اقتوبەدەگى وبلىستىق توتەنشە جاعدايلار قىزمەتى وڭىردەگى بارلىق وزەندەردىڭ دەڭگەيى ءتۇستى دەپ اقپارات تاراتتى. بىراق ءىرى سۋ قويمالارىنا دالادان كەلىپ جاتقان سۋ توقتاعان جوق. سوندىقتان اقتوبە قالاسى ماڭىنداعى سازدى سۋ قويماسىنان سەكۋندىنا 20 تەكشە مەتر, اقتوبە سۋ قويماسىنان سەكۋندىنا 540 تەكشە مەتر, قارعالى سۋ قويماسىنان سەكۋندىنا 400 تەكشە مەتر سۋ جىبەرىلىپ جاتىر. ەڭ ءىرى قارعالى سۋ قويماسى كەشە اشىلدى. قويما 96 پايىزعا تولىپ تۇر.
«قارعالى سۋ قويماسى اشىلدى. بىراق قاۋىپ جوق. سەبەبى وزەندەردىڭ دەڭگەيى ءتۇستى, قالا ماڭىنداعى سۋ قويمالارىنان جىبەرىلەتىن سۋ مولشەرى دە ازايىپ كەلەدى. ءارى قارعالى سۋ قويماسىنان جىبەرىلگەن سۋ قالاعا ەكى كۇندە كەلەدى. دەمەك وزەندەردىڭ دەڭگەيى تومەندەگەن كەزگە ءدال ءتۇسىپ تۇر», - دەدى وبلىستىق توتەنشە جاعدايلار دەپارتامەنتىنىڭ باسشىسى باۋىرجان سىزدىقوۆ.
بۇگىنگى مالىمەت بويىنشا اقتوبەدەگى 579 ءۇي مەن اۋلانى سۋ باستى. بەس ءۇي قۇلاپ قالدى. بارلىعى 1 مىڭنان استام ادام ەۆاكۋاتسيالانىپ, 69 ادام قۇتقارىلدى. باسپاناسى سۋ استىندا قالعان ادامدار قالاداعى ءتورت مەكتەپكە ورنالاستىرىلدى. وندا قازىر 500-دەن استام ادام جاتىر. ال 700-گە جۋىق ادام تۋىستارىن جاعالاپ ءجۇر.
«ساياجاي اۋماعىنا ءۇي سالۋعا رۇقسات بەرگەن كىم؟ ۇيلەردىڭ قۇجاتى بار ما؟ وسى سۇراقتار ارنايى قۇرىلعان كوميسسيا تەكسەرۋى كەزىندە انىقتالاتىن بولادى. سەبەبى, وزەن جاعالاۋلارى باۋ-باقشاعا ارنالعان. ادامدار جىل سايىن قاۋىپ تونەتىنىن ءتۇسىنۋى كەرەك»,- دەدى باۋىرجان سىزدىقوۆ.