ساعات 40 مينۋت (100 مينۋت). كەشەندى تەستىلەۋ وبلىستاعى جوو-نىڭ بازاسىندا ورنالاسقان تەستىلەۋ ورتالىقتارىندا جۇرگىزىلەدى.