مەنىڭ ايتايىن دەگەنىم, مىنا كورشى قىتايمەن شەكارالاس ورنالاسقان دوستىق بەكەتىندەگى جاعداي. اشىعىن ايتساق, تەمىر جول ۇستىنەن جىلما-جىل سالىنۋى شەگەرىلىپ كەلە جاتقان جولاۋشىلار وتەتىن كوپىر ماسەلەسى بولىپ تۇر.
تەمىر جول ۇستىنەن وتەتىن كوپىردىڭ قاشان سالىناتىندىعى – كوپشىلىك كوكەيىندە جۇرگەن ساۋال. كوپىر جايلى ءبىراز ۇسىنىستار كوتەرىلىپ, قازىرگى اۋىل اكىمى مەن بۇرىنعى بەكەت باسشىسى ءتيىستى ورىندارعا, ياعني, «قازاقستان تەمىر جولى» ۇلتتىق كومپانياسى» اكتسيونەرلىك قوعامىنىڭ ماگيسترالدىق جەلى ديرەكتسياسىنىڭ فيليالىنا ءوتىنىش جولداعان ەدى. الايدا, كوپىر سالۋعا تىكەلەي قاتىسى بار اتالعان مەكەمە سىرعىتپا جاۋاپتان وزگە سىڭاي تانىتپاي وتىر. ال جاۋاپتا اتالعان ماگيسترالدى جەلى ديرەكتسياسى فيليالى توراعاسىنىڭ ءبىرىنشى ورىنباسارى بىلاي دەپتى:
«جوبالاۋشى جوبالىق-ىزدەستىرۋ جۇمىستارىن جالعاستىرۋ ۇستىندە. جوبالىق-سمەتالىق قۇجاتتاما 2014 جىلى دايىن بولعان جاعدايدا, 2015 جىلى دوستىق ستانساسىندا جاياۋ جۇرگىنشىلەر كوپىرىن سالۋ جوسپارلانىپ وتىرعاندىعىن حابارلايمىز». سول جاۋاپتان سوڭ دا ءۇش جىلعا تايادى. ءالى كۇنگە ءولى تىنىشتىق. بەكەتتىڭ وڭ قاتارىنداعى بوي كوتەرگەن ەكى, ءۇش قاباتتى تۇرعىن ۇيلەر مەن وندا قونىستانعان وتباسىلار سانى دا ارتىپ كەلەدى. ەرەسەكتەردىڭ جۇمىسقا, بالالاردىڭ مەكتەپكە جەتۋى مۇڭ بولىپ تۇر. ولار امالسىز ەرەجەلەردى بۇزىپ, قاتار-قاتار تۇرعان ۆاگونداردىڭ استىنان وتۋگە ءماجبۇر.
تەمىر جولدىڭ سول جاعىندا مەكەمەلەر مەن تۇرعىن ۇيلەر ءتىزىلىپ تۇرسا, وڭ جاعى حالىقارالىق اۆتوماگيسترالمەن شەكتەسەدى. سول سەبەپتى بۇل كوپىردى اۆتوكولىك جولىنان اسىرا سالسا دۇرىس بولار ەدى. حالىق قامىن ويلاساق, ۇزبەي جەل سوعاتىن دوستىقتاعى جوسپارلانعان كوپىردىڭ ءۇستىن جازعى ىستىق پەن قىسقى ىزعارلى ايازعا توتەپ بەرەتىندەي جابىق قىلىپ, كوز تارتار ساۋلەتپەن ادىپتەسە تىپتەن دۇرىس. جوعارىدا ايتىلعان جوبانىڭ جولى اشىلسا دەگەن كوپ تىلەۋى – وسى.
مۇنى ماسەلە ەتىپ كوتەرىپ وتىرعانىمىزبەن, بۇل ءىستىڭ ىلگەرى باساتىنىنا كۇدىكتەنە دە قارايمىز. ويتكەنى, اۋدان ورتالىعىنان شىعاتىن 170 شاقىرىم جولدىڭ دوستىققا دەيىنگى 80 شاقىرىمنان استامىنا شيرەك عاسىر بويى بىردە-ءبىر رەت جوندەۋ جۇرگىزىلمەگەن. ءتىپتى, الدىندا وسى باس باسىلىمعا مادەنيەت سارايى مەن سپورت كەشەنى تۋرالى جازىلعانىمەن, ول عيماراتتاردىڭ ءالى كۇنگە قازىعى قاعىلماۋى دا وسىنى مەڭزەيدى.
بۇقارالىق سپورت پەن مادەنيەتكە جەتە ءمان بەرۋ كەرەكتىگىن ەلباسىمىز جەرىنە جەتكىزە ايتقان بولاتىن. كەلەشەك ۇرپاق ءوسىپ كەلە جاتقان شەكارالىق ايماقتا بۇل شارۋا دا كەنجەلەپ وتىر. قوردالانعان ماسەلەلەر قوماقتى. سونىڭ ءتۇيىنىن شەشىپ, تۇبەگەيلى وزگەرىستەرگە قول جەتكىزۋ اكىمدەر الدىنداعى ابىرويلى مىندەت بولسا يگى.
سەيىت وماروۆ,
اۋىل تۇرعىنى
الماتى وبلىسى