وبلىس پروكۋرورىنىڭ اعا كومەكشىسى اسەمگۇل ابدراحمانوۆا جاسى كامەلەتكە تولماعان التى بالا 29 قۇقىق بۇزۋشىلىق دەرەگىمەن تىركەلگەنىن ايتادى. ال ءبىر ءجاسوسپىرىم جالعىز ءوزى 18 رەت ۇرلىقپەن ۇستالىپتى.
اتىراۋ قالاسى اكىمىنىڭ ورىنباسارى مەيىرىم قالاۋي بيىل ءبىرىنشى رەت قۇقىق بۇزعان بالالاردى اتا-انالارىمەن جيىنعا قاتىستىرۋ تاجىريبەسى ەنگىزىلگەنىنەن حاباردار ەتتى. الايدا, كەيبىر اتا-انالار بالالارىن ارى قاراي تاربيەلەي المايتىندارىن ايتىپ, باس تارتقان. ەندى اتالعان كوميسسيا قالا مەكتەپتەرىن تەكسەرۋ جۇمىسىن قولعا العالى وتىر.
تاعى ءبىر ماسەلە – باسپانا كەزەگىندە تۇرعان اتا-انا قامقورلىعىنسىز قالعان 881 بالاعا زاڭدىلىققا سايكەس پاتەر بەرىلگەن ەدى. الايدا, مەملەكەت قامقورلىعىن تولىققاندى سەزىنبەي, العان ۇيلەرىن بەرەكەسىز ويىن-ساۋىققا اينالدىرىپ وتىرعاندار دا بار. وبلىستىق ىشكى ىستەر دەپارتامەنتى باسشىسىنىڭ ورىنباسارى نۇرىم ورازباەۆ نۇرسايا ىقشام اۋدانىنداعى №14 ءۇيدىڭ جانىندا ورنالاسقان دۇكەن ساتۋشىلارىنان شاعىم تۇسكەنىن ايتادى. دۇكەنگە ۇرلىق جاساپ جۇرگەندەر سول جەردە تۇراتىن بالالار ءۇيىنىڭ تۇلەكتەرى.
«قازىر اتالعان ءۇيدىڭ ءار قاباتىنان پوليتسيا قىزمەتكەرلەرىنە پاتەر ءبولىنىپ, ءتارتىپ قالىپقا كەلتىرىلدى. پوليتسيا قىزمەتكەرلەرى بارلىق جاعدايدى باقىلاپ وتىر», – دەيدى ن.ورازباەۆ.
وبلىس اكىمىنىڭ ورىنباسارى الىبەك ناۋتيەۆ جاسوسپىرىمدەرگە كاسىپتىك ءبىلىم بەرۋ, اۋلا كلۋبتارىن اشۋ, بوس ۋاقىتتارىن ءتيىمدى وتكىزۋ سىندى شارالار جاقسى ناتيجە بەرەدى دەگەن پىكىردە. وقۋشىلاردى ۇيىرمەلەرمەن قامتۋ كورسەتكىشى وبلىستا 32,2 پايىز عانا. وسى جۇمىستى جانداندىرۋ ماقساتىندا جاقىندا ارنايى جوبا باستاۋ الادى.
باقىتگۇل باباش,
«ەگەمەن قازاقستان».
اتىراۋ