قابيبوللا سىديىقوۆ اتىنداعى ماڭعىستاۋ وبلىستىق كىتاپحاناسىنىڭ بالالار ءبولىمى اي سايىن «ارتىق ءبىلىم – كىتاپتا» اتتى سايىس وتكىزىپ تۇرادى. بۇل جولعى بايقاۋ 12–13 جاستاعى بالالار اراسىندا ۇيىمداستىرىلدى. كىشكەنتاي وقىرماندارعا باقتىباي جايلاۋدىڭ ء«ابىش كەكىلباي ۇلى كىم؟» دەگەن كىتابىن ۇيدەن مۇقيات وقىپ كەلىپ تالداۋ جانە سۇراقتارعا جاۋاپ بەرۋ ۇسىنىلدى.
ءۇش كەزەڭنەن تۇراتىن جارىسقا اۋداندار مەن قالالارداعى مەكتەپتەردەن 24 وقۋشى قاتىستى. ولار الدىمەن ەكراننان وزدەرى تاڭداعان ۇياشىقتارداعى سۇراقتارعا جاۋاپ بەردى. ەكىنشى كەزەڭگە 12 قاتىسۋشى ىرىكتەلىپ الىندى. تالاپ بويىنشا ولار كىتاپتاعى ماقال-ماتەلدەر مەن تۇراقتى ءسوز تىركەستەرىنىڭ ماعىناسىن اشىپ, ويىن جەتكىزدى. ءۇشىنشى كەزەڭدە تەست تاپسىرمالارىن ورىندادى. ۇزدىك شىققان جەتى وقۋشى جۇلدەلى ورىنداردى ءبولىستى. باس جۇلدەنى اقتاۋ قالاسى ت.اشىمباەۆ اتىنداعى №11 ليتسەي مەكتەبىنىڭ وقۋشىسى گۇلناز جەتكىزگەن جەڭىپ الدى. 1 ءبىرىنشى ورىن, 2 ەكىنشى ورىن, 3 ءۇشىنشى ورىن جانە 4 ىنتالاندىرۋ سىيلىعىنىڭ يەگەرىنە ديپلومدار مەن اقشالاي سىيلىقتار بەرىلدى. قاتىسۋشىلارعا دا العىسحاتتار مەن كىتاپتار تابىستالدى.
جاقىندا جارىق كورگەن كىتاپتىڭ اۆتورى باقتىباي جايلاۋ: ء«ابىش اتاسىنىڭ شىعارمالارى بالالار مەن جاستاردىڭ اقىل-ويىن ارتتىرادى, ءتالىم-تاربيە بەرەدى, سانالى ازامات بولىپ وسۋىنە وڭ ىقپال ەتەدى. زەيىندى, زەرەك, زەردەلى, زياتكەر, زيالى تۇلعا ەتىپ قالىپتاستىرادى. ءبىزدىڭ بۇل كىتابىمىز كىشكەنتاي وقىرمانداردى سول ءابىش الەمىنە بالا جاستان قىزىقتىرۋدىڭ امالى» دەيدى.
بالالار ءبولىمىنىڭ مەڭگەرۋشىسى قالدىگۇل جىلقىباەۆا باستاعان كىتاپحاناشىلار, ولارعا وسىنداي سايىس وتكىزۋدى ۇسىنعان ماڭعىستاۋ وبلىستىق بەكەت اتا مەشىتىنىڭ باس يمامى انۋاربەك ءىزىمباي ۇلى, بايقاۋعا دەمەۋشى بولىپ قارجىلاي جۇلدە تاعايىنداعان «ماڭعىستاۋ قاجىلارى» قاۋىمداستىعىنىڭ وكىلدەرى كىشكەنتاي وقىرماندار اراسىنداعى جارىستى الداعى ۋاقىتتا دا جالعاستىرا بەرەتىنىن ايتتى.
ماڭعىستاۋ وبلىسى