كەشە «نۇر وتان» حدپ-نىڭ ورتالىق اپپاراتىندا باتىس قازاقستان وبلىسىندا ورىن العان سۋ تاسقىنىنا بايلانىستى سەلەكتورلىق كەڭەس ءوتتى. اپات سالدارىنان 8 مىڭنان استام ادام كوشىرىلگەنى بەلگىلى. مەملەكەت باسشىسى ن.نازارباەۆتىڭ تاپسىرماسىنا سايكەس زارداپ شەككەندەرگە كومەك كورسەتۋ ءۇشىن ۇكىمەت 870 ملن. تەڭگە ءبولدى.
كەڭەس بارىسىندا «نۇر وتان» پارتياسى توراعاسىنىڭ ءبىرىنشى ورىنباسارى نۇرلان نىعماتۋلين «باتىس قازاقستان وبلىسىنداعى اپاتتى جاعداي ەشكىمدى دە بەي-جاي قالدىرمادى. «نۇر وتان» دا پرەزيدەنت پارتياسى رەتىندە مەملەكەت باسشىسى, پارتيامىزدىڭ توراعاسى نۇرسۇلتان نازارباەۆتىڭ زارداپ شەككەندەرگە كومەك كورسەتۋ تۋرالى ۇندەۋىنە بىردەن قوسىلدى. بۇگىن بارلىق پارتيا قىزمەتكەرلەرىنىڭ ءبىر كۇندىك جالاقىسىن اۋدارۋ تۋرالى شەشىم قابىلداندى. سونىمەن قاتار, پارتيانىڭ ايماقتىق فيليالدارى كيىمدەردى قابىلداۋ جونىندەگى پۋنكتتەردى ۇيىمداستىرۋ جۇمىسىن جۇرگىزىپ جاتىر, ال «جاس وتان» قۇرىلىس جاساقتارى اپات زارداپتارىن جويۋ جونىندەگى وبلىستىق شتابتىڭ باسشىلىعىمەن ورال قالاسىندا بۇگىنگى كۇننەن باستاپ ءوز جۇمىسىن باستادى», – دەپ اتاپ ءوتتى.
«ەگەمەن-اقپارات».