ءاليا مەن ءمانشۇكتىڭ وشپەس ەرلىگىن قاستەرلەۋ مەن ۇلگى تۇتۋ ماقساتىن كوزدەگەن تۋرنير – «مەرگەن ارۋ-2017» اتاۋىن يەلەنگەن. جارىسقا قاتىسۋشىلارعا كوماندالىق ەسەپ جانە نىسانا كوزدەپ اتۋدان جەكەلەي العا شىققاندار بويىنشا ارنايى ماراپاتتار تاپسىرىلدى. ءبىرىنشى ورىندى شىعىسقازاقستاندىق وقۋشى قىزدار جەڭىپ السا, ەكىنشى ورىنعا قاراعاندى وبلىسىنىڭ جاس مەرگەن ارۋلارى كوتەرىلدى. ال ءۇشىنشى ورىن ولاردىڭ اقتوبەلىك قۇربىلارىنىڭ ەنشىسىنە ءتيدى.
– بۇل رەسپۋبليكالىق تۋرنير ەڭ الدىمەن ەرلىككە تولى داستۇرلەرىمىز بەن داڭقتى تاريحىمىزدى تاعى ءبىر جاڭعىرتۋ تۇرعىسىنان ءماندى بولدى دەپ سانايمىز. ەگەمەن ەلىمىزدە دۇنيەگە كەلىپ, تاربيە الىپ, وقىپ جۇرگەن بۇگىنگى قىزعالداقتاي قىزدارىمىز ءاليا مەن مانشۇك اپالارىنا قاراپ بوي تۇزەسە, وي تۇزەسە العا قويعان ماقساتىمىزدىڭ ورىندالعانى. ءبىز رەسپۋبليكالىق تۋرنير كەزىندە ولاردىڭ بويىنان باتىر اپالارىنا ءتان بولعان نامىسقويلىق پەن ءورلىكتى, ءوز وتانىنا دەگەن شەكسىز سۇيىسپەنشىلىك سەزىمدەرىن كورگەندە كادىمگىدەي ريزا بولدىق. قىسقاسى, تۋرنير ءوزىنىڭ الدىنا قويعان ماقساتىن تولىعىمەن ورىنداپ شىققانى انىق, – دەدى اقتوبە وبلىستىق ءبىلىم باسقارماسىنىڭ باسشىسى ساۋلە ومىربەكوۆا.
تەمىر قۇسايىن,
«ەگەمەن قازاقستان»
اقتوبە وبلىسى